काठमाडौं । इन्डोनेसियामा अजिङ्गरको पेटभित्र एक महिलाको शव फेला परेको छ। सर्पले मानिसलाई खाने घटना विरलै सुनिए पनि इन्डोनेसियामा पछिल्लो एक महिनामा यो दोस्रो घटना हो ।
यो घटना इन्डोनेसियाको दक्षिण सुलावेसी प्रान्तको सितेबा गाउँको हो।
इन्डोनेसिया प्रहरीका अनुसार मंगलबार सिरियाती नामकी ३६ वर्षीया महिला आफ्नो बच्चाको लागि औषधि लिन घरबाट निस्किएपछि बेपत्ता भएकी थिइन् ।
पछि उनका श्रीमान् आदियान्साले आफ्नो घरबाट ५०० मिटर पर श्रीमतीको चप्पल र अन्य लुगा फेला पारेका थिए।
बीबीसी इन्डोनेसिया सेवासँग कुरा गर्दै स्थानीय प्रहरी प्रमुख इदुलले श्रीमान् अदियान्साले जिउँदै अजिङ्गर फेला पारेको बताए ।
अजिङ्गरको पेट फुलेको देखेपछि शंका लागेर श्रीमानले अजिङ्गरको पेट काट्दा पेटभित्र उनको श्रीमतीको शव फेला पारेका थिए।
यसअघि जुनको सुरुमा दक्षिण सुलावेसीको अर्को जिल्लामा पाँच मिटर लामो अजिङ्गरले एक महिलालाई निलेको थियो।
यो घटनापछि अजिङ्गरले आक्रमण गर्न सक्ने भएकोले यहाँको प्रहरीले सर्वसाधारणलाई सुरक्षाका लागि सधैँ चक्कु साथमा राख्न सुझाव दिएको थियो ।
