काठमाडौं । राष्ट्रपति रामचन्द्र पौडेलले जातीय विभेद र छुवाछुत सामाजिक, नैतिक तथा मानवीय गरिमाविरुद्धको गम्भीर अपराध भएको बताएका छन्।
जातीय भेदभाव तथा छुवाछुत उन्मूलन दिवसको अवसरमा बिहीबार शुभकामना सन्देश जारी गर्दै राष्ट्रपतिले नेपालको संविधानले देशको बहुजातीय, बहुभाषिक, बहुधार्मिक, बहुसांस्कृतिक तथा भौगोलिक विविधतालाई राष्ट्रिय पहिचानका रूपमा आत्मसात् गरेको उल्लेख गरे।
उनले संविधानले विविधताबीचको एकता, सामाजिक तथा सांस्कृतिक ऐक्यबद्धता, सहिष्णुता र सद्भावको संरक्षण तथा प्रवर्द्धनलाई प्राथमिकता दिएको बताए। साथै, वर्गीय, जातीय, क्षेत्रीय, भाषिक, धार्मिक, लैंगिक तथा अन्य सबै प्रकारका विभेद अन्त्य गर्दै सामाजिक न्याय, आर्थिक समानता र समतामूलक समाज निर्माण गर्ने लक्ष्य संविधानले लिएको उनले उल्लेख गरे।
राष्ट्रपतिले समानुपातिक, समावेशी र सहभागितामूलक सिद्धान्तमार्फत समृद्ध र न्यायपूर्ण समाज निर्माण गर्न सबैको साझा प्रयास आवश्यक रहेको बताए।
सन्देशमार्फत उनले देश तथा विदेशमा रहेका सम्पूर्ण नेपालीमा सुख, शान्ति, समृद्धि र सामाजिक सद्भावका लागि शुभकामना व्यक्त गरेका छन्।
