काठमाडौं: इजरायली रक्षा बलका प्रमुख हर्जी हेलेवीले आफ्नो पदबाट राजीनामाको घोषणा गरेका छन् । द जेरुसेलम पोस्टका अनुसार हार्जी हेलेवीले मार्चमा राजीनामा दिनेछन्।

हर्जी हेलेवीले एक विज्ञप्तिमा भने अनुसार अक्टोबर ७ को आइडीएफको असफलताको जिम्मेवारी लिँदै उनले आफ्नो निर्णय बारे रक्षा मन्त्रालयलाई जानकारी गराएका छन् ।

उनले भने, ‘आइडीएफले महत्वपूर्ण सफलता हासिल गरेको र बन्धकहरुलाई रिहा गर्ने सम्झौता कार्यान्वयन गर्ने प्रक्रिया चलिरहेको अवस्थामा मार्च ६, २०२५ सम्म आफ्नो जिम्मेवारीबाट मुक्त हुन अनुरोध गरेको छु ।’

यसैबीच, आइडीएफले वेस्ट बैंकको कब्जामा रहेको प्यालेस्टिनी क्षेत्रको जेनिन शरणार्थी शिविरमा ठूलो सैन्य कारबाही गरेको छ, जसमा ८ प्यालेस्टाइनीको मृत्यु भएको छ।

प्रधानमन्त्री बेन्जामिन नेतान्याहुले भनेका छन्, ‘सेना, पुलिस र शिन बेट सुरक्षा बलले जेनिनमा आतंकवादलाई परास्त गर्न व्यापक र महत्त्वपूर्ण अपरेशन सुरु गरेको छ। यस क्षेत्रलाई प्यालेस्टिनी सशस्त्र समूहहरूको गढ मानिन्छ।

गाजामा हमास र इजरायलबीच गत बिहीबार युद्धविराम सुरु भएको थियो र इजरायलले तीन इजरायली बन्धकको बदलामा ९० प्यालेस्टाइनी बन्दीहरूलाई रिहा गरेको छ। बन्दी आदानप्रदान आगामी जनवरी २५ मा हुने सम्भावना छ ।

काठमाडौं । अमेरिकी राष्ट्रपति डोनाल्ड ट्रम्पले अमेरिकामा आर्टिफिसियल इन्टेलिजेन्सको प्रवर्द्धनलाई लिएर ठूलो घोषणा गरेका छन् ।

ट्रम्पले यसका लागि ५०० अर्ब डलर लगानी गर्ने र एक लाख नयाँ रोजगारी पनि सिर्जना गर्ने बताएका छन् ।

यो लगानी टेक्नोलोजी क्षेत्रका ठूला कम्पनी ओरेकल, ओपन एआई र सफ्ट बैंकले आगामी पाँच वर्षभित्र गर्नेछन् ।

ट्रम्पले यसका लागि नयाँ अमेरिकी एआई कम्पनी ‘स्टारगेट’ बनाउने घोषणा गरेका छन् ।

ओरेकलका वरिष्ठ अधिकारी एलिसनले यसका लागि टेक्सासमा डाटा सेन्टर निर्माण गर्ने काम भइरहेकाले १० वटा भवन निर्माणाधीन रहेको र यसलाई २० सम्म विस्तार गरिने बताएका छन् ।

यससँगै ओपन एआई कम्पनीका प्रमुख ओल्टम्यानले दाबी गरे, “यो यस युगको सबैभन्दा महत्त्वपूर्ण परियोजना हो र यो ट्रम्प बिना हुन सक्दैन।”

सफ्टबैंक कम्पनीका मासायोशी सोनले ट्रम्पको भनाइको प्रतिध्वनि गर्दै भने, “यो अमेरिकाको स्वर्ण युगको सुरुवात हो।”

काठमाडौं: प्रतिनिधिसभाअन्तर्गतको सार्वजनिक लेखा समितिले सिमेन्टमा भएको मूल्यवृद्धि तत्काल नियन्त्रण गर्न सरकारलाई निर्देशन दिएको छ।

सिंहदरबारमा बुधबार बसेको समिति बैठकले अस्वभाविक रुपमा सिमेन्टमा मूल्यवृद्धि भएको देखिएको भन्दै बिस्तृत अध्ययन गरि तत्काल मूल्यवृद्धि नियन्त्रण गर्न उद्योग वाणिज्य तथा आपूर्ति मन्त्रालयलाई निर्देशन दिएको हो।

कुनै पनि वस्तु वा सेवाको मूल्य निर्धारण गर्न तथा नियमित रुपमा परिक्षण गर्न मूल्य निर्धारण सम्बन्धी प्रविधिको बिकास गर्दै प्रयोगमा ल्याउन उद्योग मन्त्रालय र सम्बन्धीत निकायलाई समिति निर्देशन दिएको छ।

बैठकले सिमेन्ट उद्योगमा लोडसेडिङ भएको जानकारी आएकाले सो विषयमा ऊर्जा मन्त्रालयसँग जानकारी माग गर्ने निर्णय गरिएको सभापति ऋषिकेश पोखरेलले जानकारी दिए।

बैठकमा उद्योग वाणिज्य तथा आपूर्ति मन्त्री दामोदर भण्डारीले अघोषित लोडसेडिङ्का कारण उत्पादनमा ह्रास आएकाले केहि मूल्यवृद्धि भएको हुनसक्ने बताए। उनले सिमेन्ट उत्पादक र निर्माण व्यवसायीसँग समन्वय गरेर यससम्बन्धी समस्याको समधान गर्ने बताए। विभिन्न कम्पनीले उत्पादन गरेका सिमेन्टको मूल्य फरक फरक देखिएकाले एउटै मूल्य निर्धारण गर्ने गरि अघि बढ्ने उनले बताए।

त्यस्तै बैठकमा निर्माण व्यवसायी महासंघका अध्यक्ष रवी सिंहले राज्यको मिलोमतोमा सिमेन्टको मूल्यवृद्धि भएको आरोप लगाए। सिमेन्टको मूल्यवृद्धिमा तत्काल पुर्नमूल्याङ्कन हुन नसके आयोजनाको लागत बढ्ने उनले बताए।

समिति सदस्यले समेन्टको मूल्यवृद्धिको कारणबारे अध्ययन गरी यसलाई नियन्त्रण गर्नुपर्नेमा जोड दिए।

काठमाडौं । नेपाल आईसीसी यू-१९ महिला टी-२० विश्वकपको समूह चरणबाटै बाहिरिएको छ। बुधबार भएको समूहको अन्तिम खेलमा नेपाल अष्ट्रेलिया सँग ८३ रनले पराजित भएसँगै प्रतियोगिताबाट बाहिरिएको हो।

अस्ट्रेलियाले दिएको १४० रनको लक्ष्य पछ्याएको नेपालले ५६ रन मात्र बनाउन सक्यो। कप्तान पुजा महतोले सर्वाधिक १८ रन जोडे पनि अरुले सम्झन लायक खेल्न सकेनन्।

अस्ट्रेलियाका लागि हसरत गिल, जुलियट मोर्टन र लिली बासिङथ्वाइटले २-२ विकेट लिए भने कोल एइन्सवर्थले १ विकेट लिइन्।

त्यसअघि मलेसियाको बांगीस्थित युएसडी-युकेएम ओभलमा टस जितेर पहिले ब्याटिङ गरेको अष्ट्रेलियाले पूरै २० ओभर खेल्दै ६ विकेट गुमाएर १३९ रन बनाएको थियो।

नेपालकी कप्तान पुजा महतोले अष्ट्रेलियाको सुरुवाती ३ विकेट लिँदै राम्रो सुरुवात दिलाएकी थिइन्। नेपालका लागि कप्तान पुजाले ४ ओभरमा ३१ रन खर्चेर ३ विकेट लिइन्। सिमाना केसीले ३ ओभरमा २० रन खर्चेर २ विकेट लिइन्।

यस हारसँगै नेपाल सुपर सिक्समा पुग्न असफल भएको छ। नेपाल पहिलो खेलमा बंगलादेश तथा दोस्रो खेलमा स्कटल्याण्डसँग पराजित भएको थियो। नेपालले प्रतियोगिताका तीनै खेलमा पराजय बेहोरेको छ।

काबुल: अफगानिस्तानको तालिबान सरकारले अमेरिकासँगको बन्दी आदानप्रदान सम्झौतामा थुनिएका अमेरिकीहरूलाई रिहा गर्ने घोषणा गरेको छ। काबुलस्थित तालिबानको विदेश मन्त्रालयले अमेरिकी नागरिकहरूको नाम वा सङ्ख्या खुलाएको छैन। तथापि, दुई दशकअघि पूर्वी अफगानिस्तानको नान्गाहार प्रान्तमा गिरफ्तार भई क्यालिफोर्नियामा आजीवन कारावासको सजाय भोगिरहेका खान मोहम्मदको साटासाटमा यो कदम उठाइएको बताएको छ।

तालिबानको विदेश मन्त्रालयले मंगलबार एक्समार्फत जानकारी दिँदै भनेको छ, “अफगानिस्तानको इस्लामिक इमिरेट्स र संयुक्त राज्य अमेरिकाबीचको व्यापक र फलदायी वार्तापछि अमेरिकी नागरिकहरूको रिहाइको बदलामा अफगान मुजाहिद खान मोहम्मदलाई अमेरिकी जेलबाट रिहा गर्न सहजीकरण गर्ने सम्झौता भएको छ।”

यो घटनाले अफगानिस्तान र अमेरिकाबीचको सम्बन्धमा नयाँ आयाम थपेको छ। यसअघि, सन् २०२१ मा अमेरिकी फौजले अफगानिस्तानबाट पूर्ण रूपमा फिर्ता भएपछि तालिबानले देशको नियन्त्रण लिएको थियो।

यस बन्दी आदानप्रदानले दुई देशबीचको कूटनीतिक सम्बन्धमा सुधारको सङ्केत गरेको छ। थप विवरणहरू सार्वजनिक हुन बाँकी छ।