काठमाडौं। अमेरिकी राष्ट्रपति डोनाल्ड ट्रम्पले आफ्नी नजिककी सहयोगी तथा कट्टर समर्थक महान्यायाधिवक्ता प्याम बोन्डीलाई पदबाट हटाएका छन्। उनले आफ्नो सामाजिक सञ्जालमार्फत जानकारी दिँदै बोन्डी अब निजी क्षेत्रमा नयाँ भूमिकामा रहने बताएका छन्।
बोन्डीको स्थानमा उनका सहायक टोड ब्लान्चले अब न्याय विभागको नेतृत्व सम्हाल्नेछन्। बोन्डीले यो पदमा काम गर्न पाउनु आफ्नो जीवनकै ठूलो सम्मान भएको बताउँदै आगामी दिनमा पनि ट्रम्प प्रशासनका लागि काम गरिरहने बताएकी छिन्।
बोन्डीको बहिर्गमनलाई यौन अपराधी जेफ्री एपस्टिनसँग सम्बन्धित कागजातहरूको व्यवस्थापनमा देखिएको विवादसँग जोडेर हेरिएको छ। पद सम्हाल्दा उनले उक्त प्रकरणमा पारदर्शिता अपनाउने र सम्बन्धित व्यक्तिहरूको सूची सार्वजनिक गर्ने वाचा गरेकी थिइन्, तर पछि सरकारले त्यस्तो कुनै सूची नै नरहेको दाबी गरेको थियो।
चौतर्फी दबाबपछि धेरै कागजात सार्वजनिक गरिए पनि तीमध्ये पीडितहरूको पहिचान खुलाइएको र दोषीलाई जोगाउन खोजिएको आरोप लाग्दै आएको थियो। यस विषयमा दुवै पक्षका सांसदहरूले उनको कडा आलोचना गरेका थिए।
पछिल्लो समय संसदीय सुनुवाइका क्रममा पनि बोन्डी विवादमा परेकी थिइन्। एक सांसदलाई उनले “बेकार भइसकेको हारेको मान्छे” भनेको विषयले थप आलोचना निम्त्याएको थियो। सार्वजनिक रूपमा ट्रम्पले उनको बचाउ गरे पनि भित्री रूपमा उनीसँग असन्तुष्ट हुँदै गएको बताइन्छ।
बोन्डीले आफ्नो कार्यकालमा ट्रम्पका राजनीतिक विरोधीहरूमाथि कडा छानबिन अघि बढाएकी थिइन्। तर, ट्रम्पले अझ आक्रामक रूपमा अघि बढ्न दबाब दिएको चर्चा पनि भएको छ।
उनको बिदाइप्रति मिश्रित प्रतिक्रिया आएको छ। केही नेताहरूले उनको कामको प्रशंसा गरेका छन् भने केहीले एपस्टिन प्रकरणका कागजात लुकाएर ट्रम्पलाई नै क्षति पुर्याएको आरोप लगाएका छन्।
यस घटनालाई लिएर एक सांसदले संसद् कसैको खेलौना नभएको बताएका छन्। ट्रम्पको दोस्रो कार्यकालमा पद गुमाउने बोन्डी तेस्रो उच्च अधिकारी हुन्। यसअघि आन्तरिक सुरक्षा प्रमुख र राष्ट्रिय सुरक्षा सल्लाहकारले पनि पद छोडिसकेका छन्।
