काठमाडौं: नेपाली कांग्रेसले पटक–पटक समय दिँदा पनि महाधिवेशन गर्न नसकेका चार भातृसङ्गठन भङ्ग गर्ने तयारी गरेको छ। हालसम्मको अवस्था हेर्दा महाधिवेशन सम्भव नदेखिएको भन्दै केन्द्रीय कार्यसमिति बैठकबाट ती सङ्गठन भङ्ग गर्ने निर्णय गर्न लागेको हो।
कांग्रेसले भातृसङ्गठनबारे निर्णय गर्न वैशाख १७ गतेका लागि केन्द्रीय समिति बैठक बोलाएको थियो, तर संघीय संसदको बैठकका कारण बैठक अनिश्चितकालका लागि स्थगित गरिएको छ। महामन्त्री गगन थापाका अनुसार, म्याद गुज्रिएका भातृसङ्गठनका तदर्थ समितिबारे निर्णय गर्न केन्द्रीय समिति वा कार्यसम्पादन समिति बैठक बोलाइनेछ।
गत चैत मसान्तमा सात भातृसङ्गठनको म्याद सकिएको थियो। वैशाख पहिलो साता बसेको पदाधिकारी बैठकमा महामन्त्रीद्वय थापा र विश्वप्रकाश शर्माले तदर्थ समिति र निर्देशन समितिलाई महाधिवेशन गर्न सक्ने आधारसहितको प्रस्ताव पेश गर्न निर्देशन दिएका थिए।
नेपाल किसान महासंघ, लोकतान्त्रिक खेलकुद संघ र नेपाल थारू संघले महाधिवेशन गर्न सक्ने आधारसहित प्रतिवेदन बुझाएपछि ती सङ्गठनलाई समय दिइने निष्कर्षमा सभापतिसहित नेताहरू पुगेका छन्।
तर, मुख्य भातृसङ्गठनहरू — नेपाल विद्यार्थी संघ, तरुण दल, महिला संघ र नेपाल दलित संघमा भने गम्भीर विवाद देखिएको छ।
नेविसंघले निर्देशन समितिलाई समन्वय नगरी प्रतिवेदन बुझाएको र तदर्थ समिति तथा निर्देशन समिति संयोजकहरूबीच मतभेद रहेको स्रोतले बताएको छ। शेर्पाको क्रियाकलापप्रति निर्देशन समिति सदस्य प्रतिमा गौतम असन्तुष्ट रहेको जनाइएको छ।
शेखर कोइराला समूहले तदर्थ समितिमा एकलौटी गरिएको भन्दै समानान्तर रूपमा प्रतिनिधि खटाएपछि नेविसंघको महाधिवेशन प्रक्रिया अवरुद्ध भएको छ। स्वतन्त्र विद्यार्थी युनियनको निर्वाचनमा एकलौटी टिकट वितरण गरिएको भन्दै नेताहरू असन्तुष्ट छन्।
दलित संघमा पनि अध्यक्ष लोकबहादुर विश्वकर्मा र निर्देशन समिति संयोजक जीवन परियारबीच गुटगत विवादका कारण महाधिवेशन सम्भव नदेखिएको बताइएको छ।
तरुण दलमा केही जिल्लामा वडा अधिवेशन भएको भए पनि महाधिवेशन गर्न सक्ने स्पष्ट आधार प्रतिवेदनमा उल्लेख नभएको नेताहरू बताउँछन्। महिला संघमा तदर्थ समिति संयोजक उषा राउत मिश्रको एकलौटीपनप्रति असन्तुष्टि जनाउँदै २० केन्द्रीय सदस्यले सामूहिक राजीनामा दिएका छन्।
तरुण दल र नेविसंघमा विधानविपरीत तदर्थ समिति बनाएको भन्दै आलोचना भएको छ। नेविसंघमा ७५१ र तरुण दलमा ४५२ सदस्यीय तदर्थ समिति छन्।
कांग्रेस सभापति शेरबहादुर देउवाले असोज १६ मा नेविसंघ, तरुण दल र महिला संघको महाधिवेशन गर्न निर्देशन समिति गठन गरेका थिए। मंसिर २६ मा थप सात भातृसङ्गठनको महाधिवेशन गराउन निर्देशन समिति बनाइएको थियो। तीमध्ये प्रजातान्त्रिक सेनानी संघ, लोकतान्त्रिक अपाङ्ग संघ र भूतपूर्व सैनिक संघले महाधिवेशन सम्पन्न गरिसकेका छन्। बाँकी संस्थाहरूले भने निर्देशानुसार महाधिवेशन गर्न सकेका छैनन्।
पार्टीको फागुन १ गतेको पदाधिकारी बैठकमा सभापति देउवाले महाधिवेशन गर्न चैत मसान्तसम्मको अन्तिम समय दिएका थिए। तर, विवादका कारण महाधिवेशन हुन नसकेपछि अहिले तदर्थ समितिका म्याद गुज्रिसकेका छन्।
