काठमाडौं: राष्ट्रिय स्वतन्त्र पार्टी (रास्वपा)ले सभापति रवि लामिछानेविरुद्ध राजनीतिक प्रतिशोध साधिएको आरोप लगाएको छ।
पार्टी कार्यालयमा आयोजित पत्रकार सम्मेलनमा कार्यवाहक प्रवक्ता मनिष झाले एमाले नेता लीलाबल्लभ अधिकारीमाथि कानुनी कारबाही नभएको घटनालाई उदाहरण दिँदै रास्वपामाथि राजनीतिक प्रतिशोध साधिएको थप पुष्टि भएको दाबी गरे।
‘हामीमाथि राजनीतिक प्रतिशोध हो भन्ने कुरा प्रमाणित गरिरहनु आवश्यक छैन। यसको आधार हामीले छुट्टै दिनुपर्दैन। लीलाबल्लभ अधिकारीविरुद्ध कानुनी कारबाही नहुनु र मुद्दा पनि दायर नहुनुले नै यो प्रमाणित गरेको छ,’ उनले भने। साथै, उनले अदालतलाई सम्मान गर्ने पार्टीको धारणा पनि व्यक्त गरे।
पार्टीको दाबी अनुसार, सभापति रवि लामिछानेले सहकारीको ब्याज तिर्नका लागि काटेको चेकसम्बन्धी कागजातलाई योजनाबद्ध रूपमा सार्वजनिक गरेर प्रचार गरिएको छ।
