काठमाडौं: राष्ट्रिय स्वतन्त्र पार्टी (रास्वपा)का प्रमुख सचेतक सन्तोष परियारले भिजिट भिसा प्रकरणमा उठाइएका मागप्रति सत्तापक्ष गम्भीर नदेखिएको आरोप लगाएका छन्।
सोमबार संसद भवन नयाँ बानेश्वरमा सञ्चारकर्मीहरूसँग कुरा गर्दै उनले सदनको अवरोध हटाउने विषयमा पटकपटक छलफल भए पनि ठोस प्रतिबद्धता नआएको बताए। उनका अनुसार, रास्वपाले अघि सारेका मागहरूप्रति सत्ता गठबन्धनभित्रकै दल कांग्रेसका नेताहरू असहमति जनाएकाले सहमतिको वातावरण बन्न नसकेको हो।
“भिजिट भिसा प्रकरण कुनै सामान्य विषय होइन,” परियारले भने, “छानबिन समिति गठन गर्न प्रस्ताव गर्दा न गृह मन्त्रीको राजीनामा आउने भनिएको छ, न त समिति नै बन्ने भनिएको छ। यस्तो अवस्थामा संवादको औचित्य रहँदैन।”
उनले प्रतिपक्षी दलहरूको माग सम्बोधन गरिएमा उत्पन्न सबै समस्याको समाधान सहजै सम्भव हुने स्पष्ट पारे।
