काठमाडौं । अमेरिकाको संघीय अनुसन्धान ब्युरो (एफबीआई)ले पूर्व राष्ट्रपति डोनाल्ड ट्रम्पमाथि गोली हान्ने व्यक्ति २० वर्षका थोमस म्याथ्यू क्रक्स भएको बताएको छ । उनी ट्रम्पकै पार्टीको दर्तावाल सदस्यसमेत रहेको प्रहरीले बताएको छ।
थोमस म्याथ्यू क्रूक्स पिट्सबर्गको उपनगर बेथेल पार्कमा बस्थे । उनी बस्ने ठाउँ ट्म्पलाई गोली हानिएको ठाउँबाट करिब ३५ माइल दक्षिणमा पर्छ ।
स्थानीय मिडिया रिपोर्टका अनुसार उनले सन् २०२२ मा बेथेल पार्क हाई स्कुलबाट स्नातक गरेका थिए। विद्यालयमा त्यतिबेला भएको कार्यक्रमको भिडियोबाट यो कुरा पुष्टि गर्न सकिने सीएनएनले जनाएको छ ।
पेन्सिलभेनियाको मतदाता डेटाबेसमा उनको नाम, उमेर र बेथेल पार्क ठेगानासँग मेल खाने सूची भेटिएको छ । यो सूचीअनुसार उनी डेटाबेसमा रिपब्लिकन मतदाताको रूपमा सूचीकृत थिए । यस वर्षको राष्ट्रपति चुनाव उनले मतदान गर्न पाउने पहिलो निर्वाचन हुने थियो।
क्रुकको नाम ठेगाना सहित सबै विवरणहरू मेल खाने दाताले जनवरी २०२१ मा प्रोग्रेसिभ टर्नआउट प्रोजेक्ट भनिने डेमोक्र्याटिक-एलाइन्ड राजनीतिक कार्य समितिलाई १५ डलर दिएको सङ्घीय निर्वाचन आयोगको रेकर्डले देखाउँछ। यो दान उनले नै दिएको मानिएको छ ।
शनिबार राति सिएनएनले सम्पर्क गर्दा क्रूक्सका बुबा म्याथ्यू क्रूक्सले उनी “के भइरहेको छ” भनेर पत्ता लगाउने प्रयास गरिरहेको तर आफ्नो छोराको बारेमा कुरा गर्नु अघि “कानून प्रवर्तनसँग कुरा नगरेसम्म पर्खने” बताएका थिए ।
कानुन प्रवर्तन अधिकारीहरूका अनुसार सिक्रेट सर्भिसका एजेन्टहरूद्वारा मारिनुभन्दा केही अघि र्यालीको सुरक्षा परिधि बाहिर नजिकैको भवनको छतमा बसेको बेला क्रुक्सले ट्रम्पमाथि गोली हानेका थिए।
उनको शरीरमा उनलाई सजिलै चिन्न सकिने कुनै पहिचान थिएन । त्यसैले एजेन्टहरूले उनको पहिचानला लागि मारिएका आक्रमणकारीको डीएनए रिपोर्ट र बायोमेट्रिक पुष्टि गर्नुपरेको एफबीआईको पिट्सबर्ग फिल्ड अफिसका प्रभारी विशेष एजेन्ट केभिन रोजेकले पत्रकार सम्मेलनमा बताए ।
आक्रमणमा र्यालीमा सहभागी एकजनाको मृत्यु भएको थियो भने अन्य दुई जना गम्भीर घाइते भएका थिए।
