लुम्बिनी (मर्चवार): रुपन्देहीको सिद्धार्थनगर नगरपालिका सहरी योजना, पूर्वाधार विकास तथा विपद् व्यवस्थापन क्षेत्रमा उल्लेखनीय कार्यसम्पादन गर्दै देशभरकै उत्कृष्ट नगरपालिका बनेको छ।
नेपाल नगरपालिका सङ्घले आर्थिक वर्ष २०८०/८१ मा उत्कृष्ट कार्यसम्पादन गरेको भन्दै सिद्धार्थनगर नगरपालिकालाई ‘उत्कृष्ट नगरपालिका पुरस्कार–२०८१’ बाट सम्मान गरेको हो।
प्रधानमन्त्रीद्वारा सम्मान
नेपाल नगरपालिका सङ्घको ३२औँ स्थापना दिवसको अवसरमा काठमाडौंमा आयोजित विशेष समारोहमा प्रधानमन्त्री केपी शर्मा ओलीले सिद्धार्थनगरका प्रमुख इश्तियाक अहमद खाँ र उपप्रमुख उमा अधिकारीलाई सम्मान गर्नुभयो।
नगरपालिका सङ्घले हरेक वर्ष नगरपालिकाहरूको विभिन्न सूचकका आधारमा उत्कृष्टलाई पुरस्कृत गर्दै आएको छ। यस वर्ष सिद्धार्थनगर नगरपालिकाले ८५ प्रतिशत अंक प्राप्त गर्दै मुलुकभरका नगरपालिकाहरूलाई पछि पार्न सफल भएको हो।
नगर प्रमुखको प्रतिक्रिया
नगर प्रमुख खाँले नगरबासी, जनप्रतिनिधि र कर्मचारीहरूको समर्पणकै कारण यो सफलता हासिल भएको बताउनुभयो।
“हाम्रो संयुक्त प्रयासकै कारण यो उपलब्धि सम्भव भयो,” उहाँले भन्नुभयो, “यो सम्मानले हामीलाई झन् बढी जिम्मेवार बनाएको छ। आगामी दिनमा नगरपालिकालाई हरेक सूचकमा अझ उत्कृष्ट बनाउने लक्ष्य लिएका छौँ।”
सिद्धार्थनगरको सफलता क्षेत्रहरू
नगरपालिका सङ्घका अनुसार सिद्धार्थनगरले विशेषगरी सहरी योजना, यातायात व्यवस्थापन र खानेपानी लगायतका क्षेत्रमा उत्कृष्ट कार्यसम्पादन गरेको छ।
नगरपालिकाले विकासका पूर्वाधारहरूलाई प्रभावकारी रूपमा व्यवस्थापन गर्दै नागरिक सेवामा सुधार ल्याएको कारण मुलुककै उत्कृष्ट बन्न सफल भएको हो।
