काठमाडौँ: राष्ट्रिय प्रजातन्त्र पार्टी (राप्रपा) का वरिष्ठ नेता पशुपति शम्शेर जबराले बहुदलीय प्रजातन्त्र र मानव अधिकारका आधारशिला शान्तिपूर्ण अभिव्यक्ति र प्रदर्शनको अधिकारमाथि हस्तक्षेप नगर्न सरकारलाई सुझाव दिनुभएको छ।
नववर्ष २०८२ को पूर्वसन्ध्यामा पत्रकारहरूसँगको भेटघाट तथा शुभकामना आदानप्रदान कार्यक्रममा बोल्दै उहाँले मानव अधिकार र प्रजातान्त्रिक मूल्य–मान्यता विपरीतका कार्यले देशलाई अन्योलतर्फ डोहोर्याउने खतरा रहेको भन्दै सरकारलाई सचेत रहन आग्रह गर्नुभयो।
चैत १५ गते तिनकुनेमा आयोजित, संवैधानिक राजतन्त्र, सनातन हिन्दू राष्ट्र, र भ्रष्टाचार अन्त्यको मागसहितको प्रदर्शनप्रति राप्रपाको समर्थन रहेको बताउँदै सांसद जबराले त्यस क्रममा पक्राउ परेका पार्टीका वरिष्ठ उपाध्यक्ष रवीन्द्र मिश्र, महामन्त्री डा. धवल शम्शेर राणा लगायतको निःशर्त रिहाइको माग गर्नुभयो।
घटनाको उच्चस्तरीय न्यायिक छानबिन आयोग गठनको माग गर्दै उहाँले भन्नुभयो, “मैले पढेको र बुझेको बहुदलीय व्यवस्था उदार प्रणाली हो, जहाँ फरक मत राख्न पाइन्छ र अल्पमतको कदर गरिन्छ।”
पूर्वमन्त्रीसमेत रहनुभएका जबराले राष्ट्रियता, प्रजातन्त्र र उदारवादलाई मार्गदर्शक सिद्धान्त मानेर राप्रपा गठन भएको उल्लेख गर्दै, पार्टी स्थापना कालदेखि नै यिनै मूल्य–मान्यता भित्र रही राजनीतिक अभ्यास गर्दै आएको स्पष्ट पार्नुभयो।
