काठमाडौँ: सगरमाथा आरोहण गर्ने विश्वका नामचिन आरोहीहरूलाई एकै थलोमा ल्याउने अन्तर्राष्ट्रिय सम्मेलन ‘एभरेष्ट समिटर समिट’ पहिलोपटक नेपालमा आयोजना हुने भएको छ।
विश्वका सर्वोच्च शिखर सगरमाथाको सफल आरोहण गरेका आरोहीहरूको अनुभव साटासाट गर्न, साहसिक पर्यटन प्रवर्द्धन गर्न र हिमाली क्षेत्रमा परेको जलवायु परिवर्तनको प्रभावबारे छलफल गर्नका लागि एभरेष्ट एलाइन्स नेपालले आगामी जेठ १३ गते सम्मेलन आयोजना गर्न लागेको हो।
एभरेष्ट एलाइन्स नेपालका अध्यक्ष सुदर्शन नेपालका अनुसार हालसम्म १६ देशका १७७ जना आरोहीले सम्मेलनमा सहभागी हुन नाम दर्ता गराइसकेका छन्। आयोजकले विश्वभरबाट करिब पाँच सय आरोहीको सहभागिता रहने अपेक्षा गरिएको जनाएको छ।
भारत, चीन, अमेरिका, बेलायत, इटली, स्वीट्जरल्याण्ड, नर्वे, इरान, सिङ्गापुर, अष्ट्रेलिया, लेबनान, मोरक्को, युएईलगायत देशका आरोहीहरूको सहभागिता रहनेछ।
अध्यक्ष नेपालले सम्मेलनमा ७१ वर्षअघिदेखिका सगरमाथा आरोहीहरू, कीर्तिमानी तथा फरक क्षमता भएका आरोहीहरूको अनुभव आदानप्रदान र प्रस्तुति समेत हुने जानकारी दिनुभयो। उहाँले सगरमाथा आरोहणको सात दशक लामो इतिहासमा पहिलोपटक आयोजना हुने यो सम्मेलनमा सर एडमन्ड हिलारीसँगै सगरमाथा आरोहण गरेका कान्छा शेर्पालाई विशेष सम्मान गरिने उल्लेख गर्नुभयो।
सम्मेलनमा जलवायु परिवर्तनका कारण हिमाली क्षेत्रमा देखिएको असरबारे बृहत् छलफल हुनेछ भने आरोहणका क्रममा भोगिएका कठिनाइ र सफलताका अनुभव पनि साझा गरिनेछन्।
कार्यक्रममा डब्लुडब्लुएफ, इसिमोड, आइयुसिएन, समृद्ध पहाड जस्ता अन्तर्राष्ट्रिय संस्थासँगै आरोहीहरूबीच समूहगत छलफलको कार्यक्रमसमेत रहनेछ।
त्यस्तै, नाट्टा, टान, नेपाल पर्वतारोहण सङ्घ, होटल सङ्घ नेपाललगायत पर्यटन व्यवसायसँग सम्बन्धित संस्थाहरूको समन्वय र सहकार्यमा सम्मेलन आयोजना गरिँदैछ।
नाट्टाका पूर्वअध्यक्ष अच्युत गुरागाईंले यो सम्मेलनले नेपाललाई साहसिक पर्यटकीय गन्तव्यको रूपमा प्रवर्द्धन गर्न महत्त्वपूर्ण भूमिका खेल्ने विश्वास व्यक्त गर्नुभएको छ। सम्मेलनले नेपाल भ्रमणमा आउने र बढी खर्च गर्ने पर्यटकलाई आकर्षित गर्ने विश्वास पर्यटन व्यवसायीहरूले व्यक्त गरेका छन्।
