काठमाडौँ: गैरआवासीय नेपाली संघ (एनआरएनए)को एकता महाधिवेशन वैशाख २० गतेदेखि हुने तय भए पनि यसको भविष्य सर्वोच्च अदालतको निर्णयमा निर्भर बनेको छ। एनआरएनएको ११ औँ महाधिवेशनबाट निर्वाचित अध्यक्ष बद्री केसीले परराष्ट्र मन्त्रालयलगायतलाई विपक्षी बनाएर दायर गरेको मुद्दा अझै टुंगोमा पुग्न सकेको छैन।

केसीले दायर गरेको मुद्दा बुधबार चौथो दिन पनि सर्वोच्च अदालतमा पेसीमा परेको थियो। तर न्यायाधीशद्वय तिल प्रसाद श्रेष्ठ र बालकृष्ण ढकालको संयुक्त इजलासमा मुद्दा हेर्न नमिल्ने भन्दै पुनः स्थगित भयो।

अब बिहीबार सार्वजनिक बिदा परेकाले शुक्रबार मात्र अदालत खुल्नेछ। तर उक्त दिन एनआरएनएको मुद्दामा पेसी रहने नहुनेबारे सर्वोच्चले अहिलेसम्म तारेख तोकेको छैन।

केसीले एकता महाधिवेशन रोक्न माग गर्दै अन्तरिम आदेशको माग गरेका छन्। उनले वैशाख १२ गते दायर गरेको रिटको पहिलो सुनुवाइ वैशाख १४ गते न्यायाधीश नित्यानन्द पाण्डेयको एकल इजलासमा भएको थियो। सो इजलासले एनआरएनएको एकता महाधिवेशन तोकिएको मितिमा रोक्नुपर्ने भन्दै दायर अर्को रिटसँग संयुक्तरूपमा सुनुवाइ गर्न आदेश दिएको थियो।

तर त्यसयता निरन्तर रूपमा सुनुवाइ स्थगित हुँदै आएको छ। विभिन्न इजलासहरूले मुद्दा हेर्न नमिल्ने भन्दै टार्दै आएपछि बुधबार पनि सुनुवाइ हुन सकेन।

यसैबीच, महाधिवेशनको पक्षमा रहेका राजेश शमशेर राणाले पनि परराष्ट्र मन्त्रालयको पत्राचारका आधारमा एकता महाधिवेशन सार्न खोजिएको भन्दै सर्वोच्चमा निवेदन दर्ता गरेका थिए। सो निवेदनसमेत केसीको मुद्दासँग जोडेर सुनुवाइ हुँदै आएको हो।

यसअघि २०८० चैत २१ गते सर्वोच्च अदालतले शेष घलेको नेतृत्वमा एकताको महाधिवेशन गराउन परमादेश दिएको थियो। तर, त्यसअघि नै बद्री केसी एनआरएनएको ११ औँ महाधिवेशनबाट निर्वाचित भइसकेका थिए। परमादेशपछि परराष्ट्र मन्त्रालयले केसीलाई काम रोक्न निर्देशन दिएपछि उनी अदालत पुगेका थिए। अदालतले २०८१ साउनमा उनलाई काम गर्ने बाटो खुला गरिदिएको थियो।

यतिबेला घले पक्षले वैशाख २० मा हुने भनिएको एकता महाधिवेशन अन्तिम तयारीमा पुर्‍याएको छ भने सयौँ एनआरएनहरू काठमाडौँमा भेला भइसकेका छन्। उनीहरूले ठूलो खर्च गरेर नेपाल आइपुगेको भन्दै महाधिवेशन रोक्न नहुने अडान लिएका छन्।

तर, केसी पक्षले भने घलेले एकपक्षीय रूपमा महाधिवेशन गरेर संस्था विभाजन गर्न खोजेको आरोप लगाउँदै आगामी अक्टोबरमा मात्र महाधिवेशन गरिनुपर्ने र त्यसैलाई एकता महाधिवेशन बनाउनुपर्ने तर्क राखेको छ।

यसरी अदालती अन्योलका कारण एनआरएनएको नेतृत्व र महाधिवेशन दुबै अनिश्चित अवस्थामा पुगेका छन्।

काठमाडौँ: हाल देशभर पश्चिमी वायु, स्थानीय वायु र बङ्गालको खाडीबाट भित्रिएको जलवाष्पयुक्त हावाको संयुक्त प्रभाव रहेको मौसम पूर्वानुमान महाशाखाले जनाएको छ।

यसको असरस्वरूप कोशी प्रदेश लगायत देशका पहाडी भूभागमा आंशिकदेखि सामान्य बदली रही बाँकी भूभागमा मौसम मुख्यतः सफा वा आंशिक बदली भएको छ। कोशी प्रदेशका केही स्थानहरूमा चट्याङसहित हल्का वर्षा भइरहेको छ।

आज दिउँसोको पूर्वानुमान अनुसार:
देशका पहाडी भूभागमा आंशिकदेखि सामान्य बदली रहनुका साथै अन्य भूभागमा आंशिक बदली रहनेछ। पहाडी क्षेत्रमा थोरै स्थानहरूमा र अन्य भूभागका एक–दुई स्थानमा चट्याङ्गसहित हल्कादेखि मध्यम वर्षा हुन सक्ने सम्भावना छ। कोशी, बागमती, गण्डकी र कर्णाली प्रदेशका हिमाली क्षेत्रका थोरै स्थानहरूमा हल्का वर्षासँगै हिमपातको सम्भावना छ। साथै, लुम्बिनी प्रदेशको तराई क्षेत्रमा हावाहुरी चल्ने सम्भावना पनि रहेको छ।

आज रातिको पूर्वानुमान अनुसार:
कोशी, बागमती र गण्डकी प्रदेशको पहाडी भूभागका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशको पहाडी भागमा एक–दुई स्थानमा चट्याङ्गसहित हल्कादेखि मध्यम वर्षा हुन सक्छ। कोशी, बागमती र गण्डकी प्रदेशका हिमाली भूभागका एक–दुई स्थानमा हिमपातको सम्भावना छ।

मौसम पूर्वानुमान महाशाखाले दैनिक जनजीवन, कृषि, स्वास्थ्य, सडक तथा हवाई यातायातमा सम्भावित असर पर्ने भएकाले आवश्यक सतर्कता अपनाउन सर्वसाधारणलाई अनुरोध गरेको छ।

काठमाडौँ: नेपाल राष्ट्र बैंकले आजका लागि विदेशी मुद्राको विनिमय दर सार्वजनिक गरेको छ। राष्ट्र बैंकका अनुसार आज अमेरिकी डलर एकको खरिद दर १३६ रुपैयाँ १३ पैसा र बिक्री दर १३६ रुपैयाँ ७३ पैसा निर्धारण गरिएको छ।

युरोपियन युरो एकको खरिद दर १५४ रुपैयाँ ९४ पैसा र बिक्री दर १५५ रुपैयाँ ६३ पैसा, युके पाउन्ड स्ट्रलिङ एकको खरिद दर १८२ रुपैयाँ २५ पैसा र बिक्री दर १८३ रुपैयाँ ०५ पैसा, स्वीस फ्र्याङ्क एकको खरिद दर १६४ रुपैयाँ ९९ पैसा र बिक्री दर १६५ रुपैयाँ ७१ पैसा कायम गरिएको छ।

त्यसैगरी, अष्ट्रेलियन डलर एकको खरिद दर ८७ रुपैयाँ १२ पैसा र बिक्री दर ८७ रुपैयाँ ५१ पैसा, क्यानेडियन डलर एकको खरिद दर ९८ रुपैयाँ ३० पैसा र बिक्री दर ९८ रुपैयाँ ७३ पैसा, सिङ्गापुर डलर एकको खरिद दर १०३ रुपैयाँ ९२ पैसा र बिक्री दर १०४ रुपैयाँ ३८ पैसा रहेको छ।

जापानी येन (१० को दरमा) खरिद दर ९ रुपैयाँ ५५ पैसा र बिक्री दर ९ रुपैयाँ ५९ पैसा, चिनियाँ युआन एकको खरिद दर १८ रुपैयाँ ७२ पैसा र बिक्री दर १८ रुपैयाँ ८० पैसा, साउदी रियाल एकको खरिद दर ३६ रुपैयाँ २९ पैसा र बिक्री दर ३६ रुपैयाँ ४५ पैसा, कतारी रियाल एकको खरिद दर ३७ रुपैयाँ ३५ पैसा र बिक्री दर ३७ रुपैयाँ ५१ पैसा तय गरिएको छ।

यस्तै, थाई भाट एकको खरिद दर ४ रुपैयाँ ०७ पैसा र बिक्री दर ४ रुपैयाँ ०९ पैसा, युएई दिराम एकको खरिद दर ३७ रुपैयाँ ०६ पैसा र बिक्री दर ३७ रुपैयाँ २२ पैसा, मलेसियन रिङ्गेट एकको खरिद दर ३१ रुपैयाँ ४६ पैसा र बिक्री दर ३१ रुपैयाँ ६० पैसा, साउथ कोरियन वन (१०० को दरमा) खरिद दर ९ रुपैयाँ ४८ पैसा र बिक्री दर ९ रुपैयाँ ५२ पैसा रहेको छ।

स्विडिस क्रोनर एकको खरिद दर १४ रुपैयाँ १२ पैसा र बिक्री दर १४ रुपैयाँ १८ पैसा, डेनिस क्रोनर एकको खरिद दर २० रुपैयाँ ७६ पैसा र बिक्री दर २० रुपैयाँ ८५ पैसा निर्धारण गरिएको छ।

हङकङ डलर एकको खरिद दर १७ रुपैयाँ ५५ पैसा र बिक्री दर १७ रुपैयाँ ६२ पैसा, कुवेती दिनार एकको खरिद दर ४४४ रुपैयाँ ५५ पैसा र बिक्री दर ४४६ रुपैयाँ ५१ पैसा, बहराइन दिनार एकको खरिद दर ३६१ रुपैयाँ १२ पैसा र बिक्री दर ३६२ रुपैयाँ ७१ पैसा, ओमनी रियाल एकको खरिद दर ३५३ रुपैयाँ ५९ पैसा र बिक्री दर ३५५ रुपैयाँ १५ पैसा कायम भएको छ।

भारतीय रुपैयाँ १०० को खरिद दर १६० रुपैयाँ र बिक्री दर १६० रुपैयाँ १५ पैसा तोकिएको छ।

राष्ट्र बैंकले यो विनिमय दर आवश्यकता अनुसार जुनसुकै समयमा परिवर्तन गर्न सकिने जनाएको छ। वाणिज्य बैंकले तोक्ने विनिमय दर फरक हुन सक्ने र अद्यावधिक दर राष्ट्र बैंकको वेबसाइटमा उपलब्ध हुने जानकारी दिइएको छ।

काठमाडौं: पाकिस्तानले नियन्त्रण रेखा (LoC) मा आफ्नो हवाई क्षेत्र उल्लङ्घन गरेको भारतीय जासूसी ड्रोन खसालेको दाबी गरेको छ।

सरकारी रेडियोले पाकिस्तानी सुरक्षा स्रोतहरूलाई उद्धृत गर्दै जनाएअनुसार भारतले भाम्भरको मनावर सेक्टरमा ड्रोन प्रयोग गरी जासूसी गर्ने प्रयास गरेको थियो।

भारत सरकारबाट भने हालसम्म यस विषयमा कुनै आधिकारिक प्रतिक्रिया आएको छैन।

गत अप्रिल २२ मा जम्मु–कश्मीरको पहलगाममा भएको आतंकवादी आक्रमणमा २६ जनाको ज्यान गएको थियो। त्यसपश्चात भारतले पाकिस्तानविरुद्ध कडा प्रतिक्रिया स्वरूप सिन्धु जल सन्धि निलम्बन, अटारी सीमा बन्द, र भिसा सुविधा फिर्ता जस्ता कदमहरू चालेको थियो।

जवाफमा, पाकिस्तानले पनि शिमला सम्झौतालगायत दुई देशबीचका सबै द्विपक्षीय सम्झौता निलम्बन गर्ने घोषणा गर्दै हवाई र स्थल सीमा बन्द, व्यापार स्थगन, तथा भारतलाई आफ्नो हवाई क्षेत्र प्रयोगमा प्रतिबन्ध लगाएको छ।

भारतजस्तै पाकिस्तानले पनि भारतीय रक्षा सल्लाहकार र उनीसँगै रहेका कर्मचारीहरूलाई देश छाड्न निर्देशन दिएको छ भने भारतीय कूटनीतिक कर्मचारीहरूको संख्या समेत घटाएको छ।

यसैबीच, पाकिस्तानको राष्ट्रिय सुरक्षा परिषद्ले भारतद्वारा सिन्धु जल सन्धि निलम्बन गर्ने निर्णयलाई अस्वीकार गरेको छ। परिषद्ले सन्धिअनुसार पाकिस्तानलाई तोकिएको पानीको प्रवाह रोक्ने वा मोड्ने कुनै पनि प्रयासलाई “युद्धको कार्य” मानिने र त्यसको जवाफ “पूर्ण शक्तिका साथ” दिइने चेतावनी दिएको छ।

काठमाडौं: अदालतको अवहेलनासम्बन्धी मुद्दामा नेपाली कांग्रेसका महामन्त्री गगन थापासँग सर्वोच्च अदालतले लिखित जवाफ माग गरेको छ।

कायममुकायम प्रधानन्यायाधीश सपना मल्ल प्रधान र न्यायाधीश नित्यानन्द पाण्डेयको संयुक्त इजलासले थापालाई लिखित स्पष्टीकरण पेश गर्न आदेश दिएको हो।

थापाले गत बिहीबार एक सार्वजनिक कार्यक्रममा ५२ संवैधानिक नियुक्तिसम्बन्धी मुद्दा सर्वोच्च अदालतले किनार नलगाएर ‘डिल’ गरिरहेको आरोप लगाएका थिए।

उनको उक्त अभिव्यक्तिपछि अधिवक्ताहरू विशाल थापा, अनन्तराज लुइँटेल र प्रतिभा उप्रेतीले आइतबार सर्वोच्च अदालतमा थापाविरुद्ध अदालतको अवहेलनाको मुद्दा दायर गरेका थिए।