काठमाडौं । नेपाली फिल्म क्षेत्रमा ‘स्टार किड्स’को लहरबीच पञ्चमी घिमिरेले फिल्म ‘पहाड’बाट रजतपटमा डेब्यु गरेकी छन्। वरिष्ठ निर्देशक तुलसी घिमिरेकी कान्छी छोरी पञ्चमीले नयाँ वर्षको अवसरमा वैशाख १ गतेदेखि प्रदर्शनमा आएको यस फिल्ममार्फत दर्शकमाझ आफ्नो उपस्थिति जनाएकी हुन्।

फिल्मलाई दर्शकले सकारात्मक प्रतिक्रिया दिइरहेका छन्। हल–हल पुगेर प्रतिक्रिया बुझिरहेकी पञ्चमी दर्शकको माया र प्रशंसाबाट उत्साहित देखिन्छिन्। उनका अनुसार दर्शकले फिल्मको भावनात्मक गहिराइलाई विशेष रूपमा रुचाएका छन्, यद्यपि प्रचार–प्रसार कम भएकाले धेरैले पछि मात्र फिल्मबारे थाहा पाएको गुनासो पनि गरेका छन्।

फिल्म रिलिजअघि भने उनीमा उत्साहभन्दा बढी डर थियो। दर्शकले आफ्नो अभिनयलाई कसरी लिने भन्ने चिन्ता भए पनि अहिले सकारात्मक प्रतिक्रियाले उनको आत्मविश्वास बढाएको छ।

सानैदेखि अभिनयप्रति रुचि भए पनि पारिवारिक अवस्था र फिल्म क्षेत्रको अनिश्चितताका कारण उनले सुरुमा यो क्षेत्रमा प्रवेश गर्ने निर्णय गरेकी थिइनन्। कक्षा ११–१२ मा विज्ञान पढेकी पञ्चमी डाक्टर बन्ने लक्ष्यमा थिइन्। तर पछि परिवारकै साथ र प्रोत्साहनमा मुम्बई गएर आमसञ्चार अध्ययन गरेपछि अभिनयतर्फ फर्किने निर्णय लिइन्।

‘पहाड’भन्दा अघि पनि केही प्रस्ताव आए पनि आत्मविश्वासको कमीका कारण उनले स्वीकार गरेकी थिइनन्। मुम्बईको अनुभवले भने उनलाई आत्मविश्वासी बनायो। फिल्ममा उनले ‘तारा’ नामक निर्भीक पात्र निभाएकी छन्, जसका लागि भाषा, लवज र अभिनयमा विशेष मेहनत गरेको उनले बताइन्।

फिल्ममा उनले निर्देशक बाबु तुलसी घिमिरेसँगै अभिनेता विपिन कार्कीसँग काम गर्ने अवसर पाएकी छन्। विपिनको कार्यशैली र समर्पणबाट आफूले धेरै सिकेको पञ्चमी बताउँछिन्।

आगामी दिनमा पनि अभिनयलाई निरन्तरता दिने योजना रहेको उनले स्पष्ट पारिन्। नेपाली फिल्मप्रति परिवारको गहिरो लगावका कारण यही क्षेत्रमा केही गर्ने उद्देश्यसहित आफू अघि बढिरहेको उनको भनाइ छ।

नेपोटिज्मको बहसबारे बोल्दै पञ्चमीले आफूले अवसरसँगै ठूलो जिम्मेवारी पनि बोकेको बताइन्। दर्शकको अपेक्षा उच्च हुने भएकाले आफूले अझ धेरै मेहनत गर्नुपर्ने उनको धारणा छ। उनले यो अवसरलाई आशीर्वादका रूपमा लिँदै दर्शकको विश्वास जित्ने लक्ष्य राखेकी छन्।

काठमाडौं । राष्ट्रिय स्वतन्त्र पार्टी (रास्वपा)को केन्द्रीय सचिवालय बैठकले २०८३ वैशाख १५ गतेदेखि जिल्ला अधिवेशन सुरु गर्ने निर्णय गरेको छ। आइतबार बसेको बैठकले देशभर उक्त मितिदेखि अधिवेशन सुरु गर्ने निर्णय गरेको हो।

पार्टीका प्रवक्ता मनिष झाले प्रत्यक्ष निर्वाचित सांसद नरहेका निर्वाचन क्षेत्रमा समानुपातिकतर्फबाट निर्वाचित सांसदहरूलाई जिम्मेवारी दिने निर्णय गरिएको जानकारी दिए। उनका अनुसार जिल्ला र निर्वाचन क्षेत्रसहितको विस्तृत सूची भोलि बस्ने केन्द्रीय समितिको बैठकबाट पारित गरिनेछ।

त्यसैगरी, बैठकले प्रवास विभागको प्रमुखमा केन्द्रीय सचिवालय सदस्य तथा सांसद दीपक वोहरालाई नियुक्त गर्ने निर्णय पनि गरेको छ। यसअघि उक्त जिम्मेवारी पार्टी उपसभापति तथा हालका सभामुख डीपी अर्यालसँग थियो। अर्याल सभामुखमा निर्विरोध निर्वाचित भएपछि उक्त पद रिक्त रहेको थियो।

काठमाडौं । अर्थ मन्त्रालयले सरकारी कर्मचारीहरूको तलब–भत्ता भुक्तानी प्रणालीमा परिवर्तन गर्ने निर्णय गरेको छ। अबसम्म मासिक रूपमा दिइँदै आएको तलब आगामी दिनमा अर्धमासिक (महिनामा दुई पटक) रूपमा वितरण गरिने भएको हो।

मन्त्रालयले जारी गरेको पत्रअनुसार उक्त व्यवस्था कार्यान्वयनका लागि महालेखा नियन्त्रक कार्यालयलाई आवश्यक तयारी गर्न निर्देशन दिइएको छ।

हालसम्म सरकारी कर्मचारीहरूले महिनाको अन्त्यमा एकैपटक तलब बुझ्दै आएका थिए। तर नयाँ प्रणाली लागू भएपछि अब महिनामा दुई चरणमा तलब पाउने व्यवस्था हुनेछ।

काठमाडौं । गृहमन्त्री सुधन गुरुङमाथि उठेका गम्भीर आरोपबारे तत्काल कारबाहीको माग गर्दै जेनजी मुभमेन्ट नेपालले सरकारको ध्यानाकर्षण गराएको छ। आइतबार जारी प्रेस वक्तव्यमा संगठनले मन्त्री गुरुङलाई पदबाट बर्खास्त गरी पक्राउ गर्न तथा निष्पक्ष अनुसन्धान अघि बढाउन माग गरेको हो।

वक्तव्यमा पदमै बसेर छानबिन सम्भव नहुने उल्लेख गर्दै यसले स्पष्ट रूपमा स्वार्थको द्वन्द्व सिर्जना गर्ने जनाइएको छ। मन्त्री पदमा रहँदा आफ्नैविरुद्ध निष्पक्ष अनुसन्धान हुन नसक्ने भन्दै संगठनले यसलाई आधारभूत नैतिकता र कानुनी सिद्धान्तविपरीत ठहर गरेको छ।

त्यस्तै, बालेन शाह नेतृत्वको सरकारप्रति लक्षित गर्दै क्याबिनेट गठनलाई गम्भीर राजनीतिक र नैतिक निर्णयका रूपमा लिनुपर्ने उल्लेख गरिएको छ। हचुवाको भरमा मन्त्री नियुक्त गर्ने र पछि हटाउने प्रवृत्तिलाई अस्वीकार्य बताउँदै जिम्मेवार नेतृत्वले परिपक्वता, दूरदर्शिता र जवाफदेहिता देखाउनुपर्नेमा जोड दिइएको छ।

संगठनले वर्तमान सरकार ७६ जना शहीदहरूको बलिदानबाट प्राप्त जनादेशको प्रतिनिधि भएको उल्लेख गर्दै जनताको त्यागमाथि सस्तो राजनीति नगर्न चेतावनी दिएको छ। सुशासन, पारदर्शिता र जवाफदेहितामा कुनै सम्झौता स्वीकार्य नहुने पनि स्पष्ट पारिएको छ।

जेनजी मुभमेन्टले न्याय प्रक्रिया स्वतन्त्र, निष्पक्ष र दबाबमुक्त हुनुपर्नेमा जोड दिँदै दोषी जो–कोही भए पनि कानुनको कठघरामा उभिनुपर्ने बताएको छ। पद, शक्ति वा राजनीतिक संरक्षणका आधारमा कसैलाई पनि उन्मुक्ति दिन नहुने चेतावनीसमेत दिएको छ। उक्त वक्तव्य संगठनका प्रवक्ता विजय शाहले जारी गरेका हुन्।

काठमाडौं । संघीय संसदअन्तर्गतका दुई वटा संसदीय समितिको बैठक आज बस्दैछ।

दिउँसो १२ः३० बजे बस्ने सार्वजनिक नीति तथा प्रत्यायोजित विधायन समितिको बैठकमा उपसमिति गठन सम्बन्धी विषयमा छलफल हुने कार्यसूची रहेको छ।

यसैगरी बिहान ११ बजे बस्ने संघीयता सबलीकरण तथा राष्ट्रिय सरोकार समितिको बैठकमा उपसमिति पुनर्गठन, समितिको कार्यक्षेत्रसँग सम्बन्धित विषयमा अन्तरक्रिया तथा स्थलगत अनुगमनबारे छलफल गरिने जनाइएको छ।

काठमाडौं । हाल नेपालमा पश्चिमी तथा स्थानीय वायूसँगै पूर्वी नेपाल नजिक रहेको न्यून चापीय प्रणालीको आंशिक प्रभाव देखिएको छ। मौसम पूर्वानुमान महाशाखाका अनुसार आज दिउँसो कोशी प्रदेशसहित अन्य पहाडी र हिमाली क्षेत्रमा साधारणतया बदली रहनेछ भने तराई क्षेत्रमा आंशिक बदली हुने सम्भावना छ।

कोशी र गण्डकी प्रदेशका पहाडी तथा हिमाली भू–भागका केही स्थानहरूमा तथा देशका अन्य हिमाली क्षेत्रमा छिटफुट वर्षा वा हिमपात हुन सक्छ। साथै बागमती र लुम्बिनी प्रदेशका पहाडी क्षेत्रका एक–दुई स्थानमा मेघगर्जन र चट्याङसहित हल्का वर्षाको सम्भावना रहेको छ।

त्यसैगरी मधेश प्रदेशसहित बागमती, गण्डकी, लुम्बिनी र सुदूरपश्चिमका तराई तथा उपत्यका क्षेत्रमा गर्मी बढ्ने अनुमान गरिएको छ।

आज राति भने हिमाली क्षेत्रमा सामान्य बदली, पहाडी क्षेत्रमा आंशिक बदली र तराई क्षेत्रमा मौसम मुख्यतः सफा रहनेछ। कोशी, गण्डकी र कर्णाली प्रदेशका हिमाली भू–भागका एक–दुई स्थानमा हल्का वर्षा वा हिमपातको सम्भावना रहेको मौसम विभागले जनाएको छ।

काठमाडौं । विश्व ऊर्जा आपूर्तिको अत्यन्त संवेदनशील जलमार्ग स्ट्रेट अफ होर्मुज फेरि तनावको केन्द्र बनेको छ। इरानले उक्त जलमार्ग पुनः बन्द गरेको घोषणा गर्दै अमेरिकी नाकाबन्दी नहटेसम्म कुनै पनि जहाजलाई आवतजावत गर्न नदिने चेतावनी दिएको हो।

इरानको इस्लामिक रिभोल्युशनरी गार्ड कोर्प्स (आईआरजीसी) नौसेनाले शनिबार जारी गरेको वक्तव्यमा होर्मुज हुँदै गुजरिने प्रयास गर्ने जहाजलाई ‘निशाना बनाइने’ स्पष्ट चेतावनी दिएको छ।

इरानले फारसको खाडी र ओमान सागरबाट होर्मुजतर्फ अघि बढ्ने जहाजलाई शत्रुसँगको सहकार्यका रूपमा लिने पनि जनाएको छ।

यसअघि पाकिस्तानको मध्यस्थतामा अमेरिका र इरानका प्रतिनिधिबीच भएको वार्तामा होर्मुज जलमार्ग खुला गर्ने सहमति भएको बताइएको थियो। तर पछिल्लो निर्णयले पुनः क्षेत्रीय तनाव चर्किने संकेत देखिएको छ।

काठमाडौं । राष्ट्रिय स्वतन्त्र पार्टी (रास्वपा)को सचिवालय बैठक आज (आइतबार) बस्दैछ। पार्टी केन्द्रीय कार्यालय बनस्थलीमा हुने बैठकका लागि ६ वटा प्रमुख एजेन्डा तय गरिएको प्रवक्ता मनीष झाले जानकारी दिएका छन्।

पार्टी सभापति रवि लामिछानेले आह्वान गरेको उक्त बैठकमा सांगठनिक विस्तार, महाधिवेशनको तयारीलगायत विषयमा विस्तृत छलफल हुने बताइएको छ।

बैठकमा जिल्ला अधिवेशन कार्यविधि २०८३ माथि छलफल, महाधिवेशन कार्यविधि मस्यौदा समिति गठन, पार्टीको आर्थिक पारदर्शिता सुनिश्चित गर्न बैंक खाता सञ्चालन, तथा संगठनलाई पूर्णता दिने क्रममा केन्द्रीय आयोग, सल्लाहकार परिषद्, संघीय नेतृत्व मञ्च र विभिन्न विभागहरूमा मनोनयन गर्ने विषयमा निर्णय गरिनेछ।

यसपटक रास्वपाले नयाँ अभ्यासका रूपमा ‘विज्ञहरूको आह्वान’ र ‘योजनाहरूको आह्वान’लाई पनि बैठकको मुख्य एजेन्डामा समेटेको छ। साथै, सांसदहरूको संगठनात्मक जिम्मेवारी बाँडफाँटसम्बन्धी विषयमा पनि बैठकले निर्णय गर्ने जनाइएको छ।

म्याग्दी । आठ हजार ९१ मिटर अग्लो अन्नपूर्ण प्रथम हिमालमा चालु वर्षको वसन्तयामको आरोहण सुरु भएको छ। म्याग्दीको अन्नपूर्ण गाउँपालिका–४ नारच्याङ क्षेत्रमा पर्ने यस हिमालमा पहिलो टोलीले सफलतापूर्वक शिखर चुम्दै सिजनको औपचारिक सुरुवात गरेको हो।

सेभेन समिट ट्रेकका लाक्पा शेर्पाको नेतृत्वमा सात जना नेपाली र पाँच जना विदेशी पर्वतारोहीले शनिबार शिखरमा पुग्न सफल भएका छन्। कम्पनीका अनुसार क्यानडाका चाल्र्स पेज, रुसका भालेरिय बाबानोभ, भ्लादिमिर अफानासेभ, युरी कुग्लोभ तथा अजरबैजानका इस्फार्ली असुर्लीले पनि आरोहण पूरा गरेका छन्।

नेपाली टोलीमा लाक्पासहित छेवाङ, दावा नर्बु, पासाङ दुुङपा, छाङुबा, तारामान र पासाङ शेर्पा सहभागी थिए। त्यसैगरी शनिबार बिहान नेदरल्यान्ड र अष्ट्रेलियाका दुई आरोहीसँगै एक शेर्पाले पनि सफलतापूर्वक शिखर चुमेको जानकारी मौरिस हर्जोग पदमार्गका अभियन्ता तेजबहादुर गुरुङले दिएका छन्।

“यसपटकको पहिलो टोलीले सफल आरोहण गरेसँगै आधार शिविर क्षेत्रमा चहलपहल बढ्न थालेको छ,” गुरुङले बताए।

पर्यटन विभागका अनुसार यस वर्ष अन्नपूर्ण आरोहणका लागि चार समूहका २७ जनाले अनुमति लिएका छन्, जसबाट एक करोड २० लाख रुपैयाँभन्दा बढी राजस्व संकलन भएको छ। गत वर्ष वसन्तयाममा भने ६६ जनाले अनुमति लिएका थिए।

विश्वको दशौँ अग्लो हिमाल अन्नपूर्णमा यस सिजन विभिन्न कम्पनीमार्फत आएका आरोही तथा पर्यटकहरूको आधार शिविरमा उल्लेख्य चहलपहल देखिएको छ। सन् १९५० मा मौरिस हर्जोगले पहिलोपटक अन्नपूर्ण आरोहण गरेका थिए। त्यसको तीन वर्षपछि सन् १९५३ मा एडमण्ड हिलारी र तेन्जिङ नोर्गे शेर्पाले सगरमाथाको सफल आरोहण गरेका थिए।

काठमाडौँ । नेपाल राष्ट्र बैंकले आज (आइतबार)का लागि विदेशी मुद्राको विनिमयदर निर्धारण गरेको छ। निर्धारण गरिएको दरअनुसार अमेरिकी डलर एकको खरिददर १४८ रुपैयाँ ३९ पैसा र बिक्रीदर १४८ रुपैयाँ ९९ पैसा तोकिएको छ।

यस्तै, युरोपियन युरो एकको खरिददर १७५ रुपैयाँ ०६ पैसा र बिक्रीदर १७५ रुपैयाँ ७६ पैसा रहेको छ भने युके पाउण्ड स्ट्रलिङ एकको खरिददर २०० रुपैयाँ ७५ पैसा र बिक्रीदर २०१ रुपैयाँ ५६ पैसा कायम गरिएको छ। स्वीस फ्रयाङ्क एकको खरिददर १८९ रुपैयाँ ६५ पैसा र बिक्रीदर १९० रुपैयाँ ४१ पैसा तोकिएको छ।

अष्ट्रेलियन डलर एकको खरिददर १०६ रुपैयाँ ४० पैसा र बिक्रीदर १०६ रुपैयाँ ८३ पैसा, क्यानेडियन डलर एकको खरिददर १०८ रुपैयाँ ४९ पैसा र बिक्रीदर १०८ रुपैयाँ ९३ पैसा तथा सिङ्गापुर डलर एकको खरिददर ११६ रुपैयाँ ६२ पैसा र बिक्रीदर ११७ रुपैयाँ ०९ पैसा निर्धारण गरिएको छ।

जापानी येन १० को खरिददर ९ रुपैयाँ ३२ पैसा र बिक्रीदर ९ रुपैयाँ ३६ पैसा रहेको छ भने चिनियाँ युआन एकको खरिददर २१ रुपैयाँ ७५ पैसा र बिक्रीदर २१ रुपैयाँ ८४ पैसा कायम गरिएको छ। साउदी अरेबियन रियाल एकको खरिददर ३९ रुपैयाँ ५६ पैसा र बिक्रीदर ३९ रुपैयाँ ७२ पैसा तथा कतारी रियाल एकको खरिददर ४० रुपैयाँ ७० पैसा र बिक्रीदर ४० रुपैयाँ ८६ पैसा तोकिएको छ।

केन्द्रीय बैंकका अनुसार थाइ भाट एकको खरिददर ४ रुपैयाँ ६३ पैसा र बिक्रीदर ४ रुपैयाँ ५५ पैसा, युएई दिराम एकको खरिददर ४० रुपैयाँ ४० पैसा र बिक्रीदर ४० रुपैयाँ ५६ पैसा, मलेसियन रिङ्गेट एकको खरिददर ३७ रुपैयाँ ५४ पैसा र बिक्रीदर ३७ रुपैयाँ ७० पैसा निर्धारण गरिएको छ। साउथ कोरियन वन १०० को खरिददर १० रुपैयाँ ०३ पैसा र बिक्रीदर १० रुपैयाँ ०७ पैसा, स्वीडिस क्रोनर एकको खरिददर १६ रुपैयाँ १८ पैसा र बिक्रीदर १६ रुपैयाँ २५ पैसा तथा डेनिस क्रोनर एकको खरिददर २३ रुपैयाँ ४२ पैसा र बिक्रीदर २३ रुपैयाँ ५२ पैसा तोकिएको छ।

त्यस्तै, हङकङ डलर एकको खरिददर १८ रुपैयाँ ९५ पैसा र बिक्रीदर १९ रुपैयाँ ०३ पैसा रहेको छ भने कुवेती दिनार एकको खरिददर ४८४ रुपैयाँ ६२ पैसा र बिक्रीदर ४८६ रुपैयाँ ५८ पैसा कायम गरिएको छ। बहराइन दिनार एकको खरिददर ३९३ रुपैयाँ ५३ पैसा र बिक्रीदर ३९५ रुपैयाँ १२ पैसा तथा ओमानी रियाल एकको खरिददर ३८५ रुपैयाँ ४२ पैसा र बिक्रीदर ३८६ रुपैयाँ ९८ पैसा तोकिएको छ।

यस्तै, भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा निर्धारण गरिएको छ।

राष्ट्र बैंकले आवश्यकताअनुसार विनिमयदर जुनसुकै समयमा संशोधन गर्न सकिने जनाएको छ। साथै, वाणिज्य बैंकहरूले तोक्ने दर केही फरक हुन सक्ने र अद्यावधिक जानकारी केन्द्रीय बैंकको आधिकारिक वेबसाइटमा उपलब्ध हुने उल्लेख गरेको छ।