काठमाडौं: प्रधानमन्त्री केपी शर्मा ओलीले पारस्परिक सद्भाव कायम गर्दै एकताबद्ध प्रयासमार्फत देशको समृद्धि सम्भव हुने बताएका छन्।
नेपाल संवत् ११४५ का अवसरमा नेकपा (एमाले) काठमाडौं महानगर कमिटीले वसन्तपुरमा आयोजना गरेको जलपान कार्यक्रममा शुभकामना सन्देश दिँदै एमाले अध्यक्ष ओलीले सबै तहका नेता तथा कार्यकर्तालाई एकताबद्ध भएर शान्त र समृद्ध नेपाल निर्माणमा लाग्न आग्रह गरे।
प्रधानमन्त्री ओलीले कला, संस्कृति, र सभ्यतामा धनी नेपालले आफ्नो राष्ट्रिय पहिचान र संस्कृतिको संरक्षण गर्दै मानव कल्याणका लागि योगदान दिनुपर्नेमा जोड दिए।
उक्त कार्यक्रममा एमाले पोलिटब्युरो सदस्य आनन्द पोखरेल, रामेश्वर फुयाँल, केन्द्रीय सदस्य शान्ति अधिकारी, काठमाडौं जिल्ला अध्यक्ष दीपक निरौला, र काठमाडौं महानगरपालिकाकी उपप्रमुख सुनिता डङ्गोलसहित महानगर कमिटीका अन्य सदस्यहरूको उपस्थिति थियो।
