काठमाडौँ: प्रसिद्ध वाइल्डलाइफ फोटोग्राफर चुङ्बा शेर्पाको ६४ वर्षको उमेरमा निधन भएको छ। उहाँको आज राति १२:१५ बजे ग्रान्डी अस्पतालमा उपचारको क्रममा निधन भएको हो।
सोलुखुम्बुको खुम्बु पासाङल्हामु गाउँपालिका–१, लुक्ला स्थायी ठेगाना भएका शेर्पा कलेजोसम्बन्धी समस्याका कारण एक सातादेखि अस्पतालमा उपचाररत हुनुहुन्थ्यो। भेन्टिलेटरमा राखेर उपचार गरिरहेको अवस्थामा उहाँको निधन भएको वडाअध्यक्ष फुनुरु शेर्पाले पुष्टि गर्नुभयो।
उहाँका दुई छोरा र तीन छोरी छन्। लामो समयदेखि नेपाली कांग्रेसमा सक्रिय शेर्पा नेपाली कांग्रेस खुम्बु पासाङल्हामु गाउँपालिकाका सभापति समेत हुनुहुन्थ्यो। साथै, पर्यटन व्यवसायमा संलग्न रहेका उहाँ चौँरीखर्कका पूर्व गाविस अध्यक्ष पनि हुनुहुन्थ्यो।
केही वर्षयता वाइल्डलाइफ फोटोग्राफीमा सक्रिय शेर्पा फोटोग्राफीसम्बन्धी विभिन्न राष्ट्रिय तथा अन्तर्राष्ट्रिय संस्थासँग आबद्ध हुनुहुन्थ्यो।
