काठमाडौं: राष्ट्रपति रामचन्द्र पौडेलले विकास र समृद्धिको आकांक्षा पूरा गर्नेतर्फ अग्रसर हुनु नै सहिदप्रतिको सच्चा श्रद्धाञ्जली हुने बताउनुभएको छ। सहिद दिवसका अवसरमा शुभकामना सन्देश दिँदै उहाँले सहिदहरूको बलिदानले प्राप्त संघीय लोकतान्त्रिक गणतन्त्रको माध्यमबाट दिगो शान्ति, सुशासन र समृद्धि हासिल गर्नु नै उनीहरूप्रतिको सम्मान हुने उल्लेख गर्नुभएको हो।
“सहिद दिवसको अवसरमा नागरिक स्वतन्त्रता, लोकतन्त्रको स्थापना र राष्ट्रियताको रक्षाका लागि आफ्नो जीवन बलिदान गर्नुभएका शुक्रराज शास्त्री, धर्मभक्त माथेमा, दशरथ चन्द, गङ्गालाल श्रेष्ठलगायत सम्पूर्ण ज्ञात–अज्ञात अमर सहिदहरूप्रति भावपूर्ण श्रद्धाञ्जली अर्पण गर्दछु,” उहाँले भन्नुभएको छ।
राष्ट्रपति पौडेलले वीर सहिदहरूको बलिदानलाई उच्च मूल्याङ्कन गर्दै सहिदहरूको सपना पूरा गर्न सबैले इमान्दारीका साथ आफ्नो भूमिका निर्वाह गर्न प्रेरणा दिनुपर्ने बताउनुभयो।
सहिद दिवस सहिदहरूको बलिदानलाई विशेष सम्झना गर्ने दिन भएको उल्लेख गर्दै उहाँले प्रजातान्त्रिक क्रान्ति, पञ्चायती व्यवस्था र राजतन्त्रविरुद्धको आन्दोलनमा जीवन अर्पण गर्ने वीर वीरङ्गानाहरूको योगदान नेपाली जनताले सदैव स्मरण गर्ने बताउनुभयो।
“यस दिवसले सम्पूर्ण राजनीतिक दल, आम नागरिक र सरोकारवालालाई सहिदहरूको आकांक्षा साकार पार्न मन, वचन र कर्मले समर्पित हुन प्रेरणा दिन सकोस्,” राष्ट्रपति पौडेलले शुभकामना सन्देशमा उल्लेख गर्नुभएको छ।
