काठमाडौं: विदेशी रोजगारीका नाममा युवायुवतीलाई विभिन्न देशहरूमा पठाउने बहानामा लामो समयदेखि ठगी गर्दै आएका केदार तामाङलाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालय, टेकुले आइतबार एक प्रेस विज्ञप्ति जारी गर्दै तामाङको पक्राउ पुष्टि गरेको हो।
विज्ञप्तिअनुसार तामाङले आकर्षक तलबको प्रलोभन देखाई व्यक्तिहरूबाट रकम असुल्ने र त्यसपछि सम्पर्कविहीन हुने गरेको पाइएको छ। पीडितहरूले दिएको जाहेरीका आधारमा गरिएको अनुसन्धानमा तामाङ दोषी देखिएपछि उनलाई पक्राउ गरी थप अनुसन्धान तथा कारबाहीका लागि वैदेशिक रोजगार विभाग, ताहाचल, काठमाडौंमा बुझाइएको कार्यालयले जनाएको छ।
