बाकु (अजरबैजान): संयुक्त राष्ट्रसङ्घीय जलवायु परिवर्तन सम्मेलन (कोप–२९)मा सहभागी हुने क्रममा राष्ट्रपति रामचन्द्र पौडेलले आज नेपालको प्रतिनिधित्व गर्दै एक उच्चस्तरीय सत्रको सञ्चालन गर्दै हुनुहुन्छ।
‘पर्वतीय क्षेत्रमा जलवायुजन्य क्षतिको सम्बोधन’ विषयमा केन्द्रित उक्त सत्रमा नेपालले आफ्नो एजेण्डा प्रस्तुत गर्दै विश्व समुदायको ध्यानाकर्षण गराउने योजना बनाएको छ। यसअघि मङ्गलबार नेपालका तर्फबाट राष्ट्रिय मन्तव्य व्यक्त गर्दै राष्ट्रपति पौडेलले हिमालयको सुरक्षा भनेकै पृथ्वीको सुरक्षा हो भन्ने सन्देश विश्वभर फैलाउन आह्वान गर्नुभएको थियो।
राष्ट्रपति पौडेलले भन्नुभयो, “हिमालको सुरक्षा भनेकै पृथ्वीको सुरक्षा हो भन्ने कुरामा हामीले ध्यान दिनुपर्छ। सेता हिमाल काला पहाडमा परिणत हुँदै जानुले पर्वतीय क्षेत्र मात्र होइन, तल्लो तटीय मुलुकहरू समेत जोखिममा परिरहेका छन् भन्ने सत्यलाई विश्वले बिर्सनु हुँदैन।”
यसै क्रममा मङ्गलबार माल्दिभ्सका राष्ट्रपति डा मोहम्मद मैज्जुसँगको भेटवार्तामा राष्ट्रपति पौडेलले जलवायु परिवर्तनको प्रत्यक्ष प्रभावमा परेका नेपाल र माल्दिभ्स जस्ता देशहरूले जलवायु वार्ताहरूमा सहकार्य गर्नुपर्नेमा जोड दिनुभएको थियो।
राष्ट्रपति पौडेलको नेतृत्वमा यस पटक नेपालले ‘विश्व नेताहरू जलवायु कार्य शिखर सम्मेलन’मा सहभागिता जनाएको छ।
अजरबैजानका राष्ट्रपति इलहम अलियभको निमन्त्रणामा राष्ट्रपति पौडेल सोमबार बाकु पुग्नुभएको हो। सम्मेलनमा ४० देशका राष्ट्रप्रमुख वा उपराष्ट्रपति र ३५ देशका प्रधानमन्त्रीसहित विश्वभरका जलवायु परिवर्तन क्षेत्रमा कार्यरत प्रभावशाली नेताहरू छलफल र सहयोगका लागि सहभागी भएका छन्।
