काठमाडौं । राष्ट्रिय स्वतन्त्र पार्टी (रास्वपा)ले आम नागरिकले तत्काल गर्नुपर्ने काममा उठाएका प्रश्न समाधान गर्न सरकारले अध्यादेश ल्याएको निष्कर्ष निकालेको छ। सिंहदरबारमा सभापति रवि लामिछानेसहित सांसदहरूको अनौपचारिक छलफलपछि यस्तो धारणा सार्वजनिक गरिएको हो।

रास्वपाका मुख्य सचेतक कबिन्द्र बुर्लाकोटीका अनुसार सरकारले ल्याएका अध्यादेशहरू कुनै व्यक्ति वा पार्टीलाई लाभ पुग्ने उद्देश्यका होइनन्। जनताले काम छिटो गर भन्ने म्यान्डेट दिएकोले सोही अनुसार प्रक्रिया छरितो बनाउन अध्यादेश ल्याइएको उनले बताए।

उनले कानुनी प्रक्रियाको झमेला कारण सामान्य काममा पनि महिनौं समय लाग्ने अवस्था रहेको उल्लेख गरे। उदाहरणका रूपमा सडकबीचको रुख काट्ने जस्तो कामसमेत प्रक्रिया पूरा गर्न ५–६ महिना लाग्ने गरेको उनले बताए। यस्ता ढिला प्रक्रियालाई छिटो र सहज बनाउन अध्यादेश आवश्यक भएको उनको भनाइ छ।

काठमाडौँ । नेपाली कांग्रेस राष्ट्रिय सभा संसदीय दलको नेताबाट कृष्णप्रसाद सिटौला हटाइएका छन् । प्रतिनिधि सभा संसदीय दलका नेता भीष्मराज आङ्देम्बेले बुधबार सिटौलालाई हटाएर कमला पन्तलाई उक्त जिम्मेवारी दिएका हुन्।

आङ्देम्बेले नेपाली कांग्रेस संसदीय दलको विधान (संशोधन तथा परिमार्जन सहित, २०८३) को धारा १२ (२) बमोजिम पन्तलाई राष्ट्रिय सभा संसदीय दलको नेता पदमा नियुक्त गरेका हुन्।

सिटौलाले विशेष महाधिवेशनको विरोध गरेका थिए भने पन्त त्यसको पक्षमा थिइन्।

काठमाडौं । काठमाडौं उपत्यकाको यातायात व्यवस्थापनमा महत्वपूर्ण मानिएको चक्रपथ विस्तारको दोस्रो चरणका लागि नेपाल र चीन सरकारबीच औपचारिक सहायता सम्झौता सम्पन्न भएको छ।

बुधबार भौतिक पूर्वाधार तथा यातायात मन्त्री सुनील लम्साल र नेपालका लागि चिनियाँ राजदूत झाङ माओमिङबीच सम्झौता पत्रमा हस्ताक्षर भएसँगै कलंकीदेखि बसुन्धारासम्मको सडक विस्तार कार्य अघि बढ्ने भएको हो।

परियोजना अन्तर्गत ८.२ किलोमिटर लामो सडक खण्डलाई आधुनिक रूपमा विस्तार गरिनुका साथै आवश्यक पुलहरू निर्माण गरिनेछ। यसका लागि चीन सरकारले करिब ११ अर्ब रुपैयाँ बराबरको अनुदान उपलब्ध गराउने जनाएको छ।

मन्त्री लम्सालले परियोजना कार्यान्वयनमा देखिन सक्ने प्रशासनिक तथा कानुनी समस्यालाई छिटो समाधान गर्ने प्रतिबद्धता व्यक्त गर्दै २४ घण्टाभित्र सहजीकरण गर्ने बताएका छन्।

उनले उत्तर–दक्षिण सडक सञ्जाल विकास सरकारको प्राथमिकता रहेको उल्लेख गर्दै आगामी दिनमा चीनबाट थप लगानी र प्राविधिक सहयोग अपेक्षित रहेको बताए।

यसअघि कोटेश्वरदेखि कलंकीसम्मको पहिलो चरणको विस्तार सन् २०१९ मा सम्पन्न भइसकेको थियो। दोस्रो चरणको सम्झौताले चक्रपथ विस्तारलाई पूर्णता दिने दिशामा महत्वपूर्ण कदम मानिएको छ।

चिनियाँ राजदूत झाङ माओमिङले नेपालको पूर्वाधार विकासमा चीनको निरन्तर सहयोग रहने विश्वास व्यक्त गर्दै लगानीका लागि अनुकूल वातावरण बनेमा थप चिनियाँ लगानी आउने बताएका छन्।

यो परियोजनाले काठमाडौं उपत्यकाको ट्राफिक जाम घटाउन र आवागमन सहज बनाउन सहयोग पुर्‍याउने अपेक्षा गरिएको छ। साथै, यसले नेपाल–चीनबीचको आर्थिक र कूटनीतिक सम्बन्धलाई थप मजबुत बनाउने विश्वास गरिएको छ।

काठमाडाैं । राष्ट्रिय स्वतन्त्र पार्टी (रास्वपा) ले आफ्ना जनप्रतिनिधिहरूको कार्यशैली र आगामी चुनावी तयारीलाई लक्षित गर्दै नयाँ आन्तरिक निर्देशिका जारी गरेको छ।

बुधबार सिंहदरबारस्थित संसदीय दलको कार्यालयमा बसेको अनौपचारिक बैठकमा पार्टी सभापति रवि लामिछानेले सांसदहरूलाई आधिकारिक लेटरहेड, कार्ड र कागजातहरूमा एकरूपता ल्याउन निर्देशन दिएका हुन्।

संसदीय अभ्यासमा देखिने तामझाम घटाउन उनले कुनै पनि कागजातमा ‘माननीय’ सम्बोधन प्रयोग नगर्न स्पष्ट निर्देशन दिएको प्रवक्ता मनिष झाले जानकारी दिए।

बैठकमा पार्टीको सांगठनिक सुदृढीकरण र सांसदहरूको क्षमता अभिवृद्धिका विषयमा पनि छलफल भएको छ। सांसदहरूलाई संसदीय प्रक्रिया र नीति निर्माणमा अझ दक्ष बनाउन मेन्टर र सल्लाहकारको सहयोग लिन सुझाव दिइएको छ।

आगामी निर्वाचनलाई लक्षित गर्दै योग्य उम्मेदवार चयनका लागि ‘क्यान्डिडेट क्लब’ अवधारणा अघि सारिएको छ। वैशाख २० गतेदेखि सुरु हुने यो अभ्यासले उम्मेदवार छनोट र प्रशिक्षण प्रक्रियालाई पारदर्शी र व्यवस्थित बनाउने अपेक्षा गरिएको छ।

टिकट वितरणबारे पनि पार्टीले कडा नीति लिएको छ। कुनै पनि सांसदले व्यक्तिगत रूपमा टिकट दिने आश्वासन दिन नपाउने निर्णय गरिएको छ। यस्ता गतिविधि गरेको पाइएमा कारबाही गरिने चेतावनी दिइएको छ।

बैठकमा सरकारले संसद् अधिवेशन अन्त्य गरी अध्यादेश ल्याउने कदमबारे पनि छलफल भएको छ। सो सन्दर्भमा रास्वपाले आफ्नो संसदीय भूमिका प्रभावकारी बनाउने र सरकारलाई जवाफदेही बनाउने उपायबारे सांसदहरूसँग सुझाव संकलन गरेको जनाएको छ।

काठमाडौं । आईसीसी क्रिकेट विश्वकप लिग–२ अन्तर्गत जारी ओडीआई शृंखलामा नेपालले आज आफ्नो दोस्रो खेल खेल्दै छ। नेपालले आज ओमानसँग प्रतिस्पर्धा गर्नेछ।

खेल बिहान साढे ९ बजेदेखि कीर्तिपुरस्थित त्रिवि क्रिकेट मैदानमा सुरु हुनेछ। घरेलु मैदानमा हुने यस खेलप्रति नेपाली समर्थकहरू उत्साहित छन्।

यसअघि आफ्नो पहिलो खेलमा नेपालले युएईलाई पराजित गर्दै शृंखलामा सुखद सुरुवात गरेको थियो र महत्वपूर्ण दुई अंक हात पारेको थियो।

ओमानले भने आफ्नो पहिलो खेलमा युएईसँग हार बेहोरेको थियो। त्यसैले आजको खेल ओमानका लागि पुनरागमनको अवसर हुनेछ भने नेपाल लगातार दोस्रो जित निकाल्ने लक्ष्यमा रहनेछ।

अंकतालिकामा नेपाल २१ खेलबाट १४ अंकसहित सातौं स्थानमा रहेको छ। ओमान भने २५ खेलमा २९ अंकसहित तेस्रो स्थानमा रहेको छ। शीर्ष स्थानतर्फ उक्लिन नेपालका लागि आजको खेल महत्वपूर्ण मानिएको छ।

काठमाडौं । सरकारले सुरु गरेको घरदैलोमै राहदानी वितरण सेवा हालसम्म १४ जिल्लामा विस्तार गरिएको छ। हुलाक सेवा विभागका अनुसार अहिलेसम्म ३११ वटा राहदानी सेवाग्राहीको घरमै पुगेर वितरण गरिएको छ।

गुल्मी, डडेलधुरा, झापा, सिन्धुपाल्चोक, कालीकोट, मकवानपुर, बझाङ, कास्की, मोरङ, धनकुटा र बैतडी लगायत जिल्लासँग सम्झौता गरी सेवा विस्तार गरिएको छ। अन्य जिल्लाहरूमा भने जिल्ला प्रशासन कार्यालयबाट राहदानी प्राप्त भएपछि घरमै वितरण गर्ने प्रक्रिया अघि बढाइएको छ।

सबै जिल्ला प्रशासन कार्यालयहरूले राहदानीका लागि आउने सेवाग्राहीहरूको ठेगाना संकलन सुरु गरिसकेका छन्।

सवारी चालक अनुमति पत्र (लाइसेन्स) वितरणमा पनि उल्लेखनीय प्रगति भएको छ। २०८३ वैशाख १५ गते दिउँसो ३ बजेसम्म हुलाकमार्फत २ लाख ५६ हजार १२६ वटा लाइसेन्स सम्बन्धित यातायात कार्यालयमा पठाइसकिएको छ। मोरङ र कास्कीमा यातायात कार्यालयसँग समन्वय गरी लाइसेन्स घरमै पुर्‍याउने सेवा पनि सुरु गरिएको छ।

हुलाक सेवा विभागले अन्य क्षेत्रमा पनि सेवा विस्तारको काम अघि बढाएको छ। राष्ट्रिय जनस्वास्थ्य प्रयोगशालासँग नमुना ढुवानीसम्बन्धी सम्झौता अन्तिम चरणमा पुगेको छ भने नेपाल टेलिकमसँग सिमकार्ड घरमै पुर्‍याउने विषयमा प्राविधिक तयारी भइरहेको छ।

त्रिभुवन विश्वविद्यालयसँग प्रमाणपत्र ढुवानीका लागि दोस्रो चरणको छलफल सम्पन्न भइसकेको छ भने मध्यपश्चिम विश्वविद्यालयसँग प्रश्नपत्र, उत्तरपुस्तिका तथा प्रमाणपत्र ढुवानी सेवा सुरु भइसकेको छ।

यसका साथै राहदानी विभागसँग प्रणाली अन्तरआवद्धता, महालेखा नियन्त्रक कार्यालयसँग प्रणाली एकीकरणलगायतका कार्यहरू पनि अघि बढाइएको विभागले जनाएको छ।

सरकारले गत चैत १३ गते सार्वजनिक गरेको १०० दिने कार्यसूचीअन्तर्गत हुलाक सेवालाई आधुनिकीकरण गर्ने लक्ष्य राखिएको छ। यसका लागि प्रधानमन्त्री तथा मन्त्रिपरिषद्को कार्यालय, गृहमन्त्रालय र सञ्चार तथा सूचना प्रविधि मन्त्रालयबीच समन्वय भइरहेको छ।

सञ्चार मन्त्री डा. विक्रम तिमिल्सिनाले कार्यान्वयनलाई तीव्र बनाउन सम्बन्धित निकायहरूलाई सहकार्य र समस्या समाधानमा सक्रिय हुन निर्देशन दिएका छन्।

काठमाडौँ । कृषि तथा पशुपन्छी विकास तथा वन तथा वातावरण मन्त्री गीता चौधरीले नेपाल कृषि अनुसन्धान परिषद् (नार्क) को केन्द्रीय कार्यालयमा अध्यक्षको रूपमा औपचारिक रूपमा पदभार ग्रहण गरेकी छिन्।

मंगलबार पदभार ग्रहणपछि मन्त्री चौधरीले कृषि क्षेत्रमा नार्कले पु¥याएको योगदानको प्रशंसा गर्दै बदलिँदो राष्ट्रिय आवश्यकताअनुसार अझै प्रभावकारी काम गर्नुपर्ने आवश्यकता औंल्याइन्। उनले कृषि अनुसन्धानलाई मन्त्रालयको प्रमुख प्राथमिकतामा राखिएको उल्लेख गर्दै नार्कलाई राष्ट्रिय ‘थिंक ट्यांक’ र प्राविधिक सहयोगको अग्रणी संस्थाका रूपमा विकास गर्नुपर्ने बताइन्।

उनले नेपालमा कृषि क्षेत्र अपेक्षाअनुसार सन्तोषजनक नभएको उल्लेख गर्दै किसान पेशालाई सम्मानित र मर्यादित बनाउन अनुसन्धानमुखी कार्यक्रम आवश्यक रहेको बताइन्। “हामीमध्ये धेरै किसानका सन्तान हौं, तर किसानको सन्तान हुनुमा गर्व गर्न सकिने अवस्था छैन,” उनले भनिन्, “यसलाई परिवर्तन गर्ने जिम्मेवारी नार्कको हो।”

मन्त्री चौधरीले कृषि क्षेत्रमा सुधारका लागि विभिन्न योजना अघि सारिए पनि अनुसन्धानलाई प्राथमिकतामा नराख्दा अपेक्षित उपलब्धि हासिल हुन नसकेको बताइन्। अब भने अनुसन्धानलाई केन्द्रमा राखेर नीति कार्यान्वयन गरिने उनको भनाइ थियो।

उनले अनुसन्धानलाई प्रयोगशालामा सीमित नराखी किसानको खेतमै विस्तार गर्नुपर्नेमा जोड दिँदै ‘किसानको खेतलाई नै प्रयोगशाला बनाउनु पर्छ’ भन्ने धारणा राखिन्। साथै, विश्वविद्यालयहरूसँग सहकार्य गर्दै मानव स्रोतको प्रभावकारी उपयोग र अनुसन्धानमा समन्वय बढाउनुपर्ने आवश्यकता औंल्याइन्।

मन्त्री चौधरीले कृषि क्षेत्रमा जनचेतनाको कमी मुख्य समस्याका रूपमा रहेको उल्लेख गर्दै मलको प्रयोगदेखि उत्पादन व्यवस्थापनसम्म किसानलाई प्रत्यक्ष जानकारी पु¥याउने संयन्त्र विकास गर्न निर्देशन दिइन्। रासायनिक मलको अभावलगायत समस्याको दीर्घकालीन समाधानका लागि अनुसन्धानलाई सुदृढ बनाउनुपर्नेमा पनि उनले जोड दिइन्।

काठमाडौं । लामो समयदेखि अवरुद्ध रहेको ललितपुरको बालकुमारीस्थित जीआईएस सबस्टेशन निर्माणका लागि आवश्यक जग्गा प्राप्ति प्रक्रिया पूरा भएको छ।

सोमबार बसेको मन्त्रिपरिषद् बैठकले केयुकेएलको स्वामित्वमा रहेको करिब ४ रोपनी जग्गा उपयोग गर्न नेपाल विद्युत प्राधिकरणलाई स्वीकृति दिएसँगै परियोजनाले गति लिने भएको हो।

काठमाडौं र ललितपुरको विद्युत् वितरण प्रणालीलाई सुदृढ, भरपर्दो र दिगो बनाउन उच्च क्षमताको जीआईएस सबस्टेशन निर्माण प्रक्रिया अघि बढाइएको भए पनि जग्गा अभावका कारण चार वर्षभन्दा बढी समयदेखि काम रोकिएको थियो।

उक्त सबस्टेशन एसियाली विकास बैंक (एडीबी)को ऋण सहयोगमा करिब २ अर्ब रुपैयाँ लागतमा निर्माण गरिनेछ। भक्तपुरको ठिमीबाट आउने भूमिगत विद्युत् प्रसारण लाइन बालकुमारी सबस्टेशनमा जडान गरिनेछ र त्यहाँबाट टेकु सबस्टेशनमा जोड्ने योजना रहेको छ।

सबस्टेशन निर्माण सम्पन्न भएपछि आगामी पाँच वर्षसम्मको विद्युत् माग व्यवस्थापन गर्न सहज हुने अपेक्षा गरिएको छ।

केयुकेएलले बालकुमारीमा स्थापना गर्ने ढल प्रशोधन केन्द्रका लागि आवश्यक विद्युत् प्राधिकरणले निःशुल्क उपलब्ध गराउने र त्यसवापत प्राधिकरणले २५ वर्षका लागि ३ रोपनी १३ आना २ पैसा जग्गा उपभोग गर्ने सहमति भएको छ।

जग्गा प्राप्तिको प्रक्रिया पूरा भएसँगै अब सबस्टेशन निर्माणका लागि बोलपत्र आह्वान गरिने तयारी गरिएको छ।

रामेछाप। काभ्रेपलाञ्चोक जिल्लामा अविरल वर्षासँगै रोशी खोलामा आएको बाढीले डाइभर्सन बगाएपछि बीपी राजमार्ग पुनः अवरुद्ध भएको छ।सोमबार साँझबाट आंशिक रूपमा सञ्चालनमा आएको उक्त सडक मंगलबार साँझदेखि फेरि बन्द भएको जिल्ला प्रहरी कार्यालय काभ्रेले जनाएको छ। यसअघि रोशी खोलाको बाढीले डाइभर्सन बगाउँदा शनिबारदेखि नै सडक अवरुद्ध भएको थियो।

मंगलबार साँझ पुनः वर्षासँगै खोलामा पानीको सतह बढेपछि सडक सञ्चालनमा समस्या आएको र सवारी आवागमन पूर्ण रूपमा बन्द गरिएको प्रहरीले जनाएको छ। सडक बन्दहुँदा काठमाडौंबाट पूर्व आउजाउ गर्ने यातायता साधन रोकिएका छन् ।

जिल्ला प्रहरी कार्यालय काभ्रेपलाञ्चोकले जारी गरेको सूचनामा प्रतिकूल मौसमका कारण जिल्लाका विभिन्न स्थानमा अत्यधिक वर्षा भइरहेकाले बीपी राजमार्गमा हुन सक्ने सम्भावित जोखिमलाई ध्यानमा राख्दै तत्कालका लागि सवारी आवागमन पूर्ण रूपमा बन्द गरिएको उल्लेख गरिएको छ।

प्रहरीका अनुसार मौसममा सुधार भई सडकमा कुनै अवरोध नरहेपछि अर्को सूचना जारी गरेर सडक सुचारु भएको जानकारी गराइनेछ। थप जानकारीका लागि १०० र १०३ मा सम्पर्क गर्नसमेत सर्वसाधारणलाई अनुरोध गरिएको छ।

काठमाडौं । जल तथा मौसम विज्ञान विभाग, मौसम पूर्वानुमान महाशाखाले हाल नेपालमा पश्चिमी तथा स्थानीय वायुको प्रभावसँगै पूर्वी भूभाग नजिक तल्लो वायुमण्डलमा रहेको न्यून चापीय क्षेत्र सक्रिय रहेको जनाएको छ।

महाशाखाका अनुसार अहिले कोशी, मधेस, बागमती र गण्डकी प्रदेशसहित देशका हिमाली र पहाडी भूभागमा अधिकांश बदली रहेको छ भने बाँकी क्षेत्रमा आंशिक बदली देखिएको छ।

आज दिउँसो कोशी, मधेस, बागमती, गण्डकी र लुम्बिनी प्रदेशका धेरै स्थान तथा कर्णाली र सुदूरपश्चिम प्रदेशका केही स्थानमा चट्याङ्गसहित मध्यम वर्षाको सम्भावना रहेको छ। हिमाली क्षेत्रमा हिमपात पनि हुन सक्ने जनाइएको छ।

कोशी प्रदेशका पहाडी भूभागका एक-दुई स्थानमा चट्याङ्गसहित भारी वर्षा हुन सक्ने तथा तराई क्षेत्रमा केही स्थानमा हावाहुरी चल्ने सम्भावना रहेको छ।

आज राति पनि कोशी, मधेस, बागमती र गण्डकी प्रदेशका धेरै स्थान तथा अन्य प्रदेशका पहाडी र हिमाली क्षेत्रका केही स्थानमा चट्याङ्गसहित मध्यम वर्षा र हिमपातको सम्भावना रहेको छ। साथै, कोशी र गण्डकी प्रदेशका केही पहाडी क्षेत्रमा भारी वर्षा र तराईका केही स्थानमा हावाहुरीको सम्भावना रहेको महाशाखाले जनाएको छ।