काठमाडौं: जनता समाजवादी पार्टी (जसपा) नेपालका प्रचारप्रसार तथा प्रकाशन विभाग प्रमुख पूर्ण बस्नेतले भ्रष्टाचार नियन्त्रणका लागि कडा कानुनी व्यवस्था गर्नुपर्ने माग गरेका छन्।
उनका अनुसार उच्च पदस्थ राजनीतिज्ञ, सरकारी कर्मचारी तथा अन्य पदाधिकारीहरूको सम्पत्ति छानबिन गरी गैरकानुनी रूपमा आर्जित सम्पत्ति राष्ट्रियकरण गर्न र दोषीलाई आजीवन कारावासको सजाय दिनुपर्ने छ।
बस्नेतले भने, “देशमा जताततै सुनिने र देखिने कुरा के छ भने, त्यो भ्रष्टाचार हो। अहिलेको अवस्थामा मुलुकमा व्यापक भ्रष्टाचार भएको ढुक्कका साथ भन्न सकिन्छ।”
भ्रष्टाचारलाई भयावह रोगको रूपमा चित्रण गर्दै उनले चेतावनी दिए— “यदि बेलैमा सतर्कता नअपनाइए, यसले मुलुकलाई गम्भीर दुर्घटनातर्फ लैजान सक्छ।”
उनले भ्रष्टाचार नियन्त्रणका लागि सोच, संस्कार र व्यवहारमै सुधार आवश्यक रहेकोमा विशेष जोड दिए।
