काठमाडौँ : वर्षायाममा पानीजन्य तथा अन्य विभिन्न कारणले रोग लाग्ने र सर्ने हुन्छ। यस्तो समयमा रोग लाग्नबाट बच्न यी विभिन्न खानेकुरा दैनिक भोजनमा समावेश गर्नु उपयुक्त हुनेछ:
१. अदुवा: अदुवाले घाँटीमा न्यानो प्रभाव पार्छ, जसले घाँटीसँग सम्बन्धित दुखाइ र असुविधालाई कम गर्न मद्दत गर्दछ। अदुवामा प्राकृतिक एन्टिब्याक्टेरियल गुण हुन्छ, जसले शरीरलाई सङ्क्रमणसँग लड्न मद्दत गर्छ र रोग प्रतिरोधात्मक क्षमता बढाउन सक्छ। मानिसहरूले दिनमा एक वा दुई पटक अदुवाको चिया पनि पिउन सक्छन्।
२. लसुन: आहारविद्का अनुसार वर्षायाममा लसुन खाँदा अथाह फाइदा हुन्छ । लसुनमा एन्टिभाइरल र एन्टिब्याक्टेरियल गुण हुन्छ, जसले शरीरलाई सङ्क्रमणबाट बचाउन प्रभावकारी हुन्छ। लसुनमा तातो स्वभाव हुन्छ, जसले यस मौसममा शरीरलाई न्यानो राख्छ । यसले रोगबाट बचाउँछ र प्रतिरक्षा प्रणालीलाई बलियो बनाउँछ। लसुन खाली पेटमा काँचो वा भुटेर खान सकिन्छ । यसबाहेक यसलाई तरकारीमा मिसाएर पनि खान सकिन्छ ।
३. कागती: वर्षायाममा मानिसहरू कागती मन पराउँदैनन् र त्यसबाट टाढा रहन्छन् । तर, कागती भिटामिन सीको उत्कृष्ट स्रोत हो र यसको सेवनले रोग प्रतिरोधात्मक क्षमतालाई बलियो बनाउन सक्छ। कागतीलाई तरकारी, सलाद वा अन्य खानेकुरामा मिसाएर सेवन गर्न सकिन्छ । यदि तपाई चाहनुहुन्छ भने मनतातो पानीमा कागती मिसाएर पनि पिउन सक्नुहुन्छ । यसले तपाईंको शरीरलाई सङ्क्रमणबाट छिट्टै निको पार्न मद्दत गर्न सक्छ।
४. सूप: यदि कुनै व्यक्तिलाई रुघाखोकी, ज्वरो वा घाँटी दुख्ने समस्या छ भने उसले तरकारीको सूप तयार गरी दिनमा एक वा दुई पटक पिउनुपर्छ । टमाटरको सूपले घाँटीमा ठुलो राहत प्रदान गर्न र शरीरलाई बलियो बनाउन सक्छ। मौसमी तरकारी मिसाएर पनि सूप बनाउन सकिन्छ । तरकारीमा पाइने पौष्टिक तत्त्वले तपाईंको शरीरबाट सङ्क्रमण हटाउन मद्दत गर्छ । स्वस्थ व्यक्तिहरूले पनि तातो सूपको मजा लिन सक्छन्।
गर्मी र वर्षाको मौसममा ३ घण्टाभन्दा बढी समयसम्म राखिएको खानेकुरा नखाने र सधैँ तताएर खाने । यसले तपाईंको शरीरलाई धेरै फाइदा पुर्याउन सक्छ र चिसो र खोकीबाट राहत दिन्छ। वर्षायाममा तातो खानेकुरा खानुपर्छ र चिसोबाट टाढा रहनुपर्छ । ताजा फलफूल र तरकारीमा नुन हालेर तातो पानीले धोएर प्रयोग गर्नुपर्छ ।
