काठमाडौं । शंकर पोखरेलले नेपाल कम्युनिष्ट पार्टी (एमाले)का महासचिवका हैसियतमा बीबीसीले सार्वजनिक गरेको डकुमेन्ट्रीलाई भूराजनीतिक चलखेलको जिउँदो प्रमाण बताएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले सार्वभौम राष्ट्रको आन्तरिक राजनीतिक प्रक्रियामा बाह्य प्रभाव पार्ने कुनै पनि प्रयास अस्वीकार्य हुने स्पष्ट अडान व्यक्त गरेका छन्।
निर्वाचनजस्तो संवेदनशील समयमा यस्ता सामग्री सार्वजनिक हुनु संयोग मात्र हो वा नियोजित हस्तक्षेप हो भन्ने प्रश्न उठाउँदै उनले गम्भीर ध्यानाकर्षण गराएका छन्।
उनले लेखेका छन्, “चुनावको मुखमा सार्वजनिक गरिएको बीबीसीको डकुमेन्ट्री केवल सञ्चार सामग्री मात्र होइन, यो भूराजनीतिक चलखेलको जिउँदो प्रमाण हो।”
पोखरेलले लोकतन्त्रको रक्षा नेपाली जनताले आफैं गर्नुपर्ने उल्लेख गर्दै नेपालको सार्वभौमिकता संरक्षण गर्नु सबैको साझा जिम्मेवारी भएको बताएका छन्।
