काठमाडौं। हास्य कलाकार सागर लम्साल (बले) पक्राउ परेका छन्। उनलाई बुढानिलकण्ठ क्षेत्रबाट नियन्त्रणमा लिएको जिल्ला प्रहरी परिसर काठमाडौंले जनाएको छ।
प्रहरीका अनुसार अमेरिकामा बस्ने एक युवतीले लम्सालमाथि जबर्जस्ती करणी गरेको आरोप लगाएपछि अनुसन्धानका लागि उनलाई पक्राउ गरिएको हो।
उक्त युवतीले एक वर्षअघि अमेरिकामा आफ्नो इच्छाविपरीत लम्सालले जबर्जस्ती करणी गरेको आरोप लगाएकी छन्। घटनापछि आफू मानसिक रूपमा गम्भीर असरमा परेको उनले सामाजिक सञ्जालमार्फत उल्लेख गरेकी छन्।
युवतीका अनुसार पारिवारिक चिनजानका आधारमा विश्वास गरेर भेट्दा लम्सालले ‘अपार्टमेन्ट हेर्न जाऊँ’ भनेपछि उनलाई आफ्नै बस्ने कोठामा लगेका थिए। त्यहाँ आफूले भोगेका मानसिक समस्याबारे कुरा गरिरहँदा लम्सालले जबर्जस्ती करणी गरेको आरोप उनले लगाएकी छन्।
दुवै जनाबीच पारिवारिक सम्बन्ध रहेको र युवतीले उनलाई ‘दाइ’ भनेर सम्बोधन गर्ने गरेको पनि उल्लेख गरिएको छ। लम्साल अमेरिका गएका बेला उनीहरूबीच भेट भएको बताइएको छ।
युवतीले आफू पहिलेबाटै चिन्ता र अवसादजस्ता मानसिक समस्यासँग जुधिरहेको र आफ्ना बुबाको सल्लाहमा लम्साललाई भेटेको बताएकी छन्। प्रहरीले घटनाबारे थप अनुसन्धान जारी रहेको जनाएको छ।
