काठमाडौं । अमेरिकी राष्ट्रपति डोनाल्ड ट्रम्पले हार्वर्ड विश्वविद्यालयबाट १ अर्ब डलर क्षतिपूर्ति माग गर्ने घोषणा गरेका छन्। यो कदम ट्रम्प प्रशासन र हार्वर्ड विश्वविद्यालयबीच चलिरहेको द्वन्द्वको पछिल्लो कडीका रूपमा आएको हो।
यो घोषणा यस्तो समयमा भएको छ, जब न्यूयोर्क टाइम्स ले ट्रम्प प्रशासनले विश्वविद्यालयसँगको वार्ताका क्रममा सुरुमा राखिएको २० करोड डलरको मागबाट पछि हट्नुपरेको जनाएको थियो।
सोमबार राति सामाजिक सञ्जाल ट्रुथ सोसल मा पोस्ट गर्दै ट्रम्पले उक्त रिपोर्टको सन्दर्भ दिँदै हार्वर्ड विश्वविद्यालयले न्यूयोर्क टाइम्स लाई गलत र भ्रामक जानकारी दिएको आरोप लगाएका छन्।
ट्रम्प प्रशासनका अधिकारीहरूले हार्वर्ड विश्वविद्यालयले प्यालेस्टिनी समर्थक प्रदर्शनका क्रममा भएका यहूदी विरोधी घटनाहरूलाई पर्याप्त रूपमा सम्बोधन नगरेको आरोप लगाउँदै आएका छन्। तर विश्वविद्यालयले यी आरोपहरू अस्वीकार गर्दै आएको छ।
यसअघि गत वर्ष अप्रिलमा ट्रम्प प्रशासनले हार्वर्ड विश्वविद्यालयलाई दिइँदै आएको करिब २ अर्ब डलर बराबरको अनुसन्धान अनुदान र संघीय कोष निलम्बन गरेको थियो।
