काठमाडौँ । जिल्ला सरकारी वकिल कार्यालय काठमाडौँले सर्वोच्च अदालत, सिंहदरबार तथा विभिन्न प्रहरी कार्यालयमा आगजनी र तोडफोडमा संलग्न १३ जनाविरुद्ध मंगलबार जिल्ला अदालत काठमाडौँमा मुद्दा दर्ता गरेको छ।
गत भदौ २४ गते भएको आन्दोलनका क्रममा आगजनी र विध्वंसात्मक गतिविधिमा संलग्न रहेको आरोपमा उनीहरूमाथि आपराधिक उपद्रव तथा डाँका सम्बन्धी कसुरमा अभियोग दायर गरिएको काठमाडौँ जिल्ला अदालतका सूचना अधिकारी दीपक अधिकारीले जानकारी दिए।
सर्वोच्च अदालतमा आगजनी गरेको अभियोगमा सुनिल श्रेष्ठ, ज्योति थापा, विनोदकुमार थापा मगर, कुमार पराजुली र राजु परियारविरुद्ध मुद्दा दर्ता गरिएको छ। अभियोगपत्रअनुसार उनीहरूले सर्वोच्च अदालत भवनमा आगजनी गरी एक अर्ब २३ करोड ६२ लाख ३८ हजार रुपैयाँ बराबरको क्षति पुर्याएका छन्।
त्यस्तै सिंहदरबार परिसरमा तोडफोड तथा आगजनीमा संलग्न रहेको आरोपमा आशिष गुरुङविरुद्ध पनि आपराधिक उपद्रव तथा डाँका सम्बन्धी कसुरमा मुद्दा दर्ता गरिएको छ।
प्रहरी वृत्त बौद्धमा आगजनी तथा तोडफोड गरेको आरोपमा समीर श्रेष्ठ र सुनिल तामाङविरुद्ध मुद्दा चलाइएको छ भने प्रहरी प्रभाग बलम्बुमा तोडफोड गरेको अभियोगमा निखिल कुसुले, सोहन चौधरी, विवेक रोक्का र छत्रबहादुर विकविरुद्ध पनि मुद्दा दायर गरिएको छ।
सर्वोच्च अदालतले उक्त घटनामा संलग्न व्यक्तिमाथि अनुसन्धान गरी कारबाहीको माग गर्दै काठमाडौँ प्रहरी परिसरमा जाहेरी दिएको थियो। सर्वोच्च प्रशासनको उजुरीका आधारमा प्रहरीले अनुसन्धान पूरा गरी अभियुक्तहरूविरुद्ध मुद्दा चलाएको हो।
