काठमाडौँ: राष्ट्रपति रामचन्द्र पौडेलले फागु पूर्णिमा (होली) पर्वले सामाजिक सद्भाव र राष्ट्रिय एकतालाई थप सुदृढ बनाउन योगदान पुर्‍याउने विश्वास व्यक्त गर्नुभएको छ।

होली: मौलिक संस्कृतिको संरक्षणको प्रेरणा
होली पर्वका अवसरमा शुभकामना सन्देश दिँदै राष्ट्रपति पौडेलले यो पर्वले समाजमा रहेका विकृति, विसङ्गति तथा कुरीतिहरूलाई हटाउँदै मौलिक संस्कृतिको संरक्षण र संवर्द्धन गर्न प्रेरणा प्रदान गर्ने बताउनुभएको छ।

उहाँले भन्नुभयो, “नेपाली समाज जातीय, भाषिक र सांस्कृतिक रूपमा विविधतायुक्त छ। यस्तै विविधता बीचको एकता नै हाम्रो पहिचान र सुन्दरता हो। होली पर्वले समस्त नेपालीहरूलाई रिस-राग त्यागी प्रेम, सद्भाव, र आत्मीयताको माध्यमबाट सामाजिक सद्भाव र राष्ट्रिय एकतालाई थप सुदृढ बनाउन प्रेरित गर्ने विश्वास लिएको छु।”

रङहरूको पर्व: एकताको प्रतीक
राष्ट्रपति पौडेलले होलीमा खेलिने विविध रङहरू जस्तै नेपाली समाज पनि विविधतायुक्त रहेको उल्लेख गर्दै यही विविधता नै हाम्रो पहिचान र सुन्दरता भएको बताउनुभयो।

उहाँले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूलाई सुख, शान्ति तथा समृद्धिको कामना गर्दै होली पर्वको अवसरमा हार्दिक मङ्गलमय शुभकामना व्यक्त गर्नुभएको छ।

होली पर्वको परम्परा र महत्त्व
विभिन्न रङ्गीचङ्गी कपडाले सजाइएको चीर ठड्याएपछि होली पर्वको सुरुआत हुन्छ भने पूर्णिमाको राति चीर दाह गरेपछि यसको समापन गरिन्छ। रङहरूको पर्वका रूपमा परिचित होली नेपाली समाजमा आपसी मेलमिलाप र सद्भावको सन्देश बोकेर मनाइन्छ।

यो पर्व असत्यमाथि सत्यको, अन्यायमाथि न्यायको, दुराचारमाथि सदाचारको, र अधर्ममाथि धर्मको विजयको प्रतीकका रूपमा मनाइन्छ।

काठमाडौँ: सभामुख देवराज घिमिरेले फागु पूर्णिमा (होली) पर्वलाई संस्कार, सभ्यता र आपसी प्रेमको चाडका रूपमा उल्लेख गर्दै यसलाई मर्यादित र सभ्य तरिकाले मनाउन अपिल गर्नुभएको छ।

फागु पर्वको सन्देश: प्रेम, शान्ति र भाइचारा
स्वदेश तथा विदेशमा रहेका नेपाली दिदीबहिनी तथा दाजुभाइहरूलाई सुख, शान्ति र समृद्धिको शुभकामना व्यक्त गर्दै सभामुख घिमिरेले फागु पर्वले समाजमा सकारात्मक ऊर्जा प्रवाह गर्ने र प्रेम, शान्ति तथा भाइचारा अभिवृद्धि गर्ने विश्वास व्यक्त गर्नुभएको छ।

उहाँले भन्नुभयो, “फागु पर्वले असत्यमाथि सत्यको विजयको सन्देश दिएको छ। भक्त प्रह्लादको कथासँग जोडिएको धार्मिक परम्पराले जीवनमा सकारात्मक सोच राख्न प्रेरणा दिन्छ। यो पर्व विभिन्न जातजाति, धर्म, तथा क्षेत्रका मानिसहरूबीच मेलमिलाप र एकता बढाउने माध्यम पनि हो। रङ, रमाइलो र उत्सवमय वातावरणले यसलाई अझ उल्लासमय बनाउँछ।”

सभ्य तरिकाले पर्व मनाउन आग्रह
सभामुख घिमिरेले पछिल्ला वर्षहरूमा फागु पूर्णिमा मनाउने शैलीमा केही विकृतिहरू देखिएको भन्दै जबरजस्ती रङ दल्ने, अभद्र व्यवहार गर्ने, मादक पदार्थको दुरुपयोग गर्ने जस्ता प्रवृत्तिहरूले पर्वको वास्तविक भावना धमिल्याइरहेको बताउनुभयो।

उहाँको सन्देशमा भनिएको छ, “नेपाल बहुजातीय, बहुभाषिक, बहुसांस्कृतिक, बहुधार्मिक र भौगोलिक विविधता भएको देश हो। हाम्रा मौलिक संस्कृति र चाडपर्वले नेपाली समाजको पहिचान झल्काउँछन्। यी चाडपर्वको विशेषता आपसी एकता, सद्भाव र सहकार्य कायम राख्नु हो। त्यसैले, फागु पर्वलाई पनि मर्यादित, सभ्य र अनुशासित तरिकाले मनाउनु आवश्यक छ।”

काठमाडौँ: आज अपराह्नपछि कोशी, बाग्मती र गण्डकी प्रदेशका पहाडी भेगमा मेघगर्जन तथा चट्याङसहित वर्षा हुने सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।

पश्चिमी वायु र स्थानीय प्रभावको कारण वर्षा
महाशाखाका मौसमविद् गोविन्दकुमार झाले पश्चिमी वायुको आंशिक प्रभाव र स्थानीय वायुको समिश्रणले वर्षा गराइरहेको जानकारी दिनुभयो।

उहाँले भन्नुभयो, “बिहीबार कोशी, बाग्मती र गण्डकी प्रदेशका पहाडी भेगका केही स्थानमा तथा अन्य प्रदेशका पहाडी क्षेत्रमा छिटफुट वर्षा हुन सक्छ। प्रि-मनसुनी गतिविधि सक्रिय भएकाले अपराह्नतिर मेघगर्जन/चट्याङसहित वर्षा हुने र रातिको समयमा मौसम सामान्यतया सफा रहनेछ।”

बुधबारकाे वर्षा र मौसमी प्रभाव
बुधबार साँझ काठमाडौँ उपत्यकासहित देशका विभिन्न स्थानमा वर्षा भएको थियो। कोशी, बाग्मती र गण्डकी प्रदेशका पहाडी भेगमा हल्कादेखि मध्यम वर्षा भएको महाशाखाले जनाएको छ।

गण्डकी प्रदेशमा विकसित मौसमी प्रणाली कोशी प्रदेश हुँदै बाहिरिएकाले आज राति वर्षाको सम्भावना नरहेको मौसमविद्हरूको विश्लेषण छ।

मौसम परिवर्तनले हवाई उडान प्रभावित
विगत चार दिनदेखि काठमाडौँ उपत्यकासहित देशका विभिन्न स्थानमा मौसम बदली भएको थियो। यसले हवाई उडानसमेत प्रभावित बनाएको छ।

त्रिभुवन अन्तर्राष्ट्रिय विमानस्थलका अनुसार बुधबार अपराह्न कम्तीमा आधा दर्जन आन्तरिक तथा अन्तर्राष्ट्रिय उडानहरू प्रतिकूल मौसमका कारण ‘कम भिजिबिलिटी’ भई प्रभावित भएका थिए। केही उडानहरू आकाशमै ‘होल्ड’ गरिएका थिए।

काठमाडौँ: नेपाली कांग्रेसका सभापति एवं पूर्वप्रधानमन्त्री शेरबहादुर देउवाले फागु पर्व (होली) को अवसरमा शुभकामना व्यक्त गर्दै नेपाली समाजको जातीय, भाषिक र सांस्कृतिक विविधतालाई उत्सवका रंगहरूसँग तुलना गर्नुभएको छ।

उहाँले भन्नुभयो, “फागु पर्वमा खेलिने विविध रङहरू जस्तै, हाम्रो समाज पनि विविधतामा एकताले जोडिएको विशिष्ट पहिचान बोकेको छ।”

नेपालका हिमाल, पहाड र तराईका जिल्लाहरूमा हर्षोल्लासका साथ मनाइने फागु पर्व पारिवारिक स्नेह, सामाजिक सद्भाव र मेलमिलापको प्रतीक भएको देउवाले उल्लेख गर्नुभयो।

उहाँले शुभकामना सन्देशमा भन्नुभएको छ, “फागु पर्व हाम्रो धार्मिक तथा सांस्कृतिक धरोहर हो। अन्यायमाथि न्यायको विजयको शाश्वत सन्देश दिने यो पर्वलाई नेपाली समाजले हरेक वर्ष आत्मीयता, पारस्परिक एकता र उल्लासका साथ मनाउँदै आएको छ।”

वसन्त ऋतुको आगमनसँगै मेलमिलाप र सद्भावको सन्देश बोकेर आउने फागु पर्वले नेपाली समाजलाई अझ बढी एकताबद्ध बनाउने विश्वास व्यक्त गर्दै सभापति देउवाले शुभकामना दिनुभएको छ।

“यो पर्वले सबैको घर-परिवारमा सुख, शान्ति र समृद्धिको वातावरण सिर्जना गर्दै पारस्परिक एकता र सामाजिक सद्भाव अभिवृद्धि गरोस्,” उहाँको सन्देशमा उल्लेख छ।

काठमाडौँ: पछिल्लो सात कारोबारी दिन लगातार घटेको नेपाल स्टक एक्सचेञ्ज (नेप्से) परिसूचक आज भने दोहोरो अंकले वृद्धि भएको छ। आज नेप्से परिसूचक १७.२८ अङ्कले बढेर दुई हजार सात सय ३६.४८ को विन्दुमा पुगेको छ।

आज ३२३ कम्पनीका २ करोड २९ लाख ४१ हजार ३६५ कित्ता शेयर ७९ हजार २३६ पटक खरिदबिक्री हुँदा कुल कारोबार रकम रू ८ अर्ब २३ करोड ५२ लाख ६८ हजार ७५५ भएको छ।

आजको कारोबारमा विकास बैंक समूहले ०.३३ प्रतिशत र लघुवित्त समूहले ०.२७ प्रतिशत गिरावट देखाएको छ भने अन्य सबै समूहहरूको उपसूचकमा वृद्धि भएको छ। सबैभन्दा ठूलो वृद्धि लगानी समूहमा १.७६ प्रतिशत र अन्य समूहमा १.५७ प्रतिशत भएको छ।

बैंकिङ समूह ०.५३ प्रतिशत, वित्त समूह ०.०२ प्रतिशत, होटल तथा पर्यटन समूह ०.६४ प्रतिशत, जलविद्युत् समूह ०.८५ प्रतिशत, जीवन बीमा समूह ०.६४ प्रतिशत, उत्पादन तथा प्रशोधन समूह ०.१८ प्रतिशत, म्युचुअल फन्ड समूह ०.१० प्रतिशत, निर्जीवन बीमा समूह ०.४० प्रतिशत र व्यापार समूह ०.२१ प्रतिशतले बढेको छ।

पिपुल्स हाइड्रोपावर कम्पनी लिमिटेडको शेयर मूल्य सबैभन्दा धेरै ९.७९ प्रतिशतले वृद्धि भएको छ। साथै, विन नेपाल लघुवित्त वित्तीय संस्था लिमिटेडको शेयर मूल्यमा नकारात्मक सर्किट लागेको छ।

कारोबार रकम र कारोबार भएका शेयर संख्याका आधारमा आज सबैभन्दा धेरै माछापुच्छ्रे बैंक लिमिटेड प्रमोटर शेयर ८१ करोड ३६ लाख ५२ हजार १ सय बराबरको ८१ लाख ३६ हजार ५२१ कित्ता कारोबार भएको छ, जुन नेप्सेले जनाएको छ।

काठमाडौँ: प्रतिनिधि सभामा ‘आर्थिक तथा व्यावसायिक वातावरण सुधार र लगानी प्रवर्धन (संशोधन) विधेयक, २०८१’ पेस गरिएको छ। आजको बैठकमा उपप्रधानमन्त्री एवं अर्थमन्त्री विष्णु प्रसाद पौडेलले उक्त विधेयक पेस गर्नुभयो।

बैठकमा अर्थमन्त्री पौडेलले विरोध जनाएका सांसदहरूको जिज्ञासाको जवाफ दिँदै भने, “यो विधेयकले आर्थिक तथा व्यावसायिक वातावरण सुधार गर्न र लगानीको वृद्धि हेतु अनुकूल वातावरण सिर्जना गर्ने लक्ष्य राख्दछ।”

बैठकले उक्त विधेयक पेस गर्न अनुमति माग्ने प्रस्तावमाथि सांसदहरू प्रभु साह, शेर बहादुर कुँवर, प्रेम सुवाल, रणेन्द्र बराली, चित्र बहादुर केसी र हित बहादुर तामाङद्वारा गरिएको विरोधको सूचनालाई बहुमतले अस्वीकृत गरेको थियो।

काठमाडौं: नेपाल प्रहरीले आउँदो चैत ४ गतेदेखि नयाँ ३१औं महानिरीक्षक (आईजीपी) पाउने भएको छ। ३० वर्षे सेवा अवधिको नियम कायमै रहेकाले हालका प्रहरी महानिरीक्षक (आईजीपी) बसन्त कुँवर अनिवार्य अवकाशमा जाँदैछन्। कुँवरको अवकाशसँगै प्रहरी नेतृत्वमा नयाँ नेतृत्व चयनको दौडधुप तीव्र बनेको छ।

नयाँ आईजीपीको नियुक्तिका लागि सरकारले मन्त्रिपरिषद्को बैठकमार्फत चैत ४ गतेभित्र निर्णय गर्नेछ। नेतृत्वका लागि प्रहरी अतिरिक्त महानिरीक्षक (एआइजी) दीपक थापा, सुदीप गिरी र टेकबहादुर तामाङ मुख्य दावेदारका रूपमा अघि आएका छन्। यी तीन जना मध्येको एक जनाले नक्सालस्थित प्रहरी प्रधान कार्यालयको ‘हट सिट’ सम्हाल्ने निश्चित भएको छ।

प्रहरी संगठनभित्र नयाँ नेतृत्व चयनसँगै पुरानालाई विदाई र नयाँलाई स्वागतको तयारी चलिरहेको छ। आइजीपी सचिवालय र निवासमा सहयोगी तथा उच्च अधिकारीहरूको आवत-जावत बढेको छ। सम्भावित तीन दावेदारहरू सक्रियताका साथ दौडधुपमा रहेका छन्, तर एकले अर्कालाई प्रत्यक्ष रूपमा निषेध गर्ने रणनीति भने नअपनाएको बताइन्छ।

आईजीपीको नेतृत्व परिवर्तनसँगै संगठनमा ठूलो फेरबदल हुने देखिन्छ। नयाँ आईजीपी चयन भएसँगै हाल कार्यरत ६ जना एआइजी पद रिक्त हुनेछन्। ती रिक्त पदहरूमा बढुवाका लागि तीव्र शक्ति संघर्ष सुरु भइसकेको छ। ३२औं र ३३औं आईजीपीको सम्भावित उम्मेदवार बन्ने प्रतिस्पर्धा भएकाले एआइजीहरू उच्च स्तरमा लबिङ गरिरहेका छन्।

हालसम्मको राजनीतिक तथा प्रशासनिक समीकरणलाई हेर्दा दीपक थापा आईजीपीको दौडमा अगाडि देखिएका छन्। तर, अन्तिम निर्णय मन्त्रिपरिषद्को बैठकले गर्ने भएकाले अन्तिम घडीमा कुनै नयाँ समीकरण बन्ने सम्भावना पनि उत्तिकै छ।