गण्डकी: विगतमा तराई वा भारतबाट आयात गरिएको तरबुजा मात्रै खाने गरेका पोखरेलीहरू अहिले आफ्नै गाउँघरमा उत्पादन भएको मिठो तरबुजा स्वाद लिएर उत्साहित छन्। पोखरा महानगरपालिका–३३ को सुरौदी खोला किनारको तिखेढुङ्गा, पोखरा–१३ ढाँडबेसी, पाटनवेशी, हेमजालगायत क्षेत्रका फाँटहरूमा अहिले लटरम्म फलेका तरबुजा देखिन्छन्।
सुरौदीको तिखेढुङ्गामा अगुवा कृषकद्वय रमेश आचार्य र ज्ञानबहादुर कार्कीले ३५ रोपनी क्षेत्रफलमा तरबुजा खेती गरेका छन्, जुन अब केही दिनमै बजारमा आउने तयारीमा छ। त्यस्तै, आर्वाको ढाँडबेसीमा ‘रुद्रगङ्गा बहुउद्देश्यीय कृषि फर्म’मार्फत ई. विक्रम बरालसहितका युवाहरूले १५ रोपनीमा तरबुजा खेती गरी चार महिनामै १५ लाख रुपैयाँ आम्दानी गरेका छन्।
बरालका अनुसार ३,५०० किलोग्राम उत्पादन भइसकेको छ। “हामीले प्रमाणित गर्यौं कि यहाँ पनि राम्रो तरबुजा फल्छ,” उनले बताए। पोखरा–१३ का बुद्धप्रसाद बरालले ३ रोपनीमा खेती गरी ६०० किलोग्राम बिक्री गरिसकेका छन् भने हेमजाको अम्मट बिचमा रमेश कार्कीले तीन रोपनीमा लगाएको तरबुजा राम्रो फलिरहेको जानकारी दिएका छन्।
पोखरा महानगरपालिका कृषि विकास शाखा प्रमुख मनहर कडरियाका अनुसार यस वर्ष पोखरामा तरबुजा खेती २०० रोपनीमा विस्तार गरिएको छ। महानगरपालिकाले बीउ तथा मल्चिङ प्लास्टिकमा सहयोग गरेको र वडा नं. १३, २३, ३०, ३२, ३३ मा यसतर्फ आकर्षण बढिरहेको उनको भनाइ छ।
ब्रान्डिङ र बजारीकरण
यस वर्ष करिब ४०० टन (लगभग दुई करोड रुपैयाँ बराबर) तरबुजा उत्पादन भएको र ‘सरस्वती’ जातको तरबुजालाई ब्रान्डिङ गर्न स्टिकर तयार गरिएको कडरियाले जानकारी दिए।
तरबुजा मेलाले कृषकलाई प्रोत्साहन
स्थानीय उत्पादन प्रवर्द्धनका लागि पोखरा–१३ मा बिहीवार ‘तरबुजा मेला २०८२’ सम्पन्न भएको छ। वडास्तरीय कृषि सञ्जाल र महानगर कृषि विकास शाखाको सहकार्यमा आयोजित मेलामा तरबुजा प्रदर्शनी, निःशुल्क स्वाद परीक्षण, प्राविधिक सल्लाह, किसान अनुभव आदान–प्रदान, परिकार प्रदर्शनी, र बाली उपचार शिविर सञ्चालन गरिएको वडा अध्यक्ष किरण बरालले जानकारी दिए।
उनका अनुसार मेलाले कृषकको मेहनतलाई सम्मान गर्दै आत्मनिर्भरता अभिवृद्धि गर्ने लक्ष्य लिएको छ।
७.८६ किलोको तरबुजा, पाँच हजार नगद पुरस्कार
मेलामा प्रदर्शनीका लागि ल्याइएका तरबुजामध्ये तिखेढुङ्गाको रमेश आचार्य र ज्ञानबहादुर कार्कीले फलाएको तरबुजा सबैभन्दा ठूलो देखियो — ७ किलो ८६० ग्राम। उनीहरूलाई नगद पाँच हजार रुपैयाँ पुरस्कार दिइयो।
अन्य प्रतियोगिताका नतिजा
तरबुजा खाने प्रतियोगितामा रवि बराल र विमला श्रेष्ठ क्रमशः पहिलो र दोस्रो भए। उनीहरूलाई ९ र ६ किलो तौलका तरबुजा पुरस्कारस्वरूप प्रदान गरियो।
तरबुजा प्रदर्शनीतर्फ उत्कृष्टता पुरस्कार मणिद्विप कृषि फर्म (पोखरा–१३) का श्रीधरलाल बराल र रोशन बरालले पाए। दोस्रो पिपलडाली पशु तथा कृषक समूह (पोखरा–२८) का शोवितबहादुर अधिकारी, तेस्रो सूर्यचन्द्र कृषक समूह (पोखरा–१३) का विश्वराज सापकोटा, र सान्त्वना पुरस्कार चण्डेश्वरी कृषि सहकारी संस्था (पोखरा–१३) का रामकाजी बरालले प्राप्त गरे।
उनीहरूलाई क्रमशः पाँच हजार, चार हजार, तीन हजार र एक हजार रुपैयाँ नगद पुरस्कार प्रदान गरिएको थियो।
