काठमाडौं: भारतको ओडिसा राज्य स्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा नेपाली विद्यार्थीहरूको सुरक्षा सुनिश्चित गर्न नेपाल प्रहरीको एक टोली पुगेको छ।
परराष्ट्रमन्त्री आरजु राणा देउवाले मंगलबार बिहान जानकारी दिनुभएको छ कि नेपाल प्रहरीका दुई वरिष्ठ अधिकारी विद्यालय पुगेर नेपाली विद्यार्थीहरूको स्थिति मूल्याङ्कन गरिरहेका छन्। यो घटनाका क्रममा बुटवलकी प्रकृति लम्साल शंकास्पद तरिकाले मृत अवस्थामा भेटिएकी थिइन्, जसपछि स्थिति तनावपूर्ण बनेको हो।
नेपाली विद्यार्थीहरूको सुरक्षा र सहजताका लागि नेपाली राजदूतावास, नयाँ दिल्लीले नेपाल प्रहरीका वरिष्ठ अधिकारीहरूलाई आज बिहानै विश्वविद्यालय पठाएको परराष्ट्रमन्त्री राणाले बताउनुभयो।
‘घटनाको निष्पक्ष अनुसन्धानका लागि भारतीय सुरक्षाकर्मीहरूसँग समन्वय गर्न र नेपाली विद्यार्थीहरूलाई आवश्यक सहयोग पुर्याउन विश्वविद्यालय प्रशासनसँग समन्वय गर्न निर्देशन दिइएको छ,’ मन्त्री राणाले बताउनुभयो।
यस विषयमा नेपाली दूतावास दिल्लीले आवश्यक पहल गरिरहेको जानकारी पनि उहाँले दिनुभएको छ। हिजोको कूटनीतिक प्रयासपछि कलेजले विद्यार्थिहरूलाई होस्टलमा फर्कन आग्रह गरेको छ।
