काठमाडौँ: भूमि व्यवस्था, सहकारी तथा गरिबी निवारण मन्त्रालयले ‘स्वर्गद्वारी गुठी पीडित मोही किसान सङ्घर्ष समिति’ लाई वार्ताका लागि आह्वान गरेको छ। मन्त्रालयका सहसचिव तथा प्रवक्ता गणेशप्रसाद भट्टले प्रेस विज्ञप्ति जारी गर्दै माइतीघरमा आन्दोलनरत किसानलाई संवादका लागि बोलाएका हुन्।
प्रवक्ता भट्टका अनुसार मन्त्रालयले विगतमा भएका सहमति कार्यान्वयनका लागि आवश्यक प्रक्रिया अघि बढाइसकेको छ। उनले भने, “आन्दोलनका क्रममा उठाइएका विषयवस्तु समाधानका लागि वार्ता गर्न हामी तयार छौँ, त्यसैले सम्बन्धित पक्षलाई वार्तामा आउन हार्दिक आह्वान गर्दछौँ।”
वार्ता प्रक्रिया अघि बढाउन मन्त्रालयले सहसचिव मदन कोइरालाको संयोजकत्वमा तीन सदस्यीय वार्ता समिति गठन गरेको छ। समितिमा उपसचिव महेन्द्रप्रसाद साँखी र गुठी संस्थानका कानुन अधिकृत जनक पोखरेल सदस्य छन्।
