काठमाडौं । काठमाडौं महानगरपालिकाले मनोहरा जग्गा एकीकरण आयोजनाअन्तर्गत नदीको परिवर्तन भएको धारलाई स्वीकृत विस्तृत परियोजना प्रतिवेदन (डीपीआर) अनुसार पुरानै अवस्थामा फर्काउने तयारी थालेको छ।
कार्यवाहक प्रमुख सुनिता डंगोलले प्राविधिक तथा प्रशासनिक परामर्श गर्दै नदीको वहाव २०२१ सालको नापी नक्साअनुसार कायम गर्ने प्रक्रिया अघि बढाउने बताएकी छन्। हाल नदी पश्चिमतर्फ सरेका कारण काठमाडौँतर्फको करिब १०० रोपनी जमिन भक्तपुरतर्फ र भक्तपुरतर्फको करिब १५ रोपनी जमिन काठमाडौँतर्फ सरेको अवस्था छ।
प्रमुख प्रशासकीय अधिकृत सरोज गुरागाईं र आयोजनाका प्रमुख निर्मलराज बरालसँग नक्सा अध्ययनपछि डंगोलले कानुनी तथा प्रशासनिक प्रक्रिया पूरा गरी डीपीआरअनुसारको वहाव क्षेत्र कायम गर्ने कामलाई उच्च प्राथमिकतामा राखिएको बताइन्।
उनले नदी किनारका अव्यवस्थित बस्तीका कारण रोकिएका कामलाई तत्काल अघि बढाएर आयोजना छिटो सम्पन्न गर्नुपर्नेमा जोड दिइन्। यसका लागि लागत अनुमान तयार गर्ने, जनशक्ति परिचालन गर्ने र कार्यान्वयन प्रक्रिया तीव्र पार्ने निर्देशन दिइएको छ।
महानगरले भूमिहीन दाबी गर्ने व्यक्तिहरूको उचित व्यवस्थापन, खाली गराइएका स्थानको संरक्षण तथा निर्माण सामग्री व्यवस्थापनलाई पनि प्राथमिकतामा राख्ने जनाएको छ।
आयोजना प्रमुख बरालका अनुसार १.५ किलोमिटर नदी क्षेत्रमध्ये ५७५ मिटर मात्र पुरानै अवस्थामा रहेको छ भने बाँकी भागमा नदीको धार परिवर्तन भएको छ।
