काठमाडौं । गृहमन्त्री सुधन गुरुङले नेपाल प्रहरीका लागि आवश्यक पोसाक स्वदेशमै उत्पादन गर्ने योजना अघि सारिएको बताएका छन्।
काठमाडौंमा आयोजित एक कार्यक्रममा उनले प्रहरी पोसाक उत्पादनका लागि आफ्नै फ्याक्ट्री स्थापना गरिने र उक्त उद्योग सहरभन्दा बाहिर ग्रामीण क्षेत्रमा राखिने जानकारी दिए। यसबाट स्थानीय स्तरमा रोजगारी सिर्जना हुनुका साथै स्वदेशी उत्पादन प्रवर्द्धन हुने अपेक्षा गरिएको छ।
मन्त्री गुरुङका अनुसार देशमै पोसाक उत्पादन गर्दा उद्योग विकासमा टेवा पुग्ने, आवश्यक सामग्री समयमै उपलब्ध हुने र आयातमा निर्भरता घट्नेछ।
यससँगै उनले प्रहरी कर्मचारीहरूको पोषण र कार्य अवस्थाबारे पनि ध्यान दिन आवश्यक रहेको उल्लेख गरे। दिनरात खट्नुपर्ने भएकाले उनीहरूको पोषण, सुविधा र कार्यपरिस्थितिमा सुधार गर्नुपर्नेमा उनले जोड दिए।
उनले यस विषयमा आफूले पहिलेदेखि नै पहल गर्दै आएको र सम्बन्धित फाइल मन्त्रालयबाट अघि बढिसकेको जानकारी दिँदै अब कार्यान्वयन चरणमा लैजान तयारी भइरहेको बताए।
