काठमाडौं । नेकपा (एमाले) राष्ट्रियसभा संसदीय दलका नेता प्रेमप्रसाद दंगालको अध्यक्षतामा विपक्षी दलहरूको संयुक्त बैठक बसेको छ। बैठकमा नेकपा (एमाले), नेपाली कांग्रेस र नेकपा (माओवादी केन्द्र) सहभागी भएका थिए।
बैठकले सरकारका विभिन्न गतिविधिप्रति गम्भीर असन्तुष्टि व्यक्त गर्दै ९ बुँदे निर्णय सार्वजनिक गरेको छ।
निर्णयमा देशका विभिन्न स्थानमा सुकुम्वासी तथा अव्यवस्थित बसोबासको पहिचान र वैकल्पिक आवासको व्यवस्था नगरी बस्ती हटाउने कार्यप्रति कडा विरोध जनाइएको छ। यस्तो कदमले नागरिकमा भय र असुरक्षा बढाएको उल्लेख गर्दै सुरक्षित आवासको व्यवस्था गर्न सरकारसँग माग गरिएको छ।
विपक्षी दलहरूले दैनिक उपभोग्य वस्तुमा भएको तीव्र मूल्यवृद्धिप्रति चिन्ता व्यक्त गर्दै महँगी र कालोबजारी नियन्त्रण गर्न तथा गरिब र सीमान्तकृत समुदायका लागि सुपथ मूल्यका पसल सञ्चालन गर्न आग्रह गरेका छन्।
यस्तै, अन्तर्राष्ट्रिय परिस्थितिका कारण रासायनिक मलको अभाव हुन सक्ने भन्दै वर्षे सिजनअघि नै पर्याप्त आपूर्ति सुनिश्चित गर्न सरकारलाई सचेत गराइएको छ।
झापा, मोरङ, सुनसरी, चितवन र काठमाडौंलगायत क्षेत्रमा फैलिएको बर्डफ्लु प्रकोप नियन्त्रण गर्न र प्रभावित किसानलाई राहत तथा क्षतिपूर्ति उपलब्ध गराउन पनि माग गरिएको छ।
पेट्रोलियम पदार्थको मूल्यवृद्धिका कारण बढेको महँगी नियन्त्रण गर्न, बजार अनुगमन कडा पार्न र उपभोक्तालाई राहत दिन तत्काल राहत प्याकेज घोषणा गर्न विपक्षी दलहरूले सरकारसँग माग गरेका छन्।
