काठमाडौं: संस्कृति, पर्यटन तथा नागरिक उड्डयनमन्त्री बद्री पाण्डेले अन्तर्राष्ट्रिय उडान सञ्चालन गर्ने हवाई कम्पनीहरूलाई २४ घण्टाभित्र हवाई भाडादर उपलब्ध गराउन निर्देशन दिएका छन्। हवाई भाडा वृद्धिको विषयमा मन्त्रालयमा आयोजित छलफलका क्रममा मन्त्री पाण्डेले यो निर्देशन जारी गरेका हुन्।
मन्त्री पाण्डेले भने, “हामीले नागरिककै सेवाका लागि हवाई कम्पनीहरूलाई सहुलियत उपलब्ध गराएका थियौं। तर, त्यसको उपहास गर्दै राज्य र नागरिकप्रतिको दायित्व बेवास्ता गरी गैरजिम्मेवारी देखाइएको छ। प्रतिष्ठित व्यापारी र एयरलाइन्सले नागरिकमाथि द्वन्द्व व्यापारजस्तो व्यवहार देखाएका छन्, जुन अत्यन्तै खेदजनक छ। यसले मलाई निकै दु:खी बनाएको छ।”
यसअघि, नियामक निकायसँगको छलफलमा हवाई सेवा कम्पनीहरूले भाडा नियन्त्रणका लागि पाँचबुँदे सहमति गरे पनि त्यसको कार्यान्वयन नगरेकोप्रति मन्त्री पाण्डेले कडा आपत्ति जनाएका छन्। हवाई भाडा वृद्धिबारे गुनासो बढ्दै गएपछि परराष्ट्र, श्रम र पर्यटनमन्त्रीहरूको संयुक्त बैठकले समेत हवाई भाडा नियन्त्रणका लागि आवश्यक पहल गर्नुपर्ने निर्णय गरेको स्मरण गराउँदै मन्त्री पाण्डेले एयरलाइन्स कम्पनीहरूलाई राज्य र नागरिकप्रति जिम्मेवार बन्न चेतावनी दिए।
