काठमाडौं: जनता समाजवादी पार्टी (जसपा) नेपालले लिम्बुवान राष्ट्रिय समितिको अधिवेशन आगामी जेठ ३१ गते शनिबार, सुनसरीको धरानमा गर्ने भएको छ।
पार्टीको पहिचानमा आधारित प्रादेशिक संरचना “१०+१” अन्तर्गत लिम्बुवान क्षेत्रको प्रतिनिधित्व गर्ने समितिको अधिवेशनमा ताप्लेजुङ, पाँचथर, इलाम, तेह्रथुम, र धनकुटा जिल्लाबाट प्रतिनिधिहरू सहभागी हुने छन्।
अधिवेशनको उद्घाटन जसपा अध्यक्ष उपेन्द्र यादवले गर्ने कार्यक्रम रहेको छ भने सह–अध्यक्ष रकम चेम्जोङ विशिष्ट वक्ताका रूपमा उद्घाटन सत्रमा उपस्थित रहने आयोजकले जनाएको छ।
पार्टीका अनुसार अधिवेशनबाट ३९ सदस्यीय नयाँ समिति चयन गरिनेछ, जसमा अध्यक्ष १, उपाध्यक्ष ३, मुख्य सचिव १, सचिव ३ र कोषाध्यक्ष १ हुने व्यवस्था छ।
पार्टीको प्रचार विभाग प्रमुख पूर्ण बस्नेतका अनुसार, पहिचानमा आधारित राष्ट्रिय समितिले राजनीतिक अधिकार, पहिचान र संघीयता सम्बन्धी विषयमा संघर्ष, संगठन र जागरण अभियानहरू सञ्चालन गर्ने जिम्मेवारी लिनेछ। यो व्यवस्था पार्टीको विधानमा स्पष्ट रूपमा उल्लेख गरिएको उहाँले जानकारी दिनुभयो।
