काठमाडौँ: यो साता सङ्घीय संसद्को बैठक नियमित रूपमा सञ्चालन भयो। प्रतिनिधिसभाका चार र राष्ट्रियसभाका तीन बैठक बस्दा महत्त्वपूर्ण छलफल भए।

प्रधानमन्त्रीसँग प्रत्यक्ष प्रश्नोत्तरदेखि दलितमाथिको ज्यादती, विदेशी मुद्रा बरामदजस्ता विषय प्राथमिकतामा रहे। पूर्वविशिष्ट पदाधिकारीलाई आजीवन सेवा सुविधा दिने सरकारको तयारीले विवाद सिर्जना गर्‍यो।

संसदीय समितिहरू पनि सक्रिय रहे। आर्थिक तथा लगानी सुधारका विधेयकहरू पारित भए। विपक्षीले यी विधेयकहरूले आर्थिक सुधार गर्न नसक्ने दाबी गरे।

सिरहामा दलितको घरमा डोजर लगाइएको घटनाले संसद्मा तीव्र प्रतिक्रिया पायो। सांसदहरूले जातीय विभेदको निन्दा गर्दै संसदीय छानबिनको माग गरे।

नियमावली बाझिएको भन्दै राष्ट्रियसभा शुक्रबार स्थगित भयो। चैत १० गते बैठक पुनः बस्नेछ।

काठमाडौँ: नेपाल राष्ट्र बैंकले आजका लागि विदेशी मुद्राको विनिमय दर निर्धारण गरेको छ। राष्ट्र बैंकका अनुसार अमेरिकी डलर एकको खरिद दर १३७ रूपैयाँ २६ पैसा तथा बिक्री दर १३७ रूपैयाँ ८६ पैसा कायम गरिएको छ।

अन्य प्रमुख मुद्राहरूमा युरोपियन युरो एकको खरिद दर १४८ रूपैयाँ ८० पैसा र बिक्री दर १४९ रूपैयाँ ४५ पैसा, युके पाउन्ड स्टर्लिङ एकको खरिद दर १७७ रूपैयाँ ६७ पैसा र बिक्री दर १७८ रूपैयाँ ४५ पैसा तथा स्वीस फ्र्याङ्क एकको खरिद दर १५५ रूपैयाँ ७८ पैसा र बिक्री दर १५६ रूपैयाँ ४६ पैसा तोकिएको छ।

त्यस्तै, अष्ट्रेलियन डलर एकको खरिद दर ८६ रूपैयाँ ३६ पैसा र बिक्री दर ८६ रूपैयाँ ७३ पैसा, क्यानेडियन डलर एकको खरिद दर ९५ रूपैयाँ ७३ पैसा र बिक्री दर ९६ रूपैयाँ १५ पैसा तथा सिङ्गापुर डलर एकको खरिद दर १०२ रूपैयाँ ८८ पैसा र बिक्री दर १०३ रूपैयाँ ३३ पैसा निर्धारण गरिएको छ।

एसियाली मुद्राहरूमा जापानी येन १० को खरिद दर ९ रूपैयाँ २१ पैसा र बिक्री दर ९ रूपैयाँ २५ पैसा, चिनियाँ युआन एकको खरिद दर १८ रूपैयाँ ९४ पैसा र बिक्री दर १९ रूपैयाँ ०२ पैसा, साउदी अरेबियन रियाल एकको खरिद दर ३६ रूपैयाँ ५९ पैसा र बिक्री दर ३६ रूपैयाँ ७५ पैसा तोकिएको छ।

अन्य मुद्राहरूमा कतारी रियाल एकको खरिद दर ३७ रूपैयाँ ६५ पैसा र बिक्री दर ३७ रूपैयाँ ८२ पैसा, थाई भाट एकको खरिद दर ४ रूपैयाँ ०५ पैसा र बिक्री दर ४ रूपैयाँ ०७ पैसा, युएई दिराम एकको खरिद दर ३७ रूपैयाँ ३७ पैसा र बिक्री दर ३७ रूपैयाँ ५३ पैसा तथा मलेसियन रिङ्गेट एकको खरिद दर ३१ रूपैयाँ ०५ पैसा र बिक्री दर ३१ रूपैयाँ १८ पैसा कायम गरिएको छ।

त्यस्तै, साउथ कोरियन वन १०० को खरिद दर ९ रूपैयाँ ३८ पैसा र बिक्री दर ९ रूपैयाँ ४२ पैसा, स्वीडिस क्रोनर एकको खरिद दर १३ रूपैयाँ ६० पैसा र बिक्री दर १३ रूपैयाँ ६६ पैसा तथा डेनिस क्रोनर एकको खरिद दर १९ रूपैयाँ ९५ पैसा र बिक्री दर २० रूपैयाँ ०३ पैसा निर्धारण गरिएको छ।

राष्ट्र बैंकका अनुसार हङकङ डलर एकको खरिद दर १७ रूपैयाँ ६६ पैसा र बिक्री दर १७ रूपैयाँ ७३ पैसा, कुवेती दिनार एकको खरिद दर ४४५ रूपैयाँ ४५ पैसा र बिक्री दर ४४७ रूपैयाँ ३९ पैसा, बहराइन दिनार एकको खरिद दर ३६४ रूपैयाँ १२ पैसा र बिक्री दर ३६५ रूपैयाँ ७१ पैसा तथा ओमनी रियाल एकको खरिद दर ३५६ रूपैयाँ ५९ पैसा र बिक्री दर ३५८ रूपैयाँ १५ पैसा तोकिएको छ।

भारतीय रूपैयाँ १०० को विनिमय दर भने १६० रूपैयाँ खरिद दर तथा १६० रूपैयाँ १५ पैसा बिक्री दर तोकिएको छ।

राष्ट्र बैंकले आवश्यकतानुसार विनिमय दरमा परिमार्जन गर्न सकिने उल्लेख गरेको छ। वाणिज्य बैंकहरूले निर्धारण गर्ने विनिमय दर केही फरक हुन सक्ने तथा अद्यावधिक दर राष्ट्र बैंकको वेबसाइटमा उपलब्ध रहने जानकारी दिइएको छ।

मनाङ: चीनसँगको सीमा क्षेत्रमा सुरक्षा सुदृढ गर्न मनाङ जिल्लाको नार्पाभूमि गाउँपालिकामा बोर्डर आउट पोस्ट (बीओपी) स्थापना गरिने भएको छ।

जिल्ला प्रशासन कार्यालय मनाङका अनुसार नार्पाभूमि गाउँपालिका-४ फू गाउँमा करिब चार हजार मिटर उचाइमा बीओपी स्थापनाको तयारी गरिएको छ। प्रमुख जिल्ला अधिकारी मातृका आचार्यले सीमा सुरक्षा तथा निगरानीलाई प्रभावकारी बनाउन बीओपी आवश्यक रहेको बताउनुभयो।

बीओपी स्थापनाका लागि २० रोपनी सरकारी जग्गा सशस्त्र प्रहरी बललाई दीर्घकालीन भाडामा प्रदान गरिएको छ। प्रजिअ आचार्यका अनुसार आवश्यकता अनुसार सशस्त्र प्रहरीले उक्त जग्गा उपयोग गर्न सक्नेछ।

बिहीबार एक समारोहका बीच सो जग्गाको भाडा सम्झौताको प्रमाणपत्र सशस्त्र प्रहरी बल नं. ३२ का गुल्मपति सशस्त्र प्रहरी नायब उपरीक्षक हिराबहादुर जिसीलाई हस्तान्तरण गरिएको छ।

मनाङको विकट फू क्षेत्र हालसम्म सडक सञ्जालबाट जोडिएको छैन। बीओपी स्थापना भएपछि सीमा सुरक्षा, अन्तरदेशीय अपराध नियन्त्रण तथा निगरानी कार्य प्रभावकारी हुने अपेक्षा गरिएको छ। साथै, शान्ति सुरक्षा, विपद् व्यवस्थापन तथा पर्यटक उद्धारमा पनि सहजता आउने प्रजिअ आचार्यले बताउनुभयो।

बीओपीमा प्रहरी निरीक्षकसहित ३५ जना सशस्त्र प्रहरी परिचालन गरिनेछ। नार्पाभूमि गाउँपालिका चीनको स्वशासित क्षेत्र तिब्बतसँग जोडिएको छ। सदरमुकाम चामेबाट फू गाउँ पुग्न दुई दिन लाग्छ।

काठमाडौँ: भारतीय राजदूतावासले शुक्रबार साँझ विशेष समारोहका बीच ६०औँ भारतीय प्राविधिक तथा आर्थिक सहकार्य (आइटेक) दिवस मनायो।

समारोहमा परराष्ट्रमन्त्री डा. आरजु राणा देउवाले भारतमा अध्ययन गर्दाको अनुभव स्मरण गर्दै विकास र शिक्षाका क्षेत्रमा भारत सरकारको योगदानप्रति कृतज्ञता व्यक्त गर्नुभयो। नेपालका लागि भारतीय राजदूत नवीन श्रीवास्तवले आइटेक कार्यक्रमलाई नेपाल सरकारका प्राथमिकताअनुसार थप अनुकूल बनाउने प्रतिबद्धता जनाउनुभयो।

समारोहमा महान्यायाधिवक्ता रमेश बडाल, राष्ट्रिय सुरक्षा परिषद् सचिवालयका सहायक संयोजक तथा आइटेक पूर्वविद्यार्थी सहायक रथी पवन खत्री, र सशस्त्र प्रहरी उपरीक्षक दयाराम शर्माले आइटेक कार्यक्रमसँग सम्बन्धित आफ्ना अनुभव साझा गर्नुभयो।

कार्यक्रममा भारतीय सांस्कृतिक सम्बन्ध परिषद्को सहयोगमा प्रख्यात कलाकार कुलेश्वरकुमार ठाकुरको नेतृत्वमा ‘यज्ञ’ सांस्कृतिक समूहले मनमोहक मयूरभञ्ज छाऊ नृत्य प्रस्तुत गर्‍यो। साथै, नेपालको कान्त दब दब ब्यान्डले वाद्य लोक फ्युजन र ज्याज संगीत प्रस्तुत गर्‍यो।

समारोहमा सांसद, वरिष्ठ सरकारी अधिकारी, आइटेकका पूर्वविद्यार्थी, तथा भारतीय शैक्षिक संस्थानका नेपाली पूर्वविद्यार्थी उपस्थित थिए।

आइटेक सन् १९६४ मा स्थापना भएको अन्तर्राष्ट्रिय क्षमता निर्माण कार्यक्रम हो, जसअन्तर्गत हालसम्म १६० भन्दा बढी देशका दुई लाखभन्दा बढी अधिकारीलाई तालिम प्रदान गरिएको छ।

सन् २०२४–२५ मा नेपालका ५१० जना विभिन्न पेशाकर्मीलाई भारतका प्रमुख संस्थानहरूमा विविध कोर्सहरूमा तालिम दिइएको छ। यस वर्ष नेपालका चिकित्सक (५०), सरकारी वकिल (३०), राष्ट्रिय न्यायिक प्रतिष्ठानका सदस्य (१५), नेपाल प्रहरी (१४३), सशस्त्र प्रहरी बल (८०), गृह मन्त्रालय (२४), खानेपानी मन्त्रालय (४०) का लागि १८ अनुकूलित कोर्सको व्यवस्था गरिएको छ। विगत १५ वर्षमा नेपालबाट ३,००० भन्दा बढी अधिकारी आइटेक अन्तर्गत तालिम प्राप्त गरिसकेका छन्।

काठमाडौं: उद्योग, वाणिज्य तथा आपूर्तिमन्त्री दामोदर भण्डारीले रोजगारी सृजना गर्दै अर्थतन्त्र सुधार गर्न तीव्र औद्योगीकरण अपरिहार्य रहेको बताएका छन्।

नेपाल उद्योग तथा व्यवसायी महासंघको तेस्रो राष्ट्रिय महाधिवेशनलाई सम्बोधन गर्दै मन्त्री भण्डारीले औद्योगिक क्षेत्रको सुधार गर्दै उद्योगी व्यवसायीलाई सहज रूपमा व्यवसाय सञ्चालन गर्न अनुकूल वातावरण तयार पार्नु सरकारको पहिलो प्राथमिकता रहेको उल्लेख गरे।

उनका अनुसार आर्थिक तथा सामाजिक विकासका लागि उद्योग र व्यवसाय अत्यन्त महत्वपूर्ण क्षेत्र हुन्। त्यसैले औद्योगिक विकासबिना समृद्ध अर्थतन्त्रको परिकल्पना गर्न नसकिने उनले बताए। समग्र औद्योगिक क्षेत्रको प्रवर्द्धन तथा नीतिगत सुधारमार्फत ‘समृद्ध नेपाल, सुखी नेपाली’ को राष्ट्रिय आकांक्षा पूरा गर्ने दिशामा सरकार अघि बढिरहेको उनले प्रस्ट्याए।

सरकारले स्वदेशी उत्पादन र उपभोग प्रवर्द्धन गर्न ‘मेक इन नेपाल’ अभियान सञ्चालन गरिरहेको जानकारी गराउँदै मन्त्री भण्डारीले ‘सार्वजनिक निकायमा स्वदेशी वस्तुको उपयोगसम्बन्धी निर्देशिका २०८१’ कार्यान्वयनमा रहेको उल्लेख गरे। उनले स्वदेशी कच्चा पदार्थमा आधारित उद्योगलाई प्रोत्साहन गर्दै आयात प्रतिस्थापन गर्ने नीति अबलम्बन गरिएको जानकारी दिए।

उनले औद्योगिक तथा व्यावसायिक वातावरण सुधार गर्न संघीय सरकारले आवश्यक कानुनी तथा नीतिगत सुधारसहित अध्यादेश जारी गरिसकेको बताउँदै यसले निजी क्षेत्रको आत्मविश्वासलाई बढाएको दाबी गरे।

काठमाडौं । इजरायली प्रधानमन्त्री बेन्जामिन नेतान्याहूले देशको सुरक्षा सेवा शिन बेट का प्रमुख रोनेन बारलाई बर्खास्त गरेका छन्। नेतान्याहूले अक्टोबर ७, २०२३ मा हमासको आक्रमणको पूर्वानुमान गर्न असफल भएको भन्दै उनलाई पदमुक्त गरेका हुन्।

बिहीबार साँझ बसेको मन्त्रिपरिषद् बैठकले रोनेन बारलाई अवकाश लिनुअघि बर्खास्त गर्ने औपचारिक निर्णय अनुमोदन गरेको छ।

सन् २०२१ मा पाँच वर्षे कार्यकालका लागि शिन बेट प्रमुख नियुक्त भएका बारलाई गत आइतबार नेतान्याहूले एक भिडियो वक्तव्य मार्फत बर्खास्त गर्ने घोषणा गरेका थिए।

प्रधानमन्त्री नेतान्याहूले “निरन्तर अविश्वास” बढ्दै गएको भन्दै बारलाई हटाउने निर्णय गरेको बताएका छन्।

यो कदमसँगै इजरायलभित्र चर्को असन्तोष उत्पन्न भएको छ। यरुशलममा सरकारविरोधी प्रदर्शनहरू तीव्र बनेका छन्, जसमा हजारौं प्रदर्शनकारी सहभागी भएका छन्।

त्यस्तै, नेतान्याहूको यो निर्णयसँगै इजरायलको गाजामा जारी सैन्य कारबाहीको विरोधमा थप प्रदर्शनहरू भएका छन्।