जनकपुर: सत्तारुढ नेपाली कांग्रेसले मधेश प्रदेश सरकारमाथि स्वास्थ्य क्षेत्रप्रति पूर्वाग्रही रवैया अपनाएको आरोप लगाउँदै मुख्यमन्त्री र स्वास्थ्य तथा जनसंख्यामन्त्रीको ध्यानाकर्षण गराएको छ।
मधेश प्रदेशमा कांग्रेस संसदीय दलका उपनेता एवं पूर्वमन्त्री वीरेन्द्र प्रसाद सिंहले मुख्यमन्त्री सतीशकुमार सिंह र स्वास्थ्य तथा जनसंख्या मन्त्री शत्रुधन प्रसाद सिंहलाई ज्ञापनपत्र बुझाउँदै अस्पताल सञ्चालनमा भइरहेको ढिलाइप्रति गम्भीर ध्यान दिन आग्रह गरेका छन्।
२०८० मंसिर १८ गतेको मन्त्रिपरिषद् बैठकले ६ वटा जिल्ला अस्पताललाई १०० शैय्यामा स्तरोन्नति गर्ने र ५ वटा नयाँ ५० शैय्याका अस्पताल सञ्चालन गर्ने निर्णय गरे पनि अहिलेसम्म उक्त निर्णय कार्यान्वयनमा नआएको उपनेता सिंहको आरोप छ। उनका अनुसार आवश्यक जनशक्तिका लागि अस्थायी दरबन्दी स्वीकृत भइसकेको र विज्ञापनमार्फत कर्मचारी छनोट समेत सम्पन्न भइसकेको अवस्थामा पनि अस्पताल सञ्चालनमा चासो नदिइएको हो।
सिंहले स्वास्थ्य मन्त्रालयको लापरवाही र अस्पताल सञ्चालन नगर्ने नियतकै कारण नागरिकहरू स्वास्थ्य सेवाबाट वञ्चित भएको दाबी गरेका छन्। ज्ञापनपत्रमा उल्लेख छ, “दरबन्दीअनुसारको जनशक्ति खटाएर ती अस्पतालहरू यथाशीघ्र सञ्चालन गर्नुपर्छ।”
कांग्रेसले खासगरी दूरदराजका जिल्लाहरूमा स्वास्थ्य सेवा पहुँचमा गम्भीर असर परिरहेको उल्लेख गर्दै प्रदेश सरकारलाई तत्काल कदम चाल्न आग्रह गरेको छ।
