काठमाडौँ: नागरिक उन्मुक्ति पार्टी (नाउपा) का संरक्षक रेशम चौधरी पक्राउ परेका छन्। जनमत पार्टीसँग बुधबार तय भएको एकताअघि उनलाई काठमाडौँस्थित प्रज्ञा भवनबाट पक्राउ गरिएको हो।
चौधरी पार्टी एकता कार्यक्रममा सहभागी हुन प्रज्ञा भवन पुगेका बेला प्रहरीले उनलाई नियन्त्रणमा लिएको हो। नाउपा अध्यक्ष रञ्जिता श्रेष्ठले चौधरी पक्राउ परेको खबर आफूले पनि सुनेको बताउँदै यसबारे विस्तृत जानकारी लिने प्रयास भइरहेको बताइन्।
कैलालीको टिकापुर घटनामा सर्वोच्च अदालतले चौधरीलाई दोषी ठहर गर्दै कैद सजाय सुनाएको थियो। सो फैसला कार्यान्वयन गर्दै उनी जेलमा रहेका बेला सरकारले उनलाई आममाफी दिएको थियो। तर, पछिल्लो समय सार्वजनिक भएको सर्वोच्च अदालतको पूर्णपाठमा चौधरीलाई आममाफी दिन नमिल्ने उल्लेख गरिएको छ। त्यसैको आधारमा अदालतले आदेश दिएपछि काठमाडौँ प्रहरीले उनलाई पुनः पक्राउ गरेको जनाएको छ।
यसअघि, जनमत पार्टीका अध्यक्ष सीके राउतले आफूलाई ज्यान मार्ने र रेशम चौधरीलाई पुनः पक्राउ गराउने धम्की आएको दाबी गरेका थिए।
उनले भनेका थिए, “परिवारमा झगडा लगाएर होस्, पदाधिकारीमाथि स्रोत-साधन प्रयोग गरेर होस्, मिडियामार्फत चरित्र हत्या गरेर होस्, धर्म वा जातिको नाममा आक्रमण गराएर होस्, पार्टी फुटाउने वा सांसदहरू खरिद गर्ने प्रयास होस्, कुनै पनि कसर बाँकी राखिएको छैन।”
