रौतहट । रौतहटको गौर नगरपालिका–६ सबगढामा विवाहको जन्ती र स्थानीय समुदायबीच विवाद हुँदा झडप भएको छ। मस्जिद अगाडि बाजा बजाएको विषयलाई लिएर सुरु भएको विवादले उग्र रूप लिँदा दुई चरणमा झडप भएको प्रहरीले जनाएको छ।
फागुन ७ गते राति करिब ९ः५० बजे बौधिमाई नगरपालिका–९ सरमुजवाबाट सबगढास्थित सत्यनारायण साहको घरतर्फ जाँदै गरेको जन्ती मस्जिद अगाडि पुगेपछि बाजा बजाउने विषयमा विवाद उत्पन्न भएको थियो। सोही राति ढुङ्गा हानाहान हुँदा ६ जना घाइते भएका थिए।
आज बिहान करिब ९ः१५ बजे पुनः सोही विषयलाई लिएर दुवै पक्षका करिब ५०० जना भेला भई दोहोरो झडप भएको जिल्ला प्रहरी कार्यालयले जनाएको छ। स्थिति तनावग्रस्त बनेपछि नेपाल प्रहरी र सशस्त्र प्रहरी बलका अतिरिक्त टोली परिचालन गरिएको थियो। भीड नियन्त्रणका लागि सुरक्षाकर्मीले १२ राउण्ड हवाई फायर तथा ४० सेल अश्रुग्यास प्रहार गरेका छन्। हाल स्थिति नियन्त्रणमा रहेको प्रहरीले जनाएको छ।
झडपमा परी थप ६ जना घाइते भएका छन्। घाइतेमध्ये २७ वर्षीय रामप्रवेश साह, १४ वर्षीय महम्दिन मिया, २० वर्षीय शेख सही आलम मिया, १७ वर्षीय शेख सहिब र ४२ वर्षीय महम्मद खुर्सेद प्रादेशिक अस्पताल गौरमा उपचाररत छन्। उनीहरूको अवस्था सामान्य रहेको बताइएको छ।
ड्युटीमा खटिएका प्रहरी जवान राजेश ठाकुरसहित दुई जना सुरक्षाकर्मी पनि सामान्य घाइते भएका थिए। उपचारपछि उनीहरू डिस्चार्ज भइसकेका छन्।
घटनालाई साम्य पार्न र विवाद समाधानका लागि आज दिउँसो ३ः०० बजेदेखि जिल्ला प्रशासन कार्यालय गौरमा दुवै पक्षका प्रतिनिधिहरूबीच वार्ता सुरु गरिएको छ। स्थानीय प्रशासनले सबैलाई संयमता अपनाउन र सामाजिक सद्भाव कायम राख्न अपिल गरेको छ।
