काठमाडौं । नेपालमा हरेक वर्ष हजारौँ बिरामीलाई रगत आवश्यक पर्ने भए पनि पर्याप्त रक्तदाता नहुँदा धेरैले समयमै रगत पाउन कठिनाइ भोग्नुपरेको छ। यही समस्या समाधानका लागि नियमित रक्तदान संस्कृतिको विकास आवश्यक रहेको भन्दै लायन्स क्लब इन्टरनेसनल डिस्ट्रिक्ट ३२५ एचका गभर्नर उद्वव सिलवालले युवाहरूलाई रक्तदान अभियानमा सक्रिय रूपमा सहभागी हुन आग्रह गरेका छन्।

हालसम्म ९७ पटक रक्तदान गरिसकेका सिलवालले ३६ वर्षअघि सुरु गरेको आफ्नो रक्तदान यात्रालाई निरन्तरता दिँदै आएका छन्। नेपाल न्यूज बैंकसँगको कुराकानीमा उनले रक्तदानसम्बन्धी समाजमा रहेका भ्रम, रगत अभावका कारण र नियमित रक्तदानको महत्वबारे आफ्ना अनुभव साझा गरे।

उनका अनुसार रक्तदान यात्रा २०४७ सालमा विद्यार्थी जीवनबाट सुरु भएको थियो। नेपाल विद्यार्थी संघले महामानव विश्वेश्वरप्रसाद कोइरालाको जन्मजयन्तीको अवसरमा आयोजना गरेको रक्तदान कार्यक्रममा उनले पहिलो पटक रक्तदान गरेका थिए। त्यसयता उनी निरन्तर रूपमा रक्तदान अभियानमा सक्रिय छन्।

सिलवालले सुरुवाती दिनमा आफूमा पनि रक्तदान गरेपछि मानिस कमजोर हुन्छ भन्ने भ्रम रहेको स्वीकार गरे। तर पहिलो पटक रक्तदान गरेपछि त्यो सोच पूर्ण रूपमा गलत भएको महसुस गरेको उनले बताए।

उनले रक्तदान एक सुरक्षित र सामान्य प्रक्रिया भएको उल्लेख गर्दै सुई लगाउँदा हुने सामान्य पीडाबाहेक अन्य कुनै समस्या नहुने बताए। सामान्य स्वास्थ्य भएको व्यक्तिले सहज रूपमा रक्तदान गर्न सक्ने र यसले शरीरलाई कुनै हानि नगर्ने उनको भनाइ छ।

“शरीरका रक्तकोषहरू निश्चित समयपछि स्वाभाविक रूपमा नष्ट हुन्छन्। ती कोषहरू खेर जान दिनुभन्दा कसैको जीवन बचाउन प्रयोग गर्नु धेरै राम्रो हो,” उनले भने।

नेपालमा रक्तदानसम्बन्धी जनचेतनामा उल्लेखनीय सुधार आएको भए पनि नयाँ रक्तदातालाई अभियानमा जोड्न अझै चुनौती रहेको उनले बताए। उनका अनुसार एक पटक रक्तदान गरिसकेका व्यक्ति पुनः रक्तदान गर्न सहजै तयार हुने भए पनि पहिलो पटक रक्तदान केन्द्रसम्म ल्याउन प्रेरित गर्न कठिन हुन्छ।

युवाहरूलाई लक्षित गर्दै उनले १८ वर्ष पुगेपछि रक्तदान सुरु गर्ने संस्कार विकास गर्नुपर्नेमा जोड दिए। आफ्नै छोरालाई पनि १८ वर्ष पुगेको दिन पहिलो रक्तदान गराएको उल्लेख गर्दै उनले जन्मदिनलाई रक्तदानसँग जोड्न सकिने सुझाव दिए।

रक्तदानले स्वास्थ्यमा सकारात्मक प्रभाव पार्ने अनुभव सुनाउँदै उनले आफू ५५ वर्षको भए पनि नियमित रूपमा प्रत्येक तीन महिनामा रक्तदान गर्दै आएको बताए। रक्तदानले मानिसलाई कमजोर बनाउँछ भन्ने धारणा गलत भएको उनको भनाइ छ।

सिलवालका अनुसार आधुनिक प्रविधिको विकाससँगै एउटा युनिट रगतलाई विभिन्न अवयवमा विभाजन गरेर तीन जनासम्म बिरामीको उपचारमा प्रयोग गर्न सकिन्छ। यसले एउटा रक्तदानले तीन जनासम्मको जीवन बचाउन सक्ने सम्भावना बढाएको छ।

नेपालमा अझै पनि रगतको अभाव हुनुको प्रमुख कारण माग र आपूर्तिबीचको असन्तुलन रहेको उनले बताए। दुर्घटना, शल्यक्रिया, विभिन्न रोगको उपचार तथा अन्य स्वास्थ्य सेवाका कारण रगतको माग निरन्तर बढिरहे पनि त्यसअनुसार रक्तदान हुन नसकेको उनको भनाइ छ।

दशैँ, तिहार, विश्वकपजस्ता विशेष अवसरमा मानिसहरू व्यक्तिगत गतिविधिमा व्यस्त हुँदा रक्तदान घट्ने तर अस्पतालहरूमा रगतको आवश्यकता भने कायम रहने भएकाले यस्ता समयमा अभाव झन् चर्किने गरेको उनले बताए।

रक्तदानलाई कारोबार नभई सेवाको रूपमा बुझ्नुपर्नेमा जोड दिँदै उनले आवश्यक पर्दा आफूले रक्तदान गरेको आधारमा रगत पाउनैपर्छ भन्ने मानसिकता त्याग्न आग्रह गरे।

लायन्स क्लबको पहलमा सञ्चालन भइरहेको रक्तसञ्चार तथा अनुसन्धान केन्द्रबारे चर्चा गर्दै उनले सरकारले नेपाल रेडक्रस सोसाइटीलाई उपलब्ध गराउने सुविधा अन्य रक्तसञ्चार संस्थाहरूलाई पनि समान रूपमा उपलब्ध गराउनुपर्ने माग गरे।

रक्तदान अभियानमा स्वयंसेवकहरूको महत्वपूर्ण योगदान रहेको उल्लेख गर्दै उनले भविष्यमा अझ धेरै युवाहरू अभियानमा जोडिने विश्वास व्यक्त गरे।

विश्व रक्तदाता दिवसको अवसरमा उनले सबै नागरिकलाई नियमित रक्तदान गर्न आग्रह गर्दै पुरुषहरूले प्रत्येक तीन महिनामा र महिलाहरूले प्रत्येक चार महिनामा रक्तदान गर्न सक्ने बताए।

“हाम्रो शरीरमा नष्ट भएर जाने रक्तकोषलाई कसैको जीवन बचाउन प्रयोग गर्न सकिन्छ। त्यसैले रक्तदान मानवताको सबैभन्दा ठूलो सेवामध्ये एक हो,” उनले भने, “नियमित रक्तदान गर्ने बानी बसालौँ र कसैको जीवन बचाउने अभियानमा सहभागी बनौँ।”

काठमाडौं । नेपालमा हाल उपल्लो वायुमण्डलमा सक्रिय पश्चिमी न्यून चापीय रेखासँगै स्थानीय तथा पूर्वीय वायुको आंशिक प्रभाव रहेको छ। यसका कारण देशका विभिन्न क्षेत्रमा बदली, वर्षा र हिमपातको अवस्था देखिएको छ।

हाल कोशी, बागमती, गण्डकी, लुम्बिनी, कर्णाली तथा सुदूरपश्चिम प्रदेशका हिमाली र पहाडी क्षेत्रमा सामान्यदेखि पूर्ण बदली रहेको छ। मधेश प्रदेशमा आंशिक बदली छ भने सुदूरपश्चिमको तराई क्षेत्रमा मौसम मुख्यतः सफा रहेको छ। कोशी, बागमती र गण्डकी प्रदेशका केही स्थानमा हल्कादेखि मध्यम वर्षा भइरहेको छ।

मौसम पूर्वानुमान महाशाखाका अनुसार आज दिउँसो कोशी प्रदेशसहित देशका हिमाली क्षेत्रमा सामान्य बदली रहनेछ। बाँकी पहाडी भूभाग तथा मधेश, बागमती र गण्डकी प्रदेशका तराई क्षेत्रमा आंशिक बदली रहने सम्भावना छ भने अन्य तराई क्षेत्रमा मौसम मुख्यतः सफा रहनेछ।

कोशी प्रदेशका केही स्थान तथा देशका हिमाली र पहाडी भूभागका थोरै स्थानमा मेघगर्जन र चट्याङसहित मध्यम वर्षा हुने सम्भावना रहेको छ। उच्च हिमाली क्षेत्रमा हिमपातको समेत सम्भावना छ। बागमती र गण्डकी प्रदेशका तराईका एक–दुई स्थान तथा मधेश प्रदेशका केही क्षेत्रमा पनि मेघगर्जन र चट्याङसहित वर्षा हुन सक्ने महाशाखाले जनाएको छ।

आज राति कोशी, मधेश, बागमती र गण्डकी प्रदेशका साथै देशका हिमाली तथा पहाडी क्षेत्रमा आंशिक बदली रहनेछ। अन्य क्षेत्रमा मौसम मुख्यतः सफा रहने अनुमान गरिएको छ।

रातिको समयमा कोशी प्रदेशका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने सम्भावना छ। बागमती र गण्डकी प्रदेशका एक–दुई स्थानमा हल्का वर्षा तथा हिमपातको सम्भावना रहेको छ भने मधेश प्रदेशका केही स्थानमा पनि मेघगर्जन र चट्याङसहित वर्षा हुन सक्ने मौसमविद्ले बताएका छन्।

मौसमविद्ले मेघगर्जन, चट्याङ तथा हिमपातको सम्भावना रहेका क्षेत्रमा आवश्यक सतर्कता अपनाउन सर्वसाधारणलाई आग्रह गरेका छन्।

एजेन्सी । मध्यपूर्व क्षेत्रमा जारी तनाव र द्वन्द्वका कारण विश्वव्यापी आपूर्ति शृङ्खलामा असर परिरहेको बेला यसको प्रभाव भारतको कृषि क्षेत्रमा पनि देखिन थालेको छ। मलको आपूर्ति घट्नु, इन्धनको मूल्य बढ्नु तथा उत्पादन लागत वृद्धि हुनु किसानका प्रमुख चिन्ताका विषय बनेका छन्।

भारतीय किसानहरूले विशेषगरी युरिया र डायमोनियम फस्फेट (डीएपी) जस्ता अत्यावश्यक मलको अभाव भोग्नुपरेको बताएका छन्। कतिपय क्षेत्रमा मल वितरणको कोटा घटाइएकाले किसानहरू आवश्यक परिमाणमा मल प्राप्त गर्न नसकेको गुनासो गरेका छन्।

कृषि क्षेत्रसँग सम्बन्धित व्यवसायीहरूका अनुसार आपूर्ति शृङ्खलामा आएको अवरोधका कारण मल तथा कीटनाशक उत्पादनका लागि आवश्यक कच्चा पदार्थको आयात प्रभावित भएको छ। यसको प्रत्यक्ष असर बजार मूल्यमा देखिएको छ भने केही कीटनाशकको मूल्य २० देखि २५ प्रतिशतसम्म बढेको बताइएको छ।

कृषि विश्लेषकहरूका अनुसार अन्तर्राष्ट्रिय बजारमा पेट्रोलियम पदार्थ र प्राकृतिक ग्यासको मूल्य बढ्दा कृषि उत्पादन लागत पनि उल्लेखनीय रूपमा बढेको छ। यसले ट्र्याक्टर, सिँचाइ उपकरण तथा अन्य कृषि मेसिनरी सञ्चालन खर्चमा वृद्धि गरेको छ।

यातायात खर्च बढेसँगै कृषि उपज बजारसम्म पुर्‍याउने लागत पनि बढिरहेको छ। यसले किसानको नाफामा असर पार्नुका साथै कृषि उत्पादनको अन्तिम मूल्यसमेत वृद्धि हुन सक्ने अनुमान गरिएको छ।

विशेषज्ञहरूका अनुसार मलको अभाव लामो समयसम्म कायम रहेमा बाली उत्पादनमा कमी आउन सक्छ। उत्पादन घटेपछि बजारमा खाद्यान्नको आपूर्ति कम हुने र मूल्यवृद्धिको दबाब बढ्ने सम्भावना रहेको उनीहरूको भनाइ छ।

कृषि क्षेत्रका सरोकारवालाहरूले सरकारलाई मलको नियमित आपूर्ति सुनिश्चित गर्न, कृषि सामग्रीको मूल्य नियन्त्रण गर्न तथा किसानलाई आवश्यक सहुलियत उपलब्ध गराउन आग्रह गरेका छन्।

एजेन्सी । फिफा विश्वकप २०२६ मा खेल सञ्चालन, निर्णय प्रक्रिया र प्रतियोगिताको व्यवस्थापनलाई थप प्रभावकारी बनाउन अत्याधुनिक कृत्रिम बुद्धिमत्ता (एआई) प्रविधिको प्रयोग गरिएको छ।

विश्वव्यापी प्रविधि कम्पनी Lenovo ले फिफासँगको सहकार्यमा विश्वकपका लागि विभिन्न एआई–आधारित समाधानहरू उपलब्ध गराएको जनाएको छ। अमेरिकाको फ्लोरिडास्थित मियामीमा रहेको प्राविधिक कमाण्ड तथा प्रतियोगिता सञ्चालन केन्द्रबाट उत्तर अमेरिकाभरिका सयौं आधिकारिक स्थलहरूको डेटा समन्वय भइरहेको छ।

प्रतियोगिताका क्रममा सामाजिक सञ्जाल गतिविधि, मौसमको अवस्था तथा खेलसँग सम्बन्धित अन्य महत्वपूर्ण सूचनाहरूलाई एआई प्रणालीमार्फत विश्लेषण गरिँदैछ। यसका लागि फिफाले विशेष ‘इन्टेलिजेन्ट कमाण्ड सेन्टर’ समेत सञ्चालनमा ल्याएको छ।

एआई प्रविधिको सहायताले रेफ्रीको शरीरमा जडान गरिएका क्यामेराबाट प्राप्त दृश्यहरूलाई थप स्पष्ट र स्थिर बनाउने व्यवस्था गरिएको छ। यसले दर्शकहरूलाई रेफ्रीको दृष्टिकोणबाट खेल हेर्ने अनुभव प्रदान गर्ने अपेक्षा गरिएको छ।

त्यसैगरी, भिडियो सहायक रेफ्री (VAR) प्रणालीलाई अझ प्रभावकारी बनाउन एआईको प्रयोग गरिएको छ। यसले अफसाइड तथा अन्य विवादास्पद निर्णयहरूमा रेफ्रीलाई छिटो र सटीक जानकारी उपलब्ध गराउन सहयोग गर्नेछ।

फिफा र लेनोभोले खेलाडीहरूको डिजिटल थ्रीडी मोडल तयार गर्न पनि एआई प्रविधि प्रयोग गरेका छन्। यसमार्फत खेलाडीहरूको शारीरिक बनावट, उचाइ तथा चालचलनलाई अझ यथार्थपरक रूपमा विश्लेषण गर्न सकिने बताइएको छ।

विशेषज्ञहरूका अनुसार एआई र डिजिटल प्रविधिको बढ्दो प्रयोगले विश्वकपलाई थप निष्पक्ष, पारदर्शी र प्रतिस्पर्धात्मक बनाउन मद्दत पुर्‍याउनेछ। साथै, यसले खेल व्यवस्थापन र निर्णय प्रक्रियामा मानवीय त्रुटि कम गर्न महत्वपूर्ण भूमिका खेल्ने अपेक्षा गरिएको छ।

काठमाडौं । अमेरिका र इरानबीच लामो समयदेखिको तनाव कम गर्ने उद्देश्यले कूटनीतिक पहल तीव्र बनेको अन्तर्राष्ट्रिय सञ्चारमाध्यमहरूले जनाएका छन्। विभिन्न पक्षीय मध्यस्थता र वार्तापछि दुवै देश सम्भावित समझदारीतर्फ अघि बढिरहेको चर्चा भए पनि औपचारिक सम्झौता भने अझै सार्वजनिक भएको छैन।

पाकिस्तान र कतारलगायत देशहरूले अमेरिका–इरान संवादलाई सहज बनाउन मध्यस्थकर्ताको भूमिका निर्वाह गरिरहेको बताइएको छ। पाकिस्तानका प्रधानमन्त्री शहबाज सरिफले पनि वार्ता सकारात्मक दिशामा अघि बढिरहेको बताएका छन्।

यसबीच, अमेरिकी र इरानी अधिकारीहरूले केही महत्वपूर्ण विषयमा छलफल जारी रहेको संकेत दिएका छन्। यद्यपि, सम्झौताको अन्तिम रूप, हस्ताक्षरको मिति तथा त्यसका सर्तहरूबारे दुवै पक्षबाट आधिकारिक पुष्टि हुन बाँकी छ।

विश्लेषकहरूका अनुसार सम्भावित समझदारीमा क्षेत्रीय सुरक्षा, आर्थिक प्रतिबन्ध, समुद्री व्यापारिक मार्गको सुरक्षा तथा ऊर्जा आपूर्तिसम्बन्धी विषयहरू समावेश हुन सक्छन्। विशेषगरी विश्व व्यापारका लागि महत्वपूर्ण मानिने हर्मुज जलडमरूमध्यको सुरक्षा र आवागमनको विषयलाई प्रमुख रूपमा हेरिएको छ।

इरानले आफ्नो आर्थिक गतिविधिमाथि लगाइएका प्रतिबन्धहरू खुकुलो बनाउनुपर्ने माग गर्दै आएको छ भने अमेरिकाले क्षेत्रीय सुरक्षा र आणविक कार्यक्रमसँग सम्बन्धित आफ्ना चासोहरूलाई निरन्तर उठाउँदै आएको छ।

यद्यपि, दुवै देशबीचको सबैभन्दा संवेदनशील विषय मानिएको आणविक कार्यक्रमबारे अझै पूर्ण सहमति नबनेको बताइन्छ। त्यसैले हालको कूटनीतिक पहललाई तनाव कम गर्ने प्रारम्भिक प्रयासका रूपमा हेरिएको छ।

अन्तर्राष्ट्रिय समुदायले अमेरिका–इरान सम्बन्धमा सकारात्मक प्रगति भएमा मध्यपूर्व क्षेत्रमा स्थायित्व, ऊर्जा आपूर्ति सुरक्षा तथा विश्व अर्थतन्त्रमा सकारात्मक प्रभाव पर्न सक्ने अपेक्षा गरेको छ।

काठमाडौं । नेकपा माओवादीले नवलपरासीको सुस्ता क्षेत्रमा भएको भनिएको भारतीय सीमा सुरक्षा बल (एसएसबी) को हस्तक्षेपविरुद्ध काठमाडौंमा विरोध प्रदर्शन गरेको छ।

शनिबार माइतीघर मण्डलामा आयोजित प्रदर्शनमा सहभागीहरूले राष्ट्रिय स्वाधीनता, सीमा सुरक्षा तथा भौगोलिक अखण्डताको पक्षमा नाराबाजी गरेका थिए।

प्रदर्शनका क्रममा सहभागीहरूले भारतको कथित हस्तक्षेपको विरोध जनाउँदै विभिन्न प्लेकार्ड प्रदर्शन गरेका थिए। उनीहरूले नेपालको सार्वभौमसत्ता र सीमाको संरक्षणका लागि सरकारलाई प्रभावकारी पहल गर्न पनि आग्रह गरेका छन्।

माओवादीले सुस्ता क्षेत्रमा देखिएको सीमा सम्बन्धी विषयलाई गम्भीर रूपमा लिनुपर्ने बताउँदै राष्ट्रिय हित र भूभागको संरक्षणमा सबै पक्ष एकजुट हुनुपर्ने धारणा राखेको छ।

पोखरा । राष्ट्रिय स्वतन्त्र पार्टी (रास्वपा) गण्डकी प्रदेश सभापतिमा नवीन त्रिपाठी निर्वाचित भएका छन्। उनले बहालवाला प्रदेश सभापति राजन गौतमलाई पराजित गर्दै नेतृत्व हात पारेका हुन्।

निर्वाचन परिणामअनुसार त्रिपाठीले २३४ मत प्राप्त गरे भने उनका निकटतम प्रतिस्पर्धी राजन गौतमले १८२ मत पाए। सभापतिका अन्य उम्मेदवार माधव कँडेलले ११ मत र हरिबहादुर कार्कीले २ मत प्राप्त गरेका छन्।

पार्टी विधानअनुसार सभापतिमा निर्वाचित हुन कुल मतको ५० प्रतिशतभन्दा बढी मत आवश्यक पर्ने व्यवस्था रहेकोमा त्रिपाठीले पहिलो चरणमै आवश्यक मत प्राप्त गर्दै विजय हासिल गरेका हुन्।

शुक्रबार राति करिब ११ बजेदेखि सुरु भएको मतदानपछि शनिबार बिहान मतगणना सम्पन्न भएको थियो।

यसैबीच, गण्डकी प्रदेश सदस्य पदका लागि ५१ जनाले उम्मेदवारी दिएका थिए। विभिन्न क्लस्टरबाट ३३ जना प्रदेश सदस्य निर्वाचित हुने व्यवस्था छ। क्षेत्रगत प्रदेश सदस्यतर्फ २८ उम्मेदवार प्रतिस्पर्धामा रहेका छन्, जसबाट गण्डकीका १८ निर्वाचन क्षेत्रबाट एक–एक जना प्रतिनिधि चयन हुनेछन्।

समावेशी प्रदेश सदस्यतर्फ २३ जनाको उम्मेदवारी परेको थियो। यस समूहबाट १५ जना निर्वाचित हुने भए पनि उनीहरूको विस्तृत नतिजा सार्वजनिक हुन बाँकी रहेको छ।

प्रदेश सदस्य पदमा १२ जना उम्मेदवार भने निर्विरोध निर्वाचित भएका छन्। क्षेत्रगत सदस्यतर्फ बागलुङ–१ बाट मिना शर्मा आचार्य, गोरखा–१ बाट मनोज गुरुङ, गोरखा–२ बाट बलबहादुर घले, लमजुङबाट विजय पराजुली, म्याग्दीबाट ताराबहादुर कार्की तथा तनहुँ–१ बाट सूर्यमणि पौडेल निर्विरोध निर्वाचित भएका छन्।

त्यसैगरी, समावेशी सदस्यतर्फ खसआर्य महिला समूहबाट सीताकुमारी अर्याल, कृष्णकुमारी अधिकारी (अनिशा) र राममाया बस्ताकोटी, मुस्लिम महिला समूहबाट समिउन निशा, दलित महिला समूहबाट गीता विश्वकर्मा तथा अपाङ्गता भएका खसआर्य समूहबाट यदुनाथ सिग्देल निर्विरोध निर्वाचित भएका छन्।

काठमाडौं । नेपाल राष्ट्र बैंकले शनिबारका लागि विदेशी मुद्राको विनिमयदर सार्वजनिक गरेको छ। राष्ट्र बैंकका अनुसार आज अमेरिकी डलर एकको खरिददर १५१ रुपैयाँ ८८ पैसा र बिक्रीदर १५२ रुपैयाँ ४८ पैसा कायम गरिएको छ।

युरोपियन युरो एकको खरिददर १७५ रुपैयाँ ८० पैसा र बिक्रीदर १७६ रुपैयाँ ५० पैसा निर्धारण गरिएको छ। त्यस्तै, बेलायती पाउण्ड स्ट्रलिङ एकको खरिददर २०३ रुपैयाँ ७३ पैसा र बिक्रीदर २०४ रुपैयाँ ५४ पैसा तोकिएको छ।

स्वीस फ्रयाङ्क एकको खरिददर १९० रुपैयाँ ७८ पैसा र बिक्रीदर १९१ रुपैयाँ ५३ पैसा रहेको छ भने अष्ट्रेलियन डलर एकको खरिददर १०६ रुपैयाँ ९२ पैसा र बिक्रीदर १०७ रुपैयाँ ३५ पैसा कायम गरिएको छ।

राष्ट्र बैंकका अनुसार क्यानेडियन डलर एकको खरिददर १०८ रुपैयाँ ५८ पैसा र बिक्रीदर १०९ रुपैयाँ ०१ पैसा तथा सिङ्गापुर डलर एकको खरिददर ११८ रुपैयाँ ३० पैसा र बिक्रीदर ११८ रुपैयाँ ७७ पैसा निर्धारण गरिएको छ।

त्यसैगरी, जापानी येन १० को खरिददर ९ रुपैयाँ ४८ पैसा र बिक्रीदर ९ रुपैयाँ ५२ पैसा तथा चिनियाँ युआन एकको खरिददर २२ रुपैयाँ ४६ पैसा र बिक्रीदर २२ रुपैयाँ ५५ पैसा तोकिएको छ।

मध्यपूर्वी मुद्रातर्फ साउदी रियाल एकको खरिददर ४१ रुपैयाँ ६६ पैसा र बिक्रीदर ४१ रुपैयाँ ८२ पैसा कायम गरिएको छ। कतारी रियाल एकको खरिददर तथा बिक्रीदर दुवै ४१ रुपैयाँ ६६ पैसा रहेको छ भने यूएई दिराम एकको खरिददर ४१ रुपैयाँ ३५ पैसा र बिक्रीदर ४१ रुपैयाँ ५२ पैसा निर्धारण गरिएको छ।

भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा कायम रहेको नेपाल राष्ट्र बैंकले जनाएको छ।

काठमाडौं । फिफा विश्वकप फुटबल–२०२६ अन्तर्गत समूह ‘बी’ को पहिलो खेलमा घरेलु टोली क्यानडा र बोस्निया एन्ड हर्जगोभिनाले १–१ गोलको बराबरी खेलेका छन्।

क्यानडाको टोरन्टो स्टेडियममा सम्पन्न खेलमा दुवै टोलीले एक–एक अंक बाँडे। खेलमा सुरुआती अग्रता भने बोस्निया एन्ड हर्जगोभिनाले लिएको थियो।

खेलको २१औँ मिनेटमा जोभो लुकिचले हेडरमार्फत गोल गर्दै बोस्निया एन्ड हर्जगोभिनालाई १–० को अग्रता दिलाएका थिए। पहिलो हाफसम्म यही नतिजा कायम रह्यो।

दोस्रो हाफमा आक्रामक खेल प्रस्तुत गरेको क्यानडाले ७८औँ मिनेटमा बराबरी गोल फर्कायो। क्यानडाका काइल लारिनले गोल गर्दै खेललाई १–१ को स्थितिमा पुर्‍याएका हुन्।

त्यसपछि दुवै टोलीले थप गोल गर्न नसक्दा खेल बराबरीमा सकिएको हो। यस नतिजासँगै समूह ‘बी’ मा क्यानडा र बोस्निया एन्ड हर्जगोभिनाले समान एक–एक अंक जोडेका छन्।

विश्वकपअन्तर्गत आजै समूह ‘डी’ को पहिलो खेलमा आयोजक अमेरिका र पाराग्वेबीच प्रतिस्पर्धा हुनेछ। उक्त खेल नेपाली समयअनुसार बिहान ६:४५ बजे सुरु हुने तालिका छ।