गाजा: हमासद्वारा सञ्चालित स्वास्थ्य मन्त्रालयका अनुसार गाजामा जारी इजरायली सैन्य आक्रमणमा ५० हजारभन्दा बढी प्यालेस्टिनी मारिएका छन्। मन्त्रालयले हालसम्म ५०,०२१ जनाको मृत्यु भएको जनाएको छ।
यो सङ्ख्या युद्धअघि गाजाको २३ लाख जनसंख्याको करिब २.१ प्रतिशत हो, अर्थात् प्रत्येक ४६ जनामध्ये १ जना मारिएको छ। मन्त्रालयका अनुसार युद्धका क्रममा १ लाख १३ हजार २७४ जना घाइते भएका छन्।
गाजामा हमासद्वारा सञ्चालित स्वास्थ्य मन्त्रालयको तथ्याङ्कलाई संयुक्त राष्ट्रसंघ तथा अन्तर्राष्ट्रिय संस्थाहरूले सामान्यतया सन्दर्भका रूपमा प्रयोग गर्छन्। तर, इजरायलले गाजा प्रशासनले सार्वजनिक गर्ने तथ्याङ्कमाथि निरन्तर प्रश्न उठाउँदै आएको छ।
संयुक्त राष्ट्रसंघको मानव अधिकार कार्यालयले नोभेम्बरमा सार्वजनिक गरेको विवरणअनुसार, युद्धको पहिलो छ महिनामा मारिएकामध्ये करिब ७० प्रतिशत महिला र बालबालिका थिए।
गाजामा युद्धका कारण व्यापक मानवीय संकट उत्पन्न भएको छ। लाखौँ मानिस विस्थापित भएका छन्, जबकि खाद्य संकट गहिरिँदै गएको छ। संयुक्त राष्ट्रसंघले गाजामा गम्भीर खाद्य अभावका कारण लाखौँ मानिस भोकमरीको जोखिममा रहेको चेतावनी दिएको छ।
