काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले विपद् जोखिम न्यूनीकरण तथा व्यवस्थापनका लागि उच्चस्तरीय राजनीतिक संयन्त्र गठनबारे छलफल गर्न सर्वदलीय बैठक बोलाएका छन्।
रास्वपा प्रवक्ता जगदीश खरेलका अनुसार बैठक बुधबार बिहान ११ बजे सिंहदरबारस्थित रास्वपा संसदीय दलको कार्यालयमा बस्नेछ। बैठकमा उच्चस्तरीय राजनीतिक संयन्त्र गठन, विपद् जोखिम न्यूनीकरण तथा व्यवस्थापनलगायत समसामयिक विषयमा दलहरूबीच छलफल हुनेछ।
यसअघि पनि लामिछानेको पहलमा सर्वदलीय छलफल भएको थियो। रसुवाको भोटेकोशी नदीमा आएको भीषण बाढीपछि उद्धार, राहत तथा पुनःस्थापनाका काममा राजनीतिक दलहरूबीच समन्वयका लागि उच्चस्तरीय संयन्त्र गठन गर्ने प्रस्ताव अघि सारिएको थियो। सेप्टेम्बर १ मा भएको दोस्रो चरणको छलफलमा समेत सरकारसँग समन्वय गर्दै उद्धार, राहत र पुनःस्थापनाका काममा सहकार्य गर्ने विषयमा छलफल भएको थियो।
यसअघि भएको सर्वदलीय छलफलबाट विपद् व्यवस्थापन, पुनर्निर्माण तथा जलवायु अनुकूलनसँग सम्बन्धित विषयमा उच्चस्तरीय सर्वदलीय संयन्त्र बनाउने प्रस्ताव अघि बढेको भए पनि उक्त संयन्त्र गठन भइनसकेको विवरण सार्वजनिक भएका छन्।
पछिल्लो समय बाढी तथा अन्य प्राकृतिक विपद्बाट भएको क्षति, उद्धार तथा पुनःस्थापना र आगामी दिनमा विपद् जोखिम न्यूनीकरणका लागि प्रभावकारी समन्वयको आवश्यकता देखिएको अवस्थामा बुधबारको बैठकलाई सोही विषयमा केन्द्रित छलफलका रूपमा हेरिएको छ।
बैठकबाट उच्चस्तरीय राजनीतिक संयन्त्रको स्वरूप, भूमिका र कार्यक्षेत्रबारे थप समझदारी बन्ने वा नबन्ने विषय भने छलफलपछि स्पष्ट हुनेछ।
