काठमाडौँ: आगामी आर्थिक वर्षकाे नीति तथा कार्यक्रम तथा बजेट निर्माणका सन्दर्भमा नेपाल कम्युनिष्ट पार्टी (एमाले)ले प्रधानमन्त्री केपी शर्मा ओलीलाई विषयगत सुझावहरू पेश गरेको छ।
प्रधानमन्त्री तथा मन्त्रिपरिषद्को कार्यालय, सिंहदरबारमा आज आयोजित कार्यक्रममा एमाले महासचिव शङ्कर पोखरेलसहितका नेताहरूले प्रधानमन्त्री तथा पार्टी अध्यक्ष ओलीलाई लिखित सुझावपत्र हस्तान्तरण गरेका हुन्।
महासचिव पोखरेलले प्रधानमन्त्रीलाई जानकारी गराउँदै भने— अघिल्लो कार्यकालमा पनि एमालेले यसै प्रकारका सुझावहरू दिएको थियो, तर त्यो बेला नीति तथा कार्यक्रम तथा बजेट अघिल्लो सरकारले पहिल्यै प्रस्तुत गरिसकेकाले ती सुझावहरू समावेश हुन सकेनन्। त्यसैले, अहिले ताजगीकरणसहित पुनः सुझाव पेश गरिएको हो।
पोखरेलले मध्यपहाडी (पुष्पलाल) लोकमार्ग केन्द्रित सङ्कल्प यात्राका आधारमा अघिल्लो सरकारलाई दिएको सुझाव अझै कार्यान्वयनको पर्खाइमै रहेको उल्लेख गर्दै त्यसलाई अबको नीति तथा कार्यक्रममा समेट्न आग्रह गरे।
प्रधानमन्त्री ओलीले विकासका लागि ‘भिजनरी’ सोच बोकेको एमालेजस्तो पार्टीबाट प्राप्त सुझावहरू सरकारको नीति, कार्यक्रम र बजेट निर्माणमा महत्वपूर्ण टेवा पुग्ने विश्वास व्यक्त गरे।
