म्याग्दी: म्याग्दी जिल्लाको बेनी–दरबाङ सडक आयोजनाको तेस्रो खण्ड (रणवाङ–दरबाङ) कालोपत्र गर्न थालिएको छ। बिहीबार खहरेखोलाबाट दरबाङतर्फ कालोपत्र सुरु गरिएको हो।
पूर्वाधार विकास कार्यालयका प्रमुख विष्णुप्रसाद पौडेलका अनुसार पहिलो चरणमा खहरेखोला, रणवाङ, सहश्रधारा, दुखुखोला, रातोढुङ्गा हुँदै तोलावाङसम्म चार किलोमिटर सडक कालोपत्र गरिँदैछ।
फराकिलो बनाउने, नाली निर्माण, पर्खाल लगाउने, बेस र सबबेसको काम सकिएका स्थानमा ‘फस्टकोट’ राख्न थालिएको छ। तोलावाङ, ढाडखर्क र दरबाङ बजारमा निर्माण सम्पन्न भएपछि थप कालोपत्र गरिने बताइएको छ।
गण्डकी प्रदेशको ‘एक निर्वाचन क्षेत्र, एक सडक’ कार्यक्रमअन्तर्गत दुई वर्षमा सम्पन्न गर्ने लक्ष्यसहित पाँच वर्षअघि ठेक्का सम्झौता गरिएको यो सडक आयोजना विभिन्न समस्याका कारण अलपत्र परेको थियो।
मङ्गला गाउँपालिका–२ रणवाङबाट दरबाङसम्मको आठ किलोमिटर सडक कालोपत्र गर्न २०७६ जेठमा रू २२ करोड ५७ लाखको ठेक्का सम्झौता भएको थियो। तर, अहिलेसम्म ८० प्रतिशत मात्रै काम सम्पन्न भएको छ।
निर्माण कम्पनीका प्राविधिक देवराज राउतले चालु आर्थिक वर्षभित्र काम पूरा गर्ने लक्ष्यसहित मजदुर र उपकरण परिचालन गरिएको बताए। निर्माण कम्पनीका सञ्चालक चन्द्र थकालीका अनुसार बजेट अभाव, नदीजन्य सामग्रीको अभाव, विपद् र कोरोना महामारीले काममा ढिलाइ भएको हो।
गत वर्ष रू पाँच करोड बजेट विनियोजन गरिएको यो आयोजना अहिले रू एक करोड ५० लाखमा सीमित छ। म्याग्दीको जीवनरेखा मानिएको यो सडक निर्माण ढिलाइ हुँदा यात्रुहरूलाई सास्ती भएको छ।
सडक कालोपत्र सुरु भएपछि स्थानीय बासिन्दा उत्साहित छन्। वडाध्यक्ष धनबहादुर खाती क्षेत्रीले कामको गुणस्तरमा निगरानी र सहजीकरण गरिएको बताए।
बेनी–दरबाङ सडक मङ्गला, मालिका र धवलागिरि गाउँपालिकालाई सदरमुकाम बेनीसँग जोड्ने महत्वपूर्ण मार्ग हो। यो सडक २०६३ सालमा खुलेको हो।
बेनीबाट सिमसम्म १२.५ किलोमिटर तीन वर्षअघि कालोपत्र भइसकेको छ भने सिम–पानाबगर खण्डको काम गत जेठमा सम्पन्न भएको थियो। दरबाङबाट मुना जोड्ने सडक स्तरोन्नतिको योजना पनि कार्यान्वयनमा रहेको प्रदेशसभा सदस्य रेशम जुग्जालीले जानकारी दिए।
धारापानी–ताकम–शिवाङ खण्डमा पनि धमाधम काम भइरहेको छ। प्रदेश सरकार र संघीय सरकारको साझेदारीमा थप योजनाहरू अघि बढाउन पहल भइरहेको बताइएको छ।
