काठमाडौं: भौतिक पूर्वाधार तथा यातायातमन्त्री देवेन्द्र दाहालले वातावरणमैत्री सवारीसाधन र जनमुखी सडक निर्माण आवश्यक रहेको बताएका छन् ।
नाडा अटोमोबाइल्स डिलर एसोसिएसन (नाडा) द्वारा ललितपुरमा आयोजित ‘नाडा अटो डायलग’ समापन समारोहमा बोल्दै मन्त्री दाहालले पूर्वाधार विकास, रोजगारी अभिवृद्धि र स्वरोजगारी सिर्जनाजस्ता क्षेत्रमा उल्लेखनीय प्रगति भए पनि केही भएन भन्ने मानसिकता फैलाउने प्रयास भइरहेको टिप्पणी गरे।
“पूर्वाधारका साथै शिक्षा, स्वास्थ्य, सञ्चार र विद्युतीकरणलगायतका क्षेत्रमा नेपालले उल्लेख्य फड्को मारेको छ,” मन्त्री दाहालले भने।
समारोहमा भौतिक पूर्वाधार तथा यातायात मन्त्रालयका सचिव केशवकुमार शर्माले प्रदेश सरकारसँगको समन्वयमा यातायात क्षेत्रलाई व्यवस्थित पार्ने काम भइरहेको जानकारी दिए।
नाडाका अध्यक्ष करण चौधरीका अनुसार कार्यक्रममा अटोमोबाइल्स क्षेत्रमा संलग्न विज्ञहरू र सरकारी अधिकारीहरूले यातायात तथा अटोमोबाइल्ससम्बन्धी विभिन्न धारणा राखेका थिए।
