काठमाडौं — रूससँग युद्धमा रहेको युक्रेन आफ्नो अर्थव्यवस्था गतिशील राख्न अझै रूसमै निर्भर रहेको तथ्यांकले देखाएको छ। जुलाई २०२५ मा युक्रेनमा आपूर्ति गरिएको डिजेलको सबैभन्दा ठूलो भाग रूसकै तेलबाट बनेको छ।
युक्रेनलाई सबैभन्दा बढी डिजेल आपूर्ति गर्ने देश भारत बनेको छ। तेल बजार विश्लेषण फर्म नाफ्टोरिनोकका अनुसार, भारतले जुलाई २०२५ मा युक्रेनको डिजेल मागको १५.५% पूरा गरेको छ, जुन जुलाई २०२४ मा केवल १.९% थियो। यस महिनामा भारतले युक्रेनमा दैनिक औसत २,७०० टन डिजेल पठाएको थियो, जुन यस वर्षको सबैभन्दा उच्च मासिक निर्यात हो।
रोचक तथ्य के छ भने, डिजेल उत्पादनका लागि भारतले अधिकांश कच्चा तेल रूसबाट नै खरिद गरिरहेको छ, जुन युक्रेनसँग युद्धरत देश हो। अमेरिकाले रुसी तेल आयात गरेकोमा भारतमाथि ५० प्रतिशत दण्डात्मक भन्सार लगाएको भएपनि भारतको डिजेल आपूर्ति युक्रेनको युद्धकालीन अर्थतन्त्रलाई सहयोग पुर्याइरहेको छ। यसले विश्वव्यापी कूटनीति र व्यापारको जटिलता स्पष्ट गर्दछ।
जुलाई २०२५ मा युक्रेनलाई डिजेल आपूर्ति गर्ने अन्य प्रमुख आपूर्तिकर्ताहरूमा स्लोभाकिया (१५%), ग्रीस (१३.५%), टर्की (१२.४%) र लिथुआनिया (११.४%) रहेका थिए।
