बुटवल – रूपन्देही जिल्ला अदालतमा आज पनि पूर्वगृहमन्त्री तथा रास्वपा सभापति रवि लामिछानेको थुनछेक बहस जारी रहने भएको छ। सुप्रिम बचत तथा ऋण सहकारी ठगी र संगठित अपराधको मुद्दामा लामिछाने बुधबार रूपन्देही जिल्ला अदालतमा उपस्थित भएका थिए।
शुक्रबारको सुनुवाइमा सहकारी पीडित पक्षबाट दुई जना र लामिछानेको तर्फबाट तीन जना कानुन व्यवसायीले बहस गरेका थिए। अदालतले अन्य कानुन व्यवसायीको बहस बाँकी रहेकाले थुनछेक प्रक्रिया लम्बिएको जनाएको छ।
जिल्ला अदालत रूपन्देहीका श्रेस्तेदार यज्ञमूर्ति ज्ञवालीका अनुसार शुक्रबार बहस नसकिएकाले मुद्दालाई हेर्दाहेर्दैमा राखिएको थियो। उनले आजको बहसपछि जाहेरीवाला र प्रतिवादीबीचको सवाल–जवाफ सकिए आदेश पनि आजै आउन सक्ने बताए।
शुक्रबारको बहसमा जाहेरीवालाको तर्फबाट वरिष्ठ अधिवक्ता सुरेन्द्र भण्डारी र आरसी गौतमले सहभागिता जनाएका थिए। उनीहरूले लामिछानेको खातामा सहकारीको २ करोड रुपैयाँ गएको र उनले आफ्नै हस्ताक्षरमा ४० लाख ९२ हजार रुपैयाँ किस्ताबापत भुक्तानी गरेको तथ्यलाई सहकारी ठगीमा उनको संलग्नताको प्रमाणका रूपमा प्रस्तुत गरेका थिए।
प्रतिवादीको तर्फबाट वरिष्ठ अधिवक्ता सुशील पन्तसहित तीन जना कानुन व्यवसायीले बहस गरेका थिए। आज वरिष्ठ अधिवक्ता रमण श्रेष्ठसहित आठ जना वकिलले लामिछानेको पक्षमा बहस गर्ने कार्यक्रम छ। बहस न्यायाधीश प्रह्लादकुमार योगीको इजलासमा भइरहेको छ।
सुप्रिम सहकारीको ठगी प्रकरणमा पूर्वगृहमन्त्री लामिछाने, पूर्वडीआईजी छविलाल जोशी, सहकारीका संरक्षक गीतेन्द्रबाबु (जीबी) राईसहित २२ जनाविरुद्ध सहकारी ठगी र संगठित अपराधको आरोपमा माघ ६ गते पूरक मुद्दा दर्ता भएको थियो। काठमाडौँ जिल्ला अदालतबाट धरौटीमा रिहा भएपछि लामिछाने मंगलबार रूपन्देही आएका थिए र बुधबार अदालतमा उपस्थित भएका थिए।
