गत २०८० चैत १३ गते सर्वोच्च अदालतले बीएण्डसी मेडिकल कलेजलाई सम्बन्धन दिन परमादेश जारी गरेपछि काठमाडौँ विश्वविद्यालयले सम्बन्धन प्रदान गरेको हो। चिकित्सा शिक्षा आयोगले चालु शैक्षिक सत्रका लागि कलेजलाई ५० विद्यार्थी भर्ना गर्न सिट तोकेको छ। कलेजले नियमानुसार विद्यार्थी भर्ना प्रक्रिया सञ्चालन गरिरहेको छ भनी जनसम्पर्क अधिकृत प्रमेश गिरीले जानकारी दिनुभयो।
कलेजले पहिलो वर्षका लागि ५० विद्यार्थीलाई अध्यापन गराउन आवश्यक जनशक्ति, भौतिक पूर्वाधार, र शैक्षिक सामग्रीको व्यवस्थापन पूरा गरेको जनाएको छ। मेचीनगर नगरपालिका–१२ धाइजनमा पाँचतले ‘बेसिक साइन्स ब्लक’ निर्माण गरिएको छ भने ‘क्लिनिकल साइन्स’का लागि विर्तामोड नगरपालिका–५ स्थित बीएण्डसी हस्पिटलमा व्यवस्था मिलाइएको छ।
“एमबिबीएस पठनपाठनका लागि धेरै वर्षअघिदेखि तयारी अवस्थामा थियौँ,” जनसम्पर्क अधिकृत गिरीले भन्नुभयो। “धाइजनमा सुविधासम्पन्न साइन्स ब्लक तयार छ। विद्यार्थीले अभ्यासका लागि बीएण्डसी अस्पताल नै प्रयोग गर्न पाउनेछन्।”
कलेजले एकै समयमा १५० विद्यार्थीलाई सहज रूपमा पठनपाठन गराउन सक्ने पूर्वाधार तयार पारेको जनाएको छ।
