काठमाडौं । नेकपा एकीकृत समाजवादीका महासचिव घनश्याम भुषालले हालका शीर्ष नेताहरूलाई ‘जेन जि’ आन्दोलनको मागअनुसार छिटो बिदा दिनुपर्ने बताएका छन्।
सोमबार राजधानीमा आयोजित पत्रकार सम्मेलनमा उनले पुराना नेताहरूलाई विदा गरेर दलभित्र र समाजमा नयाँ आशा र विश्वास जगाउने आवश्यकता औंल्याए। साथै, संविधान जारी भएपछिको राजनीतिक अभ्यासबारे स्वेतपत्र ल्याउनुपर्ने, सार्वजनिक पदमा पुगेका सबैको सम्पत्ति छानबिन गर्न उच्चस्तरीय आयोग गठन गर्नुपर्ने र स्रोत नखुलेको सम्पत्ति राष्ट्रियकरण गर्नुपर्ने पनि उनको भनाइ थियो।
उनले वामपन्थी दलहरूमा विचार, राजनीति, संगठन र मुद्दाहरूमा भएको भ्रष्टीकरणलाई स्वीकार गर्दै ती सबै क्षेत्रमा पुनः वामपन्थीकरण गर्नुपर्ने आवश्यकता औंल्याए। पुनर्गठित वामपन्थी पार्टीहरूलाई व्यापक ध्रुवीकरण र एकतामा लैजानुपर्नेमा पनि उनले जोड दिए।
भुषालले आगामी दस वर्षमा सबै काम गर्ने उमेरका नेपालीलाई रोजगारी उपलब्ध गराउने, भ्रष्टाचारमुक्त सुशासनयुक्त राज्य निर्माण गर्ने र समाजवादको आधार तयार पार्ने ठोस कार्यक्रम ल्याउनुपर्ने आवश्यकता औंल्याए। साथै, लोकतान्त्रिक स्थिरतासहित नेपालको समृद्धिको पक्षमा अन्तर्राष्ट्रिय समुदायलाई विश्वासमा लिनुपर्नेमा पनि उनले जोड दिए।
उनले भने, “नेताहरूले आफ्ना पद र नियन्त्रण बचाउन बहाना बनाए पनि समाजले अस्वीकार गरेको नेतृत्वका आधारमा पार्टीहरू जनतामा जान सक्दैनन्। संविधान संशोधनको माग, परम्परागत राष्ट्रवादका नाममा हुने सङ्गठन प्रयास र सडकमा देखिन सक्ने पपुलिस्ट आन्दोलनलाई रोक्न वामपन्थी आन्दोलनका इमान्दार राजनीतिकर्मीहरू तत्काल सक्रिय हुनुपर्छ।”
भुषालका अनुसार, देशमा उत्पन्न हुन सक्ने त्रासदीपूर्ण सम्भावनालाई रोक्न सबै इमान्दार वामपन्थी कार्यकर्ताले जिम्मेवारीपूर्वक भूमिका खेल्नुपर्नेछ।
