काठमाडौँ । राष्ट्रिय स्वतन्त्र पार्टी (रास्वपा) ले आफ्ना नवनिर्वाचित प्रतिनिधिसभा सदस्यहरूका लागि दुई दिने अभिमुखीकरण प्रशिक्षण कार्यक्रम आयोजना गर्ने भएको छ। पार्टीले आगामी चैत ३ र ४ गते काठमाडौँमा नवनिर्वाचित सांसदहरूलाई संसदीय प्रक्रिया र पार्टीका नीतिबारे प्रशिक्षण दिने तयारी गरेको हो।
रास्वपाका महामन्त्री कविन्द्र बुर्लाकोटीका अनुसार नवनिर्वाचित सांसदहरूलाई संसदीय जिम्मेवारी र भूमिकाबारे स्पष्ट पार्न यो प्रशिक्षण कार्यक्रम आयोजना गर्न लागिएको हो।
पार्टीले सबै नवनिर्वाचित सांसदहरूलाई चैत ३ गते बिहान ९ बजेसम्म काठमाडौँ उपत्यकाभित्र तोकिएको स्थानमा उपस्थित हुन निर्देशन दिएको छ। प्रशिक्षण कार्यक्रम सोही दिन बिहान १० बजेदेखि औपचारिक रूपमा सुरु हुने जनाइएको छ।
संसद्मा पार्टीको उपस्थिति प्रभावकारी बनाउन तथा जनसरोकारका मुद्दाहरूलाई प्रभावकारी रूपमा कसरी उठाउने भन्ने विषयमा विज्ञहरूद्वारा सांसदहरूलाई प्रशिक्षण दिइने योजना रहेको रास्वपाले जनाएको छ।
यो कार्यक्रमलाई रास्वपाले आफ्नो संसदीय यात्राको महत्त्वपूर्ण तयारीका रूपमा लिएको महामन्त्री बुर्लाकोटीले बताएका छन्। साथै, सबै सांसदहरूलाई कार्यक्रमको समयतालिका अनुसार तयारी अवस्थामा रहन पनि आग्रह गरिएको छ।
