काठमाडौं: काठमाडौं जिल्ला अदालतले स्वर्णलक्ष्मी सहकारी बचत अपचलन मुद्दामा राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेलाई ६० लाख रुपैयाँ धरौटीमा रिहा गर्न आदेश दिएको छ।
बुधबार न्यायाधीश माधवप्रसाद अधिकारीको इजलासले लामिछानेलाई धरौटीमा रिहा गर्ने आदेश जारी गरेको हो।
यसअघि, सूर्य दर्शन सहकारी ठगी प्रकरणमा गत कार्तिक २ गते पक्राउ परेका लामिछाने ८४ दिनपछि गत बिहीबार पोखराबाट ६५ लाख धरौटी बुझाएर छुटेका थिए। त्यहाँबाट छुटेपछि काठमाडौं जिल्ला अदालतमा शुक्रबार हाजिर हुन भनिए पनि समय अभावका कारण उनी उपस्थित हुन सकेनन्।
आइतबारदेखि अदालतमा हाजिर रहेका लामिछानेलाई विगत तीन दिनदेखि हिरासतमा राखिएको थियो। अन्ततः अदालतले बुधबार ६० लाख धरौटीमा उनलाई रिहा गर्न आदेश दिएको हो।
स्वर्णलक्ष्मी बहुउद्देश्यीय सहकारी संस्थामा रकम अपचलनसम्बन्धी मुद्दामा लामिछानेलाई प्रतिवादी बनाइएको थियो। उक्त प्रकरणमा जिल्ला प्रहरी परिसर, काठमाडौंले गत पुस २१ गते लामिछानेसहित ३९ जनालाई प्रतिवादी बनाउँदै मुद्दा दर्ता गर्न सुझाव दिएको थियो। त्यसपछि सरकारी वकिल कार्यालयले उनीहरूमाथि मुद्दा दर्ता गरेको हो।
उनीहरूमाथि सहकारीका ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप छ।
