उल्भरह्याम्टन (बेलायत): नेपाली राजदूतावास लन्डनले बेलायतमा रहेका नेपाली सङ्घसंस्थालाई आफ्नो विवरण उपलब्ध गराउन आग्रह गरेको छ। दूतावासले आगामी पुस २३ गतेभित्र सम्पूर्ण विवरण अद्यावधिक गरी उपलब्ध गराउन अनुरोध गरेको हो।
नेपाली समुदायसँग सहकार्य गर्दै भविष्यमा आयोजना हुने कार्यक्रमलाई प्रभावकारी बनाउन विवरण संकलन र अध्यावधिक गर्न लागिएको दूतावासले जनाएको छ।
दूतावासद्वारा जारी सूचनामा भनिएको छ, “संयुक्त अधिराज्यमा हाल सक्रिय रहेका नेपाली सङ्घसंस्था/सङ्गठनको विवरण आवश्यक भएकाले सम्बन्धित लिङ्कमा गई ०७ जनवरी २०२५ भित्र आ-आफ्नो विवरण अद्यावधिक गरी उपलब्ध गराउन अनुरोध छ।”
दूतावासले बेलायतस्थित नेपाली समुदाय र सङ्घसंस्थासँग सहकार्य गरेर नेपाल र नेपालीको हितमा योगदान पुर्याउन चाहेको जनाएको छ। साथै, समुदायबाट कुनै रचनात्मक सुझाव वा सल्लाह भए, त्यसलाई पनि उपलब्ध गराउन आग्रह गरिएको छ।
